ഇടുക്കി : ജില്ലയില്‍ വീണ്ടും കാട്ടാനകളുടെ ആക്രമണം. ബി എൽ റാം മേഖലയിലാണ് കാട്ടാനകളുടെ അതിക്രമം ഉണ്ടായത്. വാഹനത്തിന് നേരെയും പെട്ടിക്കടയ്ക്ക് നേരെയുമായിരുന്നു ആക്രമണം. ആന റോഡിൽ നിലയുറപ്പിച്ചതിനെത്തുടർന്ന് മണിക്കൂറുകളോളം ഗതാഗതം തടസപ്പെടുകയും ചെയ്‌തു.
തോട്ടം തൊഴിലാളികളുമായി എത്തിയ വാഹനത്തിന് നേരെയാണ് ചക്കക്കൊമ്പന്‍റെ ആക്രമണം ഉണ്ടായത്. തൊഴിലാളികളെ ഇറക്കിയ ശേഷം വാഹനം റോഡരികിൽ നിർത്തിയിട്ടിരിയ്ക്കുകയായിരുന്നു. ആന മുൻ വശത്തെ ഗ്ലാസ് തകർത്തു. തുടര്‍ന്ന് റോഡിൽ നിലയുറപ്പിച്ചതോടെ ഗതാഗതം തടസപ്പെട്ടു.
ഇതിനിടെ ആനയെ കണ്ട് റോഡിലുണ്ടായിരുന്ന ജീപ്പ് പുറകോട്ട് എടുക്കുന്നതിനിടെ ഇടിച്ച് ബൈക്ക് യാത്രക്കാരന് പരിക്കേറ്റു. മൂന്ന് ആനകൾ മേഖലയിൽ തമ്പടിച്ചിട്ടുണ്ട്. അരിക്കൊമ്പന്‍റെ ആക്രമണത്തിലാണ് പെരിയകനാലിലെ പെട്ടിക്കടയ്ക്ക് നാശനഷ്‌ടങ്ങള്‍ ഉണ്ടായത്.
കടയുടെ തകര ഷീറ്റുകളും സമീപത്തെ ദിശ ബോർഡും അരിക്കൊമ്പന്‍ നശിപ്പിച്ചു. മുൻപ് അഞ്ച് തവണ സുബ്രഹ്മണ്യന്‍റെ കടയ്‌ക്ക് നേരെ ആനയുടെ ആക്രമണം ഉണ്ടായിട്ടുണ്ട്.
