കാസർകോട് : Heart Touching Story Of A Cuckoo : അങ്ങനെ ഒരാഴ്‌ച കാലത്തെ പരിചരണത്തിന്‌ ശേഷം കുയിലമ്മ പതിയെ പറക്കാൻ തുടങ്ങിയിരിക്കുന്നു. ജീവൻ രക്ഷിച്ചതിന്‍റെ സന്തോഷമുണ്ടെങ്കിലും പുള്ളിക്കുയില്‍ പിരിയുന്നതിന്‍റെ വേദനയുണ്ട്‌ ചാലക്കടവിലെ കരുണകാരന്‍റെ വാക്കുകളില്‍. പരുന്തിന്‍റെ ആക്രമണത്തിൽ ഗുരുതരമായി പരിക്കേറ്റ കുയിലിന്‍റെ ആരോഗ്യം മെച്ചപ്പെടുത്താൻ കരുണാകരനും മക്കളായ മനസ്വിജയും മാനസയും രാവും പകലും കൂട്ടിരുന്നു.
സ്‌കൂളിൽ പോകുമ്പോൾ മാനസ ആഹാരം കൊടുക്കും. പിന്നെ സംരക്ഷണം കരുണാകരനാണ്. ചുണ്ടുപിളർത്തി പാലൊഴിച്ച് കൊടുക്കുമ്പോൾ കുയിൽ ചിറകിട്ടടിക്കും. പിന്നെ വിരലുകളിൽ കൊക്കുരുമ്മി നന്ദി പ്രകടിപ്പിക്കും.
പത്തു ദിവസം മുൻപാണ് വീടിന്‍റെ പിന്നിലെ പനയിൽ നിന്നും പരുന്തിന്‍റെ അക്രമണത്തില്‍ കുയിൽ വീണത്‌. പരുന്തിന്‍റെ നഖം കൊണ്ട് തൊണ്ടയിലെ മാംസ ഭാഗങ്ങൾ അടർന്നുപോയിരുന്നു. ഇതുകണ്ട കരുണാകരൻ മുറിവില്‍ മരുന്ന്‌ വച്ചുകെട്ടി, കുയിലിന്‍റെ സംരക്ഷണം ഏറ്റെടുത്തു.
കഴുത്തിന് പരിക്കേറ്റതിനാൽ മിണ്ടാട്ടം ഇല്ലായിരുന്നു. സ്‌കൂൾ വിട്ടുവന്നാൽ മാനസയുടെയും മനസ്വിജയുടെയും കളിയും ചിരിയും കുയിലിനൊപ്പമാണ്. ആദ്യ മൂന്ന് ദിവസം ജലപാനം ഉണ്ടായില്ലെങ്കിലും കരുണാകരന്‍റെ പരിചരണത്തില്‍ കുയില്‍ പതിയെ പാൽ കഴിച്ചുതുടങ്ങി.
ALSO READ: Heart Touching| മയില്‍ കുഞ്ഞുങ്ങള്‍ക്ക് ഇനി കോഴിയമ്മയുടെ ചൂടില്ല, ജീവിതം ഒറ്റയ്ക്ക്
പിന്നെ അൽപ്പാൽപ്പമായി പഴങ്ങളും തിന്നു. ഇപ്പോൾ പഴയ ആരോഗ്യത്തിലേക്ക്‌ തിരിച്ചെത്തിക്കൊണ്ടിരിക്കുകയാണ്‌ കരുണാകരന്‍റെയും കുടുംബത്തിന്‍റെയും പ്രിയപ്പെട്ടവളായ കുയിലമ്മ. വീടിനോട് ചേർന്നാണ്‌ കരുണാകരന്‍റെ ഹോട്ടല്‍. അതുകൊണ്ട് എപ്പോഴും കുയിലിനെ ശ്രദ്ധിക്കാനും കഴിയും.
കഴിഞ്ഞ ഒരാഴ്‌ചയായി എന്നും രാവിലെ ഇണക്കുയില്‍ വന്ന്‌ ഒച്ചയിടും. അപ്പോൾ കുയിൽ തല ചരിച്ച് നോക്കും. പ്രിയപ്പെട്ടവള്‍ സുരക്ഷിതയാണെന്ന് കാണുമ്പോൾ ഇണ പറന്നുപോകും.
പറക്കാന്‍ കഴിയാത്ത പരുവത്തിലായത്‌ കൊണ്ട് പൂച്ചയുടെയോ പാമ്പിന്‍റെയോ വായിലാകാതെ കുയിലിനെ സംരക്ഷിക്കാൻ കരുണാകരനൊപ്പം ഭാര്യ ബിന്ദുവും ഉണ്ട്. ഒരാഴ്‌ചയുടെ ദൈര്‍ഘ്യമേ ഉള്ളൂ എങ്കിലും കുയിലിന്‍റെയും കരുണാകരന്‍റെ കുടുംബത്തിന്‍റെയും സൗഹൃദം നാട്ടുകാർക്കും വിസ്‌മയമായിരിക്കുകയാണ്.
