മരട് : ആശങ്കയകറ്റാൻ ഇന്ന് സബ്‌ കലക്‌ടറുടെ വിശദീകരണ യോഗം

ഇന്ന് വൈകുന്നേരം മൂന്ന് മണിക്ക് ഹോളി ഫെയ്ത്തിന് സമീപത്ത് താമസിക്കുന്നവരുടെ യോഗവും വൈകുന്നേരം അഞ്ച് മണിക്ക് ഗോൾഡൻ കായലോരത്തിന് സമീപമുള്ളവരുടെ യോഗവും ചേരും. നാളെ ആൽഫ , ജെയിൻ ഫ്ലാറ്റുകളുടെ പരിസരവാസികളുടെ യോഗവും ചേരും.

എറണാകുളം: മരടിലെ ഫ്ലാറ്റ് പൊളിക്കലുമായി ബന്ധപ്പെട്ട് പരിസര വാസികളുടെ ആശങ്കയകറ്റാൻ ഇന്ന് വിശദീകരണ യോഗം ചേരും. മരട് നഗരസഭ സെക്രട്ടറിയുടെ ചുമതലകൂടി വഹിക്കുന്ന സബ് കലക്‌ടര്‍ സ്നേഹിൽകുമാർ പങ്കെടുക്കും. ഫ്ലാറ്റുകൾ പൊളിക്കുമ്പോള്‍ സമീപ പ്രദേശങ്ങളെ ഏതു രീതിയിൽ ബാധിക്കുമെന്നതിനെ കുറിച്ച് അദ്ദേഹം വിശദീകരണം നല്‍കും. പരിസരവാസികളുടെ സംശയങ്ങൾക്കും സബ് കലക്‌ടര്‍ മറുപടി നൽകും. ഫ്ലാറ്റ് പൊളിക്കുമ്പോള്‍ ആറുമണിക്കൂർ സമയത്തേക്ക് മാത്രം ഇരുന്നൂറ് മീറ്റർ ചുറ്റളവിലുള്ളവരെ മാറ്റിപാർപ്പിക്കാനാണ് തീരുമാനം. ഫ്ലാറ്റ് പൊളിക്കുന്നതിന് ഇൻഷുറൻസ് പരിരക്ഷയും ഏർപ്പെടുത്തി. ഫ്ലാറ്റ് പൊളിക്കുന്ന കമ്പനികളും അമ്പത് അടി ചുറ്റളവിലുള്ളവരെ മാത്രം മാറ്റി പാര്‍പ്പിച്ചാല്‍ മതിയെന്ന് അറിയിച്ചിട്ടുണ്ട്. അതേസമയം പൊളിക്കുന്നതിനായി തെരെഞ്ഞടുത്ത കമ്പനികൾക്ക് ഫ്ലാറ്റുകൾ കൈമാറുന്നത് വൈകിയേക്കും. കമ്പനികളെ തെരെഞ്ഞടുത്തത് മരട് നഗരസഭാ കൗൺസിൽ അംഗീകരിച്ചിരുന്നില്ല. വിഷയം ചർച്ച ചെയ്യാൻ വീണ്ടും കൗൺസിൽ ചേരാനാണ് നഗരസഭയുടെ തീരുമാനം.