എറണാകുളം: അന്തരിച്ച കോൺഗ്രസ് നേതാവും എംഎല്‍എയുമായ പി.ടി തോമസിന്‍റെ സംസ്‌കാരം (PT Thomas funeral ceremony) ഇന്ന്. മൃതദേഹം പൂർണ ഔദ്യോഗിക ബഹുമതികളോടെ കൊച്ചി രവിപുരം പൊതു ശ്‌മശാനത്തിൽ സംസ്‌കരിക്കും. വൈകുന്നേരം അഞ്ചര മണിയോടെയാണ് സംസ്‌കാര ചടങ്ങുകൾ നിശ്ചയിച്ചത്.
പുലർച്ചെ 6.30 ഓടെ കൊച്ചിയിലെത്തിക്കാനായിരുന്നു നിശ്ചയിച്ചിരുന്നത്. എന്നാൽ രാവിലെ പത്ത് മണിക്ക് ശേഷം മാത്രമായിരിക്കും ഇടുക്കിയിലെ പൊതു ദർശനങ്ങൾ കഴിഞ്ഞ് മൃതദേഹം എത്തിക്കുക. കൊച്ചിയിൽ പാലാരിവട്ടത്തെ പി.ടിയുടെ വീട്ടിലാണ് ആദ്യം മൃതദേഹം എത്തിക്കുന്നത്.
തുടർന്ന് എറണാകുളം ടൗൺഹാളിൽ പൊതു ദർശനത്തിന് വെക്കും. രാഹുൽ ഗാന്ധി ഉൾപ്പടെയുള്ള നേതാക്കള്‍ ഇവിടെയെത്തിയാവും പി.ടിക്ക് അന്തിമോപചാരം അർപ്പിക്കുക. മരണാന്തരം മതപരമായ ചടങ്ങുകൾ വേണ്ടെന്ന് പി.ടി തോമസ് തീരുമാനിക്കുകയും ഏറ്റവും അടുത്ത സുഹൃത്തുക്കളോട് ഇത് അറിയിക്കുകയും ചെയ്തിരുന്നു.
ഭക്തിഗാനങ്ങൾക്ക് പകരം പി.ടിയുടെ ആഗ്രഹ പ്രകാരം എറണാകുളം ടൗൺഹാളിൽ 'ചന്ദ്രകളഭം ചാർത്തിയുറങ്ങും' എന്ന് തുടങ്ങുന്ന സിനിമാഗാനം ചെറിയ ശബ്ദത്തിൽ പൊതു ദർശന സമയത്ത് മുഴങ്ങും.
പി.ടി.തോമസിന്‍റെ തട്ടകമായ കൊച്ചിയിൽ രാഷ്ട്രീയ രംഗത്തെ പ്രമുഖർ അദ്ദേഹത്തിന് അന്തിമോപചാരമർപ്പിക്കും.
also read: PT Thomas: പിന്നിട്ടത് കനല്‍ വഴികള്‍; വിട്ടുവീഴ്‌ചയില്ലാത്തത് ആദര്‍ശത്തില്‍
ശേക്ഷം തൃക്കാക്കര കമ്യൂണിറ്റി ഹാളിൽ പൊതു ദർശനത്തിന് വെക്കും. തങ്ങളുടെ സ്വന്തം എം.എൽ.എക്ക് തൃക്കാക്കരയിലെ ജനാവലി യാത്രയയപ്പ് നൽകും. പി.ടി.യുടെ ആഗ്രഹമനുസരിച്ച് മൃതദേഹം രവിപുരം ശ്‌മശാനത്തിൽ സംസ്‌കരിക്കും.
ചിതാഭസ്‌മം ഇടുക്കി ഉപ്പുതോടുള്ള അമ്മയുടെ കല്ലറയിൽ അടക്കം ചെയ്യും. പി.ടിയുടെ കുടുംബവുമായി ചർച്ച ചെയ്താണ് കോൺഗ്രസ് നേതാക്കൾ സംസ്ക്കാര ചടങ്ങുകളിൽ അന്തിമ തീരുമാനമെടുത്തത്.
