ആലപ്പുഴ: കുട്ടനാട്ടിലെ ജലനിരപ്പുയർന്നത് മൂലമുണ്ടായ മടവീഴ്ച്ച ആലപ്പുഴ - കോട്ടയം ജില്ലകളെ ബന്ധിപ്പിക്കുന്ന പ്രധാന പാതയായ എസി റോഡിലൂടെയുള്ള ഗതാഗതത്തെ ബാധിച്ചു. പാടശേഖരത്തിലേയും കായലുകളിലെയും വെള്ളം ഒഴുകി റോഡിൽ എത്തിയതോടെ ഇതുവഴിയുള്ള ഗതാഗതം പൂർണ്ണമായും സ്തംഭിച്ചു.
വെള്ളപ്പൊക്കം: എസി റോഡിൽ ഗതാഗത നിയന്ത്രണം
എസി റോഡിൽ പലയിടത്തും മൂന്നടിയോളം വെള്ളമുയർന്നിട്ടുണ്ട്. ഇതോടെ ടോറസ് വാഹനങ്ങളും ട്രാക്ക്ട്ടറുകളും മാത്രമാണ് ഇതുവഴി സർവീസ് നടത്തുന്നത്. ചിലയിടങ്ങളിൽ ഒറ്റപ്പെട്ടുപോയവർക്ക് ചെറുവള്ളങ്ങൾ മാത്രമാണ് ഏക ആശ്രയം. ആലപ്പുഴയ്ക്കും ചങ്ങനാശ്ശേരിയ്ക്കും ഇടയിൽ യാത്ര ചെയ്യുന്നവരുടെ വാഹങ്ങൾ അമ്പലപ്പുഴ-തിരുവല്ല റോഡിലൂടെയും, തണ്ണീർമുക്കം-കുമരകം റോഡിലൂടെയുമാണ് ഇപ്പോൾ തിരിച്ചു വിടുന്നത്.
