എറണാകുളം : ബ്യൂട്ടിപാർലർ വെടിവയ്പ്പ് കേസിൽ നടി ലീന മരിയ പോളിന്‍റെ മൊഴിയെടുത്തു. തന്നെ ഫോൺ വിളിച്ച് ഭീഷണിപ്പെടുത്തിയത് രവി പൂജാരി തന്നെയെന്ന് നടി തിരിച്ചറിഞ്ഞു. കസ്റ്റഡി കാലാവധി പൂർത്തിയാവുന്ന നാളെ രവി പൂജാരിയെ കൊച്ചി എ.സി.ജെ.എം കോടതിയിൽ ഹാജരാക്കും. അന്വേഷണത്തിൽ ഇതുവരെ ലഭിച്ച വിവരങ്ങൾ ഉൾപ്പെടുത്തി വിചാരണ കോടതിയിൽ നാളെ റിപ്പോർട്ട് സമർപ്പിക്കും.
നേരത്തെ മൊഴിയെടുക്കാൻ ബ്യൂട്ടിപാർലർ ഉടമ ലീന മരിയയ്ക്ക് നോട്ടിസ് നൽകിയിരുന്നെങ്കിലും നേരിട്ട് ഹാജരാകാൻ അസൗകര്യം അറിയിക്കുകയായിരുന്നു. ഇതേതുടർന്ന്, ഓൺലൈനായാണ് മൊഴിയെടുത്തത്. ഒരു മണിക്കൂറോളമാണ് മൊഴിയെടുക്കൽ നീണ്ടത്. രവി പൂജാരിയുടെ ശബ്ദരേഖ നടിയെ കേൾപ്പിക്കുകയും അവർ തിരിച്ചറിയുകയും ചെയ്തു. പണം ആവശ്യപ്പെട്ട് തന്നെ വിളിച്ചത് ഇയാൾ തന്നെയാണെന്ന് ലീന മരിയ മൊഴി നൽകി.
ALSO READ: കുഴല്‍പ്പണ കേസ് : മുഖ്യമന്ത്രി ബിജെപിയെക്കുറിച്ച് പറയാഞ്ഞത് അത്ഭുതപ്പെടുത്തിയെന്ന് വി.ഡി സതീശന്‍
കേസിൽ നിര്‍ണായകമാണ് ഈ മൊഴി. രവി പൂജാരിയെ സഹായിച്ച പെരുമ്പാവൂരിലെയും കാസർകോട്ടെയും ക്വട്ടേഷൻ സംഘത്തെ കുറിച്ച് ക്രൈംബ്രാഞ്ചിന് വിവരം ലഭിച്ചിട്ടുണ്ട്. ഇവരെ ഉടനെ കസ്റ്റഡിയിലെടുക്കും. പരപ്പന അഗ്രഹാര ജയിലിൽ കഴിയുന്ന രവി പൂജാരിയെ ക്രൈംബ്രാഞ്ച് അപേക്ഷ പരിഗണിച്ച് എ.സി.ജെ.എം കോടതി എട്ട് ദിവസത്തെ കസ്റ്റഡിയിൽ വിട്ടിരുന്നു. ഇതേ തുടർന്നാണ് പ്രതിയെ കൊച്ചിയിലെത്തിച്ചത്.
