എറണാകുളം : ലൈഫ് മിഷൻ കോഴക്കേസിൽ മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സി എം രവീന്ദ്രന്‍ ഇഡിക്ക് മുന്‍പില്‍ ചോദ്യം ചെയ്യലിന് ഹാജരായി. ചൊവ്വാഴ്‌ച രാവിലെ കൊച്ചി ഇ ഡി ഓഫിസിൽ ഹാജരാകണമെന്ന് ആവശ്യപ്പെട്ട് ഇ ഡി സമൻസ് അയച്ചിരുന്നു. നേരത്തെ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് നോട്ടിസ് നൽകിയിരുന്നുവെങ്കിലും എത്തിയിരുന്നില്ല.
നിയമസഭ നടക്കുന്നതിനാൽ പങ്കെടുക്കാൻ അസൗകര്യമുണ്ടെന്ന് ഇ ഡിയെ അറിയിക്കുകയായിരുന്നു. ഇതേ തുടർന്നാണ് രണ്ടാമതും നോട്ടിസ് നൽകിയത്. കോഴക്കേസിലെ മറ്റ് പ്രതികളായ സ്വപ്‌നയും, സരിത്തും നൽകിയ മൊഴിയുടെയും, ഡിജിറ്റൽ തെളിവുകളുടെയും അടിസ്ഥാനത്തിലാണ് സി എം രവീന്ദ്രനിലേക്ക് കൂടി അന്വേഷണമെത്തിയത്.
സി എം രവീന്ദ്രനും സ്വപ്‌ന സുരേഷും തമ്മിലുള്ള ചാറ്റ് വിവരങ്ങൾ ഇ ഡി പരിശോധിച്ചിരുന്നു. മുൻ പ്രിൻസിപ്പൽ സെക്രട്ടറിയും ലൈഫ് മിഷൻ കോഴക്കേസിൽ പ്രതിയുമായ എം ശിവശങ്കർ സ്വപ്‌നയുമായി നടത്തിയ വാട്ട്സാപ്പ് ചാറ്റിൽ സി എം രവീന്ദ്രനെ കുറിച്ച് പരാമർശിച്ചിരുന്നു. ലൈഫ് മിഷൻ പദ്ധതിയിലേക്ക് റെഡ് ക്രസന്‍റിനെ പങ്കാളിയാക്കണമെന്ന് ആവശ്യപ്പെട്ട് നടത്തിയ ചാറ്റിൽ രവീന്ദ്രനെ വിളിക്കാമെന്ന് ശിവശങ്കർ സ്വപ്‌നയോട് പറയുന്നുണ്ട്.
ഇത്, കാര്യങ്ങളെല്ലാം സി എം രവീന്ദ്രനും അറിയാമെന്ന നിഗമനത്തിൽ ഇ ഡിയെ എത്തിച്ചു. ഇതോടെ അന്വേഷണം മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറിയിലേക്ക് കൂടി വ്യാപിപ്പിക്കുകയായിരുന്നു എൻഫോഴ്സ്മെന്‍റ് വിഭാഗം. സ്വപ്‌നയുമായി സംസ്ഥാനത്തിന് പ്രളയ സഹായം ആവശ്യപ്പെട്ടുള്ള ചാറ്റുകളും വ്യക്തിപരമായ ചാറ്റുകളുമാണ് രവീന്ദ്രൻ നടത്തിയിട്ടുള്ളത്.
ഈ സാഹചര്യത്തിലാണ് സി എം രവീന്ദ്രനെ വീണ്ടും വിളിച്ചുവരുത്തി വ്യക്തത തേടാൻ ഇ ഡി തീരുമാനിച്ചത്. ലൈഫ് മിഷൻ സി ഇ ഒ യു.വി ജോസിനെയും ഇ ഡി ചോദ്യം ചെയ്‌തിരുന്നു. മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കറിനെ മൂന്ന് ദിവസത്തെ ചോദ്യം ചെയ്യലിനൊടുവില്‍ ഫെബ്രുവരി 14ന് അറസ്റ്റും ചെയ്‌തു.
