ഇടുക്കി: അടിമാലി ഈസ്റ്റേണ്‍ സ്‌കൂളിന് സമീപം മണല്‍പ്പടിയില്‍ പണികഴിപ്പിക്കുന്ന പാലത്തിന്റെ നിര്‍മാണം പൂര്‍ത്തീകരിക്കാത്തത് ഏറെ ബുദ്ധിമുട്ട് സൃഷ്ടിക്കുന്നതായി പ്രദേശവാസികള്‍. പാലത്തിന്റെ പണി പൂർത്തിയാക്കി വിദ്യാര്‍ത്ഥികള്‍ അടക്കമുള്ളവരുടെ യാത്രക്ലേശത്തിന് പരിഹാരം കാണണമെന്നാണ് നാട്ടുകാർ ആവശ്യപ്പെടുന്നത്.
കൊച്ചി ധനുഷ്‌ക്കോടി ദേശീയപാതയേയും ഇരുന്നൂറേക്കര്‍ മെഴുകുംചാല്‍ റോഡിനേയും തമ്മില്‍ ബന്ധിക്കാനായി നിർമിച്ച പാലമാണിത്.അടിമാലി ഗ്രാമപഞ്ചായത്തിലെ 16-ാം വാര്‍ഡുള്‍പ്പെട്ട പ്രദേശത്ത് നിന്നും ആളുകള്‍ക്ക് എളുപ്പത്തില്‍ കൊച്ചി ധനുഷ്‌ക്കോടി ദേശീയപാതയില്‍ എത്തിച്ചേരാൻ വേണ്ടിയാണ് പുതിയ പാലത്തിന്റെ നിര്‍മ്മാണം ആരംഭിച്ചത്.
പകുതി പൂർത്തിയായ പാലത്തിന് മുകളിൽ ഗോവണി നിര്‍മ്മിച്ച് അതിലൂടെയാണ് നാട്ടുകാരുടെ ഇപ്പോഴത്തെ യാത്ര. കഴിഞ്ഞ ദിവസം പാലത്തിന് മുകളില്‍ നിന്നും കാല്‍വഴുതി വീണ് യുവാവിന് ഗുരുതര പരിക്കേറ്റിരുന്നു .
