ഇടുക്കി: ആദിവാസി മേഖലയായ കുറത്തിക്കുടിയില്‍ ചികിത്സാ സൗകര്യങ്ങളുടെ അഭാവം കോളനിവാസികളെ ബുദ്ധിമുട്ടിലാക്കുന്നതായി ആക്ഷേപം. മുതുവാന്‍ സമുദായക്കാര്‍ പാര്‍ക്കുന്ന അടിമാലി ഗ്രാമപഞ്ചായത്തിലെ ഒന്നാം വാര്‍ഡാണ് വനത്താല്‍ ചുറ്റപ്പെട്ട കുറത്തുകുടി. അടിമാലിയില്‍ നിന്നും നാല്‍പ്പത് കിലോമീറ്ററിലധികം സഞ്ചരിച്ച് വേണം ഇവിടെയെത്താൻ.
പ്രാഥമിക വിദ്യാഭ്യാസ സൗകര്യവും റേഷന്‍ സംവിധാനവും കോളനിയില്‍ ഒരുക്കിയിട്ടുണ്ടെങ്കിലും ചികിത്സാ സൗകര്യങ്ങളുടെ കുറവ് കോളനിയിലെ കുടുംബങ്ങളെ കഷ്ടത്തിലാക്കുകയാണ്. 340 കുടുംബങ്ങൾ താമസിച്ചിട്ടും കുറത്തിക്കുടിയില്‍ ചികിത്സാ കേന്ദ്രം ഇല്ലെന്നതാണ് വസ്തുത. പനി വന്നാല്‍ പോലും ചികിത്സ തേടണമെങ്കില്‍ കാനനപാത താണ്ടി മാങ്കുളത്തോ അടിമാലിയിലോ കോതമംഗലത്തോ എത്തണം. പുറം ലോകത്ത് നിന്നും വല്ലപ്പോഴും എത്തുന്ന ആരോഗ്യപ്രവര്‍ത്തകരുടെ സേവനമാണ് കുറത്തിക്കുടിക്കാരുടെ ആകെയുള്ള ചികിത്സാ സംവിധാനം.
അടിയന്തര സാഹചര്യത്തില്‍ കാട്ടുമൃങ്ങളുടെ ആക്രമണം ഭയന്ന് ദുര്‍ഘടപാത കടന്ന് വേണം കോളനി നിവാസികള്‍ക്ക് പുറം ലോകത്തെത്താന്‍. ഏറ്റവും അടുത്തുള്ള മാങ്കുളത്തെത്തണമെങ്കില്‍ പോലും കുറഞ്ഞത് 1000 രൂപ മുടക്കണം. ചെറിയ അസുഖങ്ങളാണെങ്കില്‍ ചിലവും യാത്രാക്ലേശവുമോര്‍ത്ത് തങ്ങള്‍ ചികിത്സ തേടി പോകാറില്ലെന്ന് ആദിവാസി കുടുംബങ്ങള്‍ പറയുന്നു. ആദിവാസി സങ്കേതത്തിന്റെ പ്രാധാന്യം കണക്കിലെടുത്ത് കുറത്തിക്കുടിക്കായി ചികിത്സാ സൗകര്യമൊരുക്കണമെന്നാണ് ഗോത്രകുടുംബങ്ങളുടെ ആവശ്യം.
