ആലപ്പുഴ: വെള്ളക്കെട്ടിൽ അകപ്പെട്ട കൈകുഞ്ഞിനും അമ്മയ്ക്കും വൈദ്യ സഹായമെത്തിച്ച് 108 ആംബുലൻസും പൊലീസും. 17 ദിവസം മാത്രം പ്രായമായ ആൺകുഞ്ഞും അമ്മ രാമങ്കരി നൂറ്റിപത്താം കോളനിയിലെ സിമിക്കുമാണ് സഹായം ലഭിച്ചത്. ദേഹാസ്വാസ്ഥ്യത്തെ തുടര്‍ന്ന് സിമിയെ ആശുപത്രിയിലേക്ക് കൊണ്ടുപോകാന്‍ ശ്രമിച്ചപ്പോള്‍ വെള്ളക്കെട്ട് വില്ലനാവുകയായിരുന്നു.
വാഹനത്തിന്‍റെ നാലുവശത്തും വെള്ളം കയറിയതിനെ തുടർന്ന് പ്രതിസന്ധിയിലായ സിമിക്കും കുഞ്ഞിനും സഹായവുമായി രാമങ്കരി പൊലീസ് എത്തി. ഇരുവരേയും എസ്‌ഐ കെ ബി ആനന്ദബാബു, സിപിഒ ജോൺസൺ എന്നിവർ ചേർന്ന് പൊലീസ് വാഹനത്തിൽ മങ്കൊമ്പ് ഒന്നാംകരയിൽ എത്തിച്ചു. സിമിയുടെ അച്ഛന്‍റെ ആവശ്യപ്രകാരം ആലപ്പുഴയിൽ നിന്നെത്തിയ 108 ആംബുലൻസിന് മങ്കൊമ്പ് ഒന്നാംകര വരെ എത്താനെ കഴിഞ്ഞുള്ളു. പിന്നീട് പൊലീസ് എത്തിച്ച കുഞ്ഞിനേയും അമ്മയേയും വണ്ടാനം മെഡിക്കൽ കോളജ് ആശുപത്രിയിലേക്ക് 108 ആംബുലൻസില്‍ കൊണ്ടുപോവുകയായിരുന്നു.
