കണ്ണൂര്‍: മഴ വന്നാല്‍ ക്ലാസ്‌മുറികൾ ചോർന്നൊലിക്കുന്ന ഒരു കാലമുണ്ടായിരുന്നു. പക്ഷേ ഇന്നതില്ല, സ്‌കൂളുകളെല്ലാം ഹൈടെക്ക് ആയി. അങ്ങനെ പഠനവും ഹൈടെക്കായപ്പോഴാണ് കൊവിഡും പിന്നാലെ ലോക്ക്ഡൗണും വന്നത്. അതോടെ പഠനം ഓൺലൈനിലും വീടുകളിലുമായി. പക്ഷേ തളിപ്പറമ്പിന് സമീപം കുളത്തൂരിൽ പഠനം വീട്ടിലല്ല, ഏറുമാടത്തിലാണ്.
എന്താണ് അങ്ങനെയെന്ന് ചോദിച്ചാല്‍ മൊബൈല്‍ നെറ്റ്‌വർക്ക് ഇല്ലാതെ എന്ത് ഓൺലൈൻ പഠനം എന്ന് ഇവർ തിരിച്ച് ചോദിക്കും. പക്ഷേ പഠനം മുടക്കാനാകില്ലല്ലോ, അങ്ങനെയാണ് നെറ്റ്‌വർക്ക് തേടി ഏറുമാടങ്ങളിലേക്കും ഉയരമുള്ള പ്രദേശങ്ങളിലും കയറിയിരുന്ന് ഓൺലൈൻ ക്ലാസുകളില്‍ പങ്കെടുക്കാൻ തുടങ്ങിയത്. പക്ഷേ അവിടെ മഴ വില്ലനായി. മഴയെത്തിയതോടെ ഏറുമാടത്തിലെ പഠനം അവസാനിച്ചു.
വേണ്ടത് മൊബൈല്‍ ടവർ
സമീപപ്രദേശങ്ങളില്‍ മൊബൈല്‍ ടവറുകൾ ഇല്ലാത്തതിനാൽ കുളത്തൂരുകാർക്ക് മൊബൈലിൽ കോളുകൾ ചെയ്യണമെങ്കിൽ പോലും പല സാഹസങ്ങളും കാട്ടേണ്ട സ്ഥിതിയാണ്. ചെറിയ കുട്ടികളെ ഏറുമാടങ്ങളിൽ കയറ്റി ഇരുത്തി ക്ലാസുകളിൽ പങ്കെടുപ്പിക്കുന്നത് വലിയ വെല്ലുവിളിയാണ്.
മഴ വന്നാല്‍ പിന്നെ പഠനമില്ല. മൊബൈല്‍ ടവർ സ്ഥാപിച്ചാല്‍ പ്രശ്ന പരിഹാരമാകുമെന്നാണ് നാട്ടുകാർ പറയുന്നത്. ഇതിനായി എംഎല്‍എയ്ക്ക് നിവേദനം നല്‍കി കാത്തിരിക്കുകയാണ് വിദ്യാർഥികളും രക്ഷിതാക്കളും.
ALSO READ: കൊവിഡ് മൂന്നാം തരംഗം സെപ്‌റ്റംബറിലെന്ന് ഐഐടി കാൺപൂർ പഠനം
