കാസര്‍കോട്: അർജന്‍റീന ഉറപ്പായും ജയിക്കും.. മെസി ഹാട്രിക് അടിക്കും.. കുട്ടി ആരാധകന്റെ വാക്കുകളാണിത്.. ഇതിലെന്താ ഇത്ര പുതുമ എന്നാണ് ചോദ്യമെങ്കിൽ കഴിഞ്ഞ ദിവസം സൗദി അറേബ്യയോട് അർജന്‍റീന പരാജയപ്പെട്ടപ്പോൾ ഏറ്റവും കൂടുതൽ കളിയാക്കൽ ഏറ്റുവാങ്ങിയ ആരാധകനാണ് കാസർകോട്ടെ നിബ്രാസ്.
പരിഹാസങ്ങൾക്ക് കരഞ്ഞുകൊണ്ട് മറുപടി പറയുന്ന നിബ്രാസിന്‍റെ വീഡിയോ സമൂഹ മാധ്യമങ്ങളിൽ വൈറലാകുകയും ചെയ്തിരുന്നു. അന്ന് കരഞ്ഞു കൊണ്ടാണ് മറുപടിയെങ്കിൽ ഇന്ന് ചിരിച്ചുകൊണ്ടാകും മറുപടിയെന്ന് ഈ കുട്ടി ആരാധകൻ പറയുന്നു.
ഇന്ന് വീണ്ടും അർജന്‍റീന കളത്തിൽ ഇറങ്ങുമ്പോൾ ഈ കുഞ്ഞ് ആരാധകന്റെ അടക്കം മനസ്സിൽ വിജയമല്ലാതെ മറ്റൊന്നുമില്ല. ഉദിനൂർ ഹയർ സെക്കൻഡറി സ്കൂളിലെ ഒൻപതാം ക്ലാസ് വിദ്യാർഥിയാണ് നിബ്രാസ്.
ഇന്ന് രണ്ടാം മത്സരത്തിന് അർജന്‍റീന ഇറങ്ങുമ്പോൾ നെഞ്ചിടിപ്പോടെയാകും ആരാധകർ കളി കാണുക. മെക്സിക്കോയാണ് എതിരാളി. രാത്രി 12.30 നാണ് മത്സരം.
