എറണാകുളം: ബലാത്സംഗ കേസിന് പിന്നാലെ വിജയ് ബാബുവിനെതിരെ ഒരു കേസ് കൂടി പൊലീസ് രജിസ്റ്റർ ചെയ്യും. പരാതിക്കാരിയുടെ പേര് വെളിപ്പെടുത്തിയതിനാണ് പുതിയ കേസ്. അതേസമയം ബലാത്സംഗ ആരോപണം നിഷേധിച്ച് നടന്‍ വിജയ് ബാബു രംഗത്തെത്തി.
പരാതിക്കാരിക്കെതിരെ മാനനഷ്‌ടത്തിന് കേസ് നല്‍കുമെന്ന് വിജയ് ബാബു സമൂഹ മാധ്യമത്തിലൂടെ പ്രതികരിച്ചു. ആരോപണങ്ങള്‍ കള്ളമെന്ന് തെളിയിക്കുന്ന രേഖകൾ തന്‍റെ കൈവശമുണ്ടെന്നും നടൻ പറഞ്ഞു.സിനിമയില്‍ കൂടുതല്‍ അവസരങ്ങള്‍ വാഗ്‌ദാനം ചെയ്‌ത് വിജയ് ബാബു തന്നെ ബലാല്‍സംഗം ചെയ്‌തുവെന്നാരോപിച്ച് കോഴിക്കോട് സ്വദേശിനിയായ യുവതി നൽകിയ പരാതിയില്‍ എറണാകുളം സൗത്ത് പൊലീസ് കഴിഞ്ഞ ദിവസം കേസെടുത്തിരുന്നു.
ഇതിന് പിന്നാലെയാണ് ആരോപണങ്ങൾ നിഷേധിച്ച് വിജയ് ബാബു രംഗത്തെത്തിയത്. താനാണ് യഥാർഥ ഇര എന്നായിരുന്നു വിജയ് ബാബുവിന്‍റെ പ്രതികരണം. തനിയ്ക്കെതിരെ തെറ്റായ ആരോപണം ഉന്നയിച്ചതിന് പരാതിക്കാരിക്കെതിരെ മാന നഷ്‌ടത്തിന് കേസ് നൽകുമെന്നും വിജയ് ബാബു അറിയിച്ചു. ഇക്കഴിഞ്ഞ ശനിയാഴ്‌ചയാണ് വിജയ് ബാബുവിനെതിരെ കോഴിക്കോട് സ്വദേശിനി പരാതി നൽകിയത്.
സിനിമയിൽ അവസരം വാഗ്‌ദാനം ചെയ്‌ത് കൊച്ചിയിലെ ഫ്ലാറ്റിൽ വെച്ച് പല തവണ പീഡിപ്പിച്ചു എന്ന പരാതിയെത്തുടർന്ന് ബലാൽസംഗം, ഗുരുതരമായി പരുക്കേൽപ്പിക്കൽ തുടങ്ങിയ വകുപ്പുകൾ പ്രകാരമാണ് വിജയ് ബാബുവിനെതിരെ കേസെടുത്തത്.
