കണ്ണൂർ നടുവിലില്‍ ആര്‍എസ്എസ് നേതാവ് ഷിബുവിന്റെ വീട്ടുമുറ്റത്ത് ബോംബ് പൊട്ടിത്തെറിച്ച് മകനടക്കം രണ്ട് കുട്ടികള്‍ക്ക് പരിക്ക്. ഗോകുല്‍, കജില്‍ എന്നിവര്‍ക്കാണ് പരിക്ക്. ഇരുവരെയും പരിയാരം മെഡിക്കല്‍ കോളജില്‍ പ്രവേശിപ്പിച്ചു. ഗോകുലിന്റെ പരിക്ക് ഗുരുതരമാണ്. സ്ഫോടനം നടന്ന സ്ഥലത്ത് തളിപ്പറമ്പ് ഡിവൈെസ്പിയുടെ നേതൃത്വത്തിലുള്ള സംഘം പരിശോധന നടത്തി. ഷിബുവിന്റെ വീട്ടില്‍ സൂക്ഷിച്ചിരുന്ന ബോംബാണ് പൊട്ടിത്തെറിച്ചതെന്ന് സിപിഎം ആരോപിച്ചു. പൊലീസ് നടത്തിയ തിരച്ചിലിൽ ഏഴ് വടിവാളുകളും മഴുവും ബോംബ് നിർമ്മാണ സാമഗ്രികളും ഷിബുവിന്‍റെവീട്ടില്‍ നിന്ന് കണ്ടെടുത്തു.
ഏഴും പന്ത്രണ്ടും വയസ്സുള്ള കുട്ടികൾക്കാണ് ഗുരുതര പരിക്കേറ്റത്. പക്ഷിക്കൂട് ഉണ്ടാക്കുന്നതിന് വേണ്ടി വീടിന്‍റെ വശത്തെ മരക്കഷ്ണങ്ങൾ വലിച്ചെടുത്തപ്പോഴാണ് സ്ഫോടനമുണ്ടായത്. ഒരു കുട്ടിയുടെ അരയ്ക്ക് താഴെ സാരമായ മുറിവുകളുണ്ട്. ജനനേന്ദ്രിയത്തിനും സ്ഫോടനത്തിൽ പരിക്കേറ്റു.
മരക്കഷ്ണങ്ങൾക്കിടയിൽ ബോംബ് ഒളിപ്പിച്ചിരുന്നുവെന്നാണ് നിഗമനം. സ്ഫോടനത്തിന് പിന്നാലെ ഷിബു ഒളിവിൽ പോയെന്ന് പൊലീസ് പറയുന്നു. ആസൂത്രിതമായ ആക്രമണത്തിന് തയാറാക്കിയ ബോംബാണ് പൊട്ടിത്തെറിച്ചതെന്ന് സിപിഎം ആരോപിച്ചു.
