ഇടുക്കി: നീലക്കുറിഞ്ഞി പൂവിട്ട കള്ളിപ്പാറയിലേക്ക് സഞ്ചാരികളുടെ പ്രവാഹം ആരംഭിച്ചതോടെ പ്രദേശത്ത് വൻതോതിൽ പ്ലാസ്റ്റിക് മാലിന്യങ്ങൾ നിറഞ്ഞു. വനപാലകരും സന്നദ്ധ സംഘടനകളും ചേർന്ന് അവ നീക്കം ചെയ്‌തു. ഇതോടെ പ്രദേശത്ത് പ്ലാസ്റ്റിക് കുപ്പികൾ കൊണ്ടുവരുന്നതിന് വനപാലകർ നിരോധനമേർപ്പെടുത്തി. ശാന്തൻപാറ കള്ളിപ്പാറ മലനിരകളിലെ നീലക്കുറിഞ്ഞി വസന്തം ഇനി ഏതാനും ദിവസങ്ങൾ മാത്രമാണുള്ളത്.
നിലവിൽ കള്ളിപ്പാറ മലനിരകളിലേക്ക്‌ സഞ്ചാരികളുടെ നിലയ്ക്കാത്ത പ്രവാഹമാണ്. നീലക്കുറിഞ്ഞി കാണാനെത്തുന്നവർ ഉപേക്ഷിച്ച പ്ലാസ്റ്റിക് മാലിന്യങ്ങൾ ഇവിടെ വലിയ പാരിസ്ഥിതിക പ്രശ്‌നങ്ങൾ സൃഷ്‌ടിച്ചിരുന്നു. കുറിഞ്ഞി മലയിലെത്തുന്നവർ ശുദ്ധജലവും ലഘുഭക്ഷണവും കൊണ്ടു വരുന്ന പ്ലാസ്റ്റിക് കുപ്പികളും കവറുകളും അലക്ഷ്യമായി വലിച്ചെറിഞ്ഞതോടെയാണ് കുറിഞ്ഞിമലയിൽ വൻ തോതിൽ പ്ലാസ്റ്റിക് മാലിന്യങ്ങൾ കുമിഞ്ഞുകൂടിയത്. കാലാവസ്ഥ അനുകൂലമാണെങ്കിൽ രണ്ടാഴ്‌ചകൂടി കള്ളിപ്പാറയിലെ കുറിഞ്ഞിവസന്തം കാണാൻ കഴിയും.
മൊട്ടു വിരിഞ്ഞു തുടങ്ങിയാൽ 30 ദിവസം വരെയാണു കുറിഞ്ഞി പൂക്കളുടെ വസന്തകാലം. ശക്തമായ മഴ പെയ്‌താൽ കുറിഞ്ഞി പൂക്കളുടെ ഭംഗി നഷ്‌ടപ്പെടും. ഇനി രണ്ടാഴ്‌ചയെങ്കിലും പൂക്കൾ കാണാൻ കഴിയുമെന്നാണു ടൂറിസം രംഗത്ത് പ്രവർത്തിക്കുന്നവർ പറയുന്നത്.
കഴിഞ്ഞ ആറിനാണ് കള്ളിപ്പാറ എൻജിനീയർ മേട്ടിൽ വ്യാപകമായി നീലക്കുറിഞ്ഞി പൂവിട്ട വിവരം നാട്ടുകാർ അറിഞ്ഞത്. തുടർന്ന് ഇവിടേക്ക് എത്തുന്ന സന്ദർശകരുടെ എണ്ണം ഓരോ ദിവസവും കൂടി വന്നു. ഇതുവരെ ഒരു ലക്ഷത്തോളം പേർ കുറിഞ്ഞി വസന്തം കണ്ട് മടങ്ങിയെന്നാണ് വിവരം.
കഴിഞ്ഞ ദിവസങ്ങളിൽ വലിയ തിരക്കാണ് അനുഭവപ്പെട്ടത്. മൂന്നാർ കുമളി സംസ്ഥാന പാതയിൽ നിന്നും രണ്ടു കിലോമീറ്റർ ദൂരം കയറ്റം കയറിയാൽ കള്ളിപ്പാറയിലെ കുറിഞ്ഞിപൂക്കൾക്കരികിലെത്താം.