ലൈഫ് മിഷന്‍ കേസിലെ ആദ്യ അറസ്റ്റ് ഇതായിരുന്നു. എന്നാല്‍, കേസ് തനിക്കെതിരെ കെട്ടിച്ചമച്ചതാണെന്നാണ് ശിവശങ്കർ വാദിക്കുന്നത്.
കോഴ ഇടപാട് കേസ് : സംസ്ഥാന സർക്കാരിന്‍റെ ലൈഫ് മിഷൻ പദ്ധതിയുമായി ബന്ധപ്പെട്ടാണ് കോഴ ഇടപാട് കേസ് രജിസ്റ്റർ ചെയ്‌തിരിക്കുന്നത്. തൃശൂർ വടക്കാഞ്ചേരിയിലെ 140 കുടുംബങ്ങൾക്ക് വീട് നിർമിച്ച് നൽകുന്നതാണ് പദ്ധതി. യുഎഇ കോൺസുലേറ്റ് വഴി റെഡ് ക്രസന്‍റ് അനുവദിച്ച പണം ചെലവഴിച്ചാണ് പാര്‍പ്പിടസമുച്ചയം നിര്‍മിക്കുന്നത്.
പദ്ധതിയുടെ കരാര്‍ ലഭിക്കാനായി പ്രതികൾക്ക് കൈക്കൂലി നല്‍കിയതായി യൂണിടാക് മാനേജിങ് ഡയറക്‌ടർ സന്തോഷ് ഈപ്പൻ മൊഴി നല്‍കിയിരുന്നു. ശിവശങ്കര്‍ കോഴപ്പണം കൈപ്പറ്റി എന്നും കേസില്‍ ശിവശങ്കറിന് പങ്കുണ്ടെന്നും പ്രതികളായ സ്വപ്‌നയും സരിത്തും മൊഴി നല്‍കി. ലോക്കറിൽ നിന്ന് പിടികൂടിയ ഒരു കോടി രൂപ ശിവശങ്കറിന് ലഭിച്ച കോഴപ്പണം ആയിരുന്നു എന്നാണ് സ്വപ്‌നയുടെ ആരോപണം.
ഇതിന്‍റെ അടിസ്ഥാനത്തിലാണ് ലൈഫ് മിഷൻ കേസിൽ എം ശിവശങ്കറിനെ പ്രതിയാക്കി ഇ ഡി അറസ്റ്റ് ചെയ്‌തത്. 2020ലും സിഎം രവീന്ദ്രനെ ഇ ഡി ചോദ്യം ചെയ്‌തിരുന്നു. ചോദ്യം ചെയ്യലിൽ രവീന്ദ്രന്‍ ഹാജരാക്കിയ സ്വത്തിന്‍റെ കണക്കുകളില്‍ ഇ ഡി സംശയം പ്രകടിപ്പിച്ചിരുന്നു.
മണിക്കൂറുകളോളമാണ് ഇ ഡി രവീന്ദ്രനെ അന്ന് ചോദ്യം ചെയ്‌തത്. ഇത് മുഖ്യമന്ത്രിയുടെ ഓഫിസിനെ സംശയത്തിന്‍റെ നിഴലിൽ നിർത്തിയുള്ള പ്രതിപക്ഷ പ്രചാരണത്തിനും ഇടയാക്കിയിരുന്നു. ഒരിക്കൽ കൂടി സി എം രവീന്ദ്രനിലേക്ക് ഇ ഡിയുടെ അന്വേഷണമെത്തുമ്പോൾ മുഖ്യമന്ത്രിയെ ഉൾപ്പടെ പ്രതിക്കൂട്ടിലാക്കിയുള്ള വിമർശനങ്ങൾ പ്രതിപക്ഷം ശക്തമാക്കുകയാണ്.
