തിരുവനന്തപുരം : ഉത്തരേന്ത്യ തണുത്ത് വിറയ്ക്കുമ്പോള്‍ ഇങ്ങ് കേരളത്തില്‍ മൂന്നാറിലും സമീപ പ്രദേശങ്ങളിലും അതിശൈത്യമാണ് കഴിഞ്ഞ ദിവസങ്ങളില്‍ അനുഭവപ്പെട്ടത്. കഴിഞ്ഞ ദിവസത്തെ മൂന്നാറിലെ താപനില മൈനസ് 2 ഡിഗ്രിയാണ്.
അഞ്ച് വര്‍ഷത്തിനിടയിലെ ഏറ്റവും താഴ്ന്ന താപനിലയാണ് മൂന്നാറില്‍ രേഖപ്പെടുത്തിയിരിക്കുന്നത്. കഴിഞ്ഞ ഏതാനും ദിവസങ്ങളായി കൊടുംശൈത്യമാണ് മൂന്നാറിലും വട്ടവട മേഖലയിലും അനുഭവപ്പെടുന്നത്. പഴത്തോട്ടം, ചിലന്തിയാര്‍, കടവരി മേഖലകളിലും കടുത്ത തണുപ്പ് അനുഭവപ്പെടുന്നു.
ഇത് മൂന്നാറിലെ മാത്രം സ്ഥിതിയല്ല. സംസ്ഥാനത്താകെ തണുത്ത കാലാവസ്ഥയാണ്. മൈനസിലേക്കൊന്നും പോകുന്നില്ലെങ്കിലും പുലര്‍ച്ചെയുള്ള കാലാവസ്ഥ കഴിഞ്ഞ കുറച്ചുവര്‍ഷങ്ങളായി കേരളത്തിന് പരിചിതമല്ലാത്തതാണ്. സംസ്ഥാന വ്യാപകമായി രേഖപ്പെടുത്തിയ താഴ്ന്ന താപനില 21 ഡിഗ്രിക്കടുത്താണ്.
സംസ്ഥാനത്തെ ചിലയിടങ്ങളില്‍ ഉയര്‍ന്ന താപനില 35 ഡിഗ്രിവരെ എത്തുന്നുണ്ട്. കടുത്ത ചൂട് അനുഭവപ്പെട്ടിരുന്ന പുനലൂര്‍,പാലക്കാട് തുടങ്ങിയ ഇടങ്ങളിലും ഇത് തന്നെയാണ് സ്ഥിതി. പുനലൂരില്‍ 16 ഡിഗ്രി സെല്‍ഷ്യസാണ് താഴ്ന്ന താപനില.
| ഇന്നത്തെ രാവിലെയുള്ള താപനില | |
| തിരുവനന്തപുരം | 20.8 ഡിഗ്രി സെല്‍ഷ്യസ് |
| കൊല്ലം | 21.2ഡിഗ്രി സെല്‍ഷ്യസ് |
| പത്തനംതിട്ട | 18.3ഡിഗ്രി സെല്‍ഷ്യസ് |
| ആലപ്പുഴ | 24.4ഡിഗ്രി സെല്‍ഷ്യസ് |
| കോട്ടയം | 21.7ഡിഗ്രി സെല്‍ഷ്യസ് |
| ഇടുക്കി | 14.6ഡിഗ്രി സെല്‍ഷ്യസ് |
| എറണാകുളം | 23.6ഡിഗ്രി സെല്‍ഷ്യസ് |
| തൃശ്ശൂര്‍ | 20.1ഡിഗ്രി സെല്‍ഷ്യസ് |
| പാലക്കാട് | 18.7ഡിഗ്രി സെല്‍ഷ്യസ് |
| മലപ്പുറം | 22.0ഡിഗ്രി സെല്‍ഷ്യസ് |
| കോഴിക്കോട് | 24.8ഡിഗ്രി സെല്‍ഷ്യസ് |
| വയനാട് | 13.3ഡിഗ്രി സെല്‍ഷ്യസ് |
| കണ്ണൂര്‍ | 22.0ഡിഗ്രി സെല്‍ഷ്യസ് |
| കാസര്‍കോട് | 19.4ഡിഗ്രി സെല്‍ഷ്യസ് |
ഇന്ന് മാത്രമല്ല കഴിഞ്ഞ ഒരാഴ്‌ചത്തെ കണക്കുകള്‍ പരിശോധിച്ചാലും സംസ്ഥാനത്തെ താപനില ഇത്തരത്തില്‍ തന്നെയാണ്. എന്നാല്‍ രാവിലെയുള്ള തണുത്ത കാലാവസ്ഥയില്‍ ഉച്ചയോടെ സംസ്ഥാനത്ത് മാറ്റം വരുന്നുണ്ട്.
| ഇന്ന് പ്രതീക്ഷിക്കുന്ന ഉയര്‍ന്ന താപനില | |
| തിരുവനന്തപുരം | 32.3 ഡിഗ്രി സെല്‍ഷ്യസ് |
| കൊല്ലം | 33.4ഡിഗ്രി സെല്‍ഷ്യസ് |
| പത്തനംതിട്ട | 34.8ഡിഗ്രി സെല്‍ഷ്യസ് |
| ആലപ്പുഴ | 35.7ഡിഗ്രി സെല്‍ഷ്യസ് |
| കോട്ടയം | 34.1ഡിഗ്രി സെല്‍ഷ്യസ് |
| ഇടുക്കി | 25.8ഡിഗ്രി സെല്‍ഷ്യസ് |
| എറണാകുളം | 31.4ഡിഗ്രി സെല്‍ഷ്യസ് |
| തൃശ്ശൂര്‍ | 32.2ഡിഗ്രി സെല്‍ഷ്യസ് |
| പാലക്കാട് | 34.2ഡിഗ്രി സെല്‍ഷ്യസ് |
| മലപ്പുറം | 33.1ഡിഗ്രി സെല്‍ഷ്യസ് |
| കോഴിക്കോട് | 35.5ഡിഗ്രി സെല്‍ഷ്യസ് |
| വയനാട് | 29.8ഡിഗ്രി സെല്‍ഷ്യസ് |
| കണ്ണൂര്‍ | 34.2ഡിഗ്രി സെല്‍ഷ്യസ് |
| കാസര്‍കോട് | 33.4ഡിഗ്രി സെല്‍ഷ്യസ് |
രാവിലെ അനുഭവപ്പെടുന്ന തണുപ്പില്‍ നിന്നും ഉച്ചയോടെ കടുത്ത ചൂടിലേക്ക് സംസ്ഥാനം എത്തുമെന്നാണ് കാലാവസ്ഥ നിരീക്ഷണ കേന്ദ്രം നല്‍കുന്ന വിവരം.
