ഇടുക്കി: വെള്ളത്തൂവല്‍ ശല്യാംപാറ പണ്ടാരപ്പടിയില്‍ ഉരുള്‍പൊട്ടി. അര്‍ദ്ധരാത്രിയോടെയായിരുന്നു ഉരുള്‍പൊട്ടല്‍ ഉണ്ടായത്. ഉരുള്‍പൊട്ടലിനെ തുടര്‍ന്ന് രണ്ട് വീടുകള്‍ക്ക് നാശനഷ്‌ടം സംഭവിച്ചു.
വള്ളിമടത്തില്‍ പങ്കജാക്ഷി ബോസ്, വല്ലനാട്ട് രവി എന്നിവരുടെ വീടുകള്‍ക്കാണ് നാശനഷ്ടങ്ങള്‍ ഉണ്ടായത്. ഉരുള്‍പൊട്ടല്‍ സമയത്ത് വീടുകളില്‍ ആളുകള്‍ ഉണ്ടായിരുന്നു. മണ്ണും ചെളിയും ഒഴുകിയെത്തുന്ന ശബ്‌ദം കേട്ട് കുടുംബങ്ങള്‍ വീടുകളില്‍ നിന്നും മാറി അയല്‍വീടുകളില്‍ അഭയം പ്രാപിച്ചു.
രാത്രി പ്രദേശത്ത് നിര്‍ത്തിയിട്ടിരുന്ന ഇരുചക്രവാഹനങ്ങള്‍ മണ്ണിനിടയില്‍പ്പെട്ടു. കല്ലും മണ്ണും വന്നടിഞ്ഞതിനെ തുടര്‍ന്ന് കല്ലാര്‍കുട്ടി വെള്ളത്തൂവല്‍ റോഡില്‍ ഗതാഗതം നിലച്ചിരുന്നു. പിന്നീട് നാട്ടുകാരുടെ നേതൃത്വത്തില്‍ മണ്ണ് നീക്കി ഇതുവഴിയുള്ള ഗതാഗതം പുന:സ്ഥാപിച്ചു.
ഉരുള്‍പൊട്ടല്‍ ഉണ്ടായതിനെ തുടര്‍ന്ന് പ്രദേശത്ത് മറ്റ് വീടുകള്‍ മണ്ണിടിച്ചില്‍ ഭീഷണി നേരിടുന്നുണ്ട്. വെള്ളത്തൂവല്‍ സര്‍ക്കാര്‍ ഹൈസ്‌ക്കൂളില്‍ ക്യാമ്പ് തുറക്കുന്നതിനായി വേണ്ടുന്ന മുന്നൊരുക്കങ്ങള്‍ സ്വീകരിച്ചതായി ഗ്രാമപഞ്ചായത്ത് പ്രസിഡന്റ് മഞ്ചു ബിജു അറിയിച്ചു.
