തിരുവനന്തപുരം: നെയ്യാറ്റിൻകരയിൽ ജപ്തി ഭീഷണിയെ തുടർന്ന് അമ്മയും മകളും ആത്മഹത്യക്ക് ശ്രമിച്ച സംഭവത്തിൽ റവന്യു മന്ത്രി ഇ ചന്ദ്രശേഖരൻ റിപ്പോർട്ട് തേടി. ജില്ലാ കലക്ടറോടാണ് മന്ത്രി റിപ്പോർട്ട് തേടിയത്. ജപ്തി നടപടികള്‍ക്ക് റവന്യൂ ഉദ്യോഗസ്ഥര്‍ പോയിട്ടില്ലെന്ന് തഹസില്‍ദാര്‍ വ്യക്തമാക്കി.
ഇന്ന് വൈകിട്ട് മൂന്നു മണിയോടെയാണ് നെയ്യാറ്റിന്‍കര മാരായമുട്ടത്ത് അമ്മയും മകളും തീകൊളുത്തി ആത്മഹത്യയ്ക്ക് ശ്രമിച്ചത്. സംഭവത്തിൽ 19 വയസ്സുള്ള മകൾ വൈഷ്ണവി മരിക്കുകയും അമ്മ ലേഖ 90 ശതമാനത്തിൽ അധികം പൊള്ളലോടെ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലുമാണ്.
കുടുംബത്തിനെതിരായ ബാങ്ക് നടപടി ന്യായീകരിക്കാൻ ആകാത്തതാണെന്ന് ധനമന്ത്രി തോമസ് ഐസക് പ്രതികരിച്ചു. വീട്ടുകാർക്ക് നഷ്ടപരിഹാരം നൽകാൻ ബാങ്ക് തയ്യാറാകണം. കിടപ്പാടം ജപ്തി ചെയ്യരുതെന്ന സർക്കാർ നയം ബാങ്കേഴ്സ് സമിതിയിൽ ഉന്നയിക്കുമെന്നും തോമസ് ഐസക് പറഞ്ഞു.
നെയ്യാറ്റിൻകരയിലെ കാനറ ബാങ്ക് ഉദ്യോഗസ്ഥർക്കെതിരെ ക്രിമിനൽ കേസ് എടുക്കണമെന്ന ആവശ്യവുമായി ഡിവൈഎഫ്ഐയും രംഗത്തെത്തിയിട്ടുണ്ട്. ബാങ്ക് ഉദ്യോഗസ്ഥര്‍ ആരാച്ചാര്‍മാരെ പോലെ പെരുമാറിയാല്‍ നോക്കി നില്‍ക്കാനാകില്ലെന്ന് ഡിവൈഎഫ്ഐ സംസ്ഥാന സെക്രട്ടറി എ എ റഹീം പറഞ്ഞു.
അതേസമയം വീട്ടുടമ ഒത്തുതീര്‍പ്പ് വേണമെന്ന് ആവശ്യപ്പെട്ടിരുന്നു. സമയം നീട്ടി നൽകാൻ കുടുംബം ആവശ്യപ്പെട്ടതിനെ തുടർന്ന് സമയം നീട്ടി നൽകിയിരുന്നു. അതിന്‍റെ കാലാവധി നാളെ അവസാനിക്കാനിരിക്കെയാണ് ജപ്തി നടപടികളുമായി മുന്നോട്ട് പോകാൻ തീരുമാനിച്ചതെന്ന് ബാങ്ക് അധികൃതർ പ്രതികരിച്ചു.
സംഭവത്തിൽ പ്രതിഷേധവുമായി നാട്ടുകാരും രംഗത്തെത്തിയിട്ടുണ്ട്. ബാങ്ക് മാനേജറെ അറസ്റ്റ് ചെയ്യും വരെ റോഡ് ഉപരോധിക്കുമെന്ന് നാട്ടുകാർ പറഞ്ഞു. മാനേജര്‍ക്കെതിരെ കേസെടുക്കുമെന്നും ഉടന്‍ അറസ്റ്റ് ചെയ്യാന്‍ സാധിക്കില്ലെന്നും പൊലീസ് വ്യക്തമാക്കി.
