കണ്ണൂർ: വിദ്യാലയങ്ങളെല്ലാം നാടിന്‍റെ ചരിത്രത്തിന്‍റെ സാക്ഷികളാണ്. ഒരു നാടിന്‍റെ ആകെ സാംസ്‌കാരികവും വിദ്യാഭ്യാസപരവുമായുള്ള വളർച്ചയ്ക്ക് അടിത്തറ പാകിയ ഇടങ്ങൾ. അങ്ങനെയൊരു വിദ്യാലയമാണ് കണ്ണൂർ ജില്ലയിലെ മാങ്ങാട്ട് എൽ പി സ്‌കൂൾ. ഏതാണ്ട് 140 വർഷത്തെ പഴക്കമുണ്ട് ഈ വിദ്യാലയത്തിന്. വിദ്യാർഥികൾ കയറിയും ഇറങ്ങിയും ഒരു നാടിന്‍റെ ആകെ ഗൃഹാതുരത്വവും സംസ്‌കാരവും ഉറങ്ങുന്ന ഭൂമിക. എന്നാൽ, ആ വിദ്യാലയം ഇന്ന് മരണക്കിടക്കയിലാണ്.
ദേശീയപാത വികസനത്തിൻ്റെ ഭാഗമായി വിദ്യാലയത്തിൻ്റെ ഒരു പാതി പൊളിച്ചു മാറ്റിയതോടെ വിദ്യാലയത്തിൻ്റെ പ്രവർത്തനങ്ങൾക്ക് സ്ഥല സൗകര്യങ്ങളുടെ പ്രതിസന്ധി രൂപപ്പെട്ടു. പ്രതിസന്ധി പരിഹരിക്കാൻ മാനേജ്മെന്‍റിനെ ബന്ധപ്പെട്ടെങ്കിലും ഒരു തുടർ നടപടിയും ഉണ്ടായില്ല. നിരുത്തരവാദപരമായ മാനേജ്മെന്‍റിന്‍റെ സമീപനമാണ് ഇന്ന് വിദ്യാലയത്തിൻ്റെ മുന്നോട്ടുള്ള പ്രവർത്തനത്തിന് വെല്ലുവിളി തീർക്കുന്നത്.
സി കെ കൃഷ്‌ണൻ മാസ്റ്റർ ആയിരുന്നു വിദ്യാലയത്തിൻ്റെ മാനേജർ. 2008 ൽ അദ്ദേഹം മരിച്ചതോടെ ഉടമസ്ഥാവകാശം ഭാര്യയുടെയും അഞ്ച് മക്കളുടെയും പേരിലേക്ക് മാറി. എന്നാൽ മക്കൾ തമ്മിലുള്ള സ്വത്ത് തർക്കമാണ് വിദ്യാർഥികളുടെ ഭാവി പോലും അനാഥമാക്കുന്ന തരത്തിലേക്ക് കൊണ്ടുചെന്നെത്തിച്ചിരിക്കുന്നത്.
ഒന്നേകാൽ കോടിയിലേറെ രൂപ ഹൈവേ വികസനത്തിൻ്റെ ഭാഗമായി കുടുംബത്തിന് കിട്ടിയെങ്കിലും. കുടുംബ പോര് വിദ്യാലയത്തിൻ്റെ ഭാവിക്ക് പോലും ഭംഗം വരുത്തുകയാണ്. പ്രീ പ്രൈമറി അടക്കം 10 ക്ലാസുകളാണ് വിദ്യാലയത്തിൽ ഉള്ളത്. 11 ടീച്ചർമാരടക്കം 200 ഓളം വിദ്യാർഥികൾ ഈ വിദ്യാലയത്തിൽ പഠിക്കുന്നുണ്ട്. മാനേജ്മെന്‍റിൻ്റെ നിലപാടിനെതിരെ സമരത്തിനൊരുങ്ങുകയാണ് പ്രദേശവാസികളും പിടിഎയും വിദ്യാർഥികളും.
