കണ്ണൂർ: സാക്ഷരത മിഷൻ (Literacy Mission) നടത്തുന്ന പരീക്ഷക്ക് സി.പി.എം ബ്രാഞ്ച് സെക്രട്ടറി മേൽനോട്ടം നൽകിയെന്ന സാക്ഷരത മിഷൻ അതോറിറ്റി ഡയറക്ടർ പി.എസ് ശ്രീകലയുടെ ഫേസ്ബുക്ക് പോസ്റ്റ് ചർച്ചയാകുന്നു. പൊതുവിദ്യാഭ്യാസ വകുപ്പിനു കീഴിൽ പ്രവർത്തിക്കുന്ന
സാക്ഷരത മിഷന്‍റെ പരീക്ഷയ്ക്ക് വാർഡ്‌ തലത്തിൽ കൗൺസിലർമാരാണ് മേൽനോട്ട ചുമതല വഹിക്കേണ്ടത് എന്നാണ് ചട്ടം. എന്നാൽ ഇതിന് വിരുദ്ധമായാണ് സി.പി.എം ബ്രാഞ്ച് സെക്രട്ടറി പരീക്ഷക്ക് മേൽനോട്ടം വഹിച്ചിരിക്കുന്നത്.
ഇക്കാര്യം സാക്ഷരത മിഷൻ അതോറിറ്റി ഡയറക്ടർ തന്നെ ഫേസ്ബുക്കിലൂടെ വെളിപ്പെടുത്തിയതോടെയാണ് സംഭവം ചർച്ചയായത്. മട്ടന്നൂർ നഗരസഭയിലെ അയ്യല്ലൂർ തുടർവിദ്യാകേന്ദ്രത്തിലാണ് നോഡൽ പ്രേരക് ബിന്ദുവിനും പ്രേരക് ഷീജയ്ക്കും കൗൺസിലർ ശ്രീജകുമാരിക്കുമൊപ്പം സി.പി.എം ബ്രാഞ്ച് സെക്രട്ടറി കെ. ശശിധരനും പരീക്ഷയ്ക്ക് മേൽനോട്ടം വഹിച്ചതായി മിഷൻ ഡയറക്ടർ ഫേസ്ബുക്ക് പോസ്റ്റില്‍ പറഞ്ഞത്.
Also Read: "എന്തിനാണ് സാറെ മന്ത്രിയായി ഇരിക്കുന്നത്"? ശശീന്ദ്രനെ പരിസഹിച്ച് വി.ഡി സതീശൻ
മുഖ്യമന്ത്രി ചെയർമാനായ ജനറൽ കൗൺസിലാണ് സാക്ഷരത മിഷന്‍റെ കാര്യനിർവഹണ സമിതി. ജില്ല, ബ്ലോക്ക്, ഗ്രാമ തലങ്ങളിൽ അതാത് തദ്ദേശഭരണ സ്ഥാപന പ്രതിനിധികളാണ് സാക്ഷരത സമിതി ചെയർമാൻമാർ ആയി പ്രവർത്തിക്കുന്നത്.
സാക്ഷരത മിഷൻ നടത്തുന്ന 'മികവുത്സവം' പരീക്ഷ ഞായറാഴ്ചയാണ് സംസ്ഥാനത്ത് തുടങ്ങിയത്. ജില്ലയിലെ ഏറ്റവും പ്രായം കുറഞ്ഞ പഠിതാവായ 17 കാരി ഉൾപ്പെടെയുള്ളവർ പരീക്ഷയെഴുതിയ കേന്ദ്രം സന്ദർശിച്ച ശേഷമായിരുന്നു ശ്രീകലയുടെ ഫേസ്ബുക് പോസ്റ്റ്. പാർട്ടി പതാകകളും ചുവന്ന തോരണങ്ങളും പശ്ചാത്തലത്തിലുള്ള അഞ്ചു ചിത്രങ്ങളും പോസ്റ്റിനൊപ്പം പി.എസ്. ശ്രീകല പങ്കുവച്ചിട്ടുണ്ട്.
