സിൽഹെറ്റ്: വനിത ഏഷ്യ കപ്പ് ടി20 ക്രിക്കറ്റില്‍ ഇന്ത്യയ്‌ക്ക് പാകിസ്ഥാനോട് ഞെട്ടിപ്പിക്കുന്ന തോല്‍വി. മൂന്ന് തുടര്‍വിജയങ്ങള്‍ക്ക് ശേഷം പാകിസ്ഥാനെതിരെ കളിക്കാനിറങ്ങിയ ഇന്ത്യ 13 റണ്‍സിനാണ് വീണത്. ആദ്യം ബാറ്റ് ചെയ്‌ത പാക് വനിതകള്‍ 138 റണ്‍സിന്‍റെ വിജയ ലക്ഷ്യമാണ് ഉയര്‍ത്തിയത്.
മറുപടിക്കിറങ്ങിയ ഇന്ത്യ 19.4 ഓവറില്‍ 124 റണ്‍സിന് പുറത്തായി. 13 പന്തില്‍ 26 റണ്‍സെടുത്ത റിച്ച ഘോഷാണ് ഇന്ത്യയുടെ ടോപ് സ്‌കോറര്‍. തുടക്കത്തിലേറ്റ തകര്‍ച്ചയില്‍ നിന്നും ഇന്ത്യയ്‌ക്ക് കരകയറാനായില്ല. 65 റണ്‍സ് ചേര്‍ക്കുമ്പോഴേക്കും ഇന്ത്യയ്‌ക്ക് അഞ്ച് വിക്കറ്റുകള്‍ നഷ്‌ടപ്പെട്ടിരുന്നു.
തുടര്‍ന്നും തുടര്‍ച്ചയായ ഇടവേളകളില്‍ വിക്കറ്റ് നേടി പാക് ബോളര്‍മാര്‍ ഇന്ത്യയുടെ തോല്‍വി ഉറപ്പാക്കി. സ്‌മൃതി മന്ദാന (19 പന്തില്‍ 17), സബ്ബിനേനി മേഘന (14 പന്തില്‍ 15), ജെമീമ റോഡ്രിഗസ് (8 പന്തില്‍ 2), ദയാലൻ ഹേമലത (22 പന്തില്‍ 20), പൂജ വസ്ത്രകർ (8 പന്തില്‍ 5), ദീപ്‌തി ശർമ (11 പന്തില്‍ 16), ഹർമൻപ്രീത് കൗർ (12 പന്തില്‍ 12), രാധാ യാദവ് (4 പന്തില്‍ 3), രാജേശ്വരി ഗെയക്‌വാദ് (5 പന്തില്‍ 1) എന്നിവരാണ് പുറത്തായ മറ്റ് താരങ്ങള്‍.
രേണുക സിങ് (2 പന്തില്‍ 2) പുറത്താവാതെ നിന്നു. പാകിസ്ഥാനായി നഷ്റ സന്ധു നാല് ഓവറില്‍ 30 റണ്‍സ് വഴങ്ങി മൂന്ന് വിക്കറ്റ് വീഴ്‌ത്തി. സാദിയ ഇഖ്ബാൽ, നിദ ദാർ എന്നിവര്‍ രണ്ട് വിക്കറ്റ് വീതം വീഴ്‌ത്തിയപ്പോള്‍ ഐമാൻ അൻവർ, തുബ ഹസ്സൻ എന്നിവര്‍ ഓരോ വിക്കറ്റുകള്‍ വീതവും സ്വന്തമാക്കി.
റെക്കോഡ് പ്രകടനവുമായി നിദ: നേരത്തെ ടോസ് നേടി ബാറ്റിങ്ങിനിറങ്ങിയ പാകിസ്ഥാന് നിശ്ചിത ഓവറില്‍ ആറ് വിക്കറ്റ് നഷ്‌ടത്തിലാണ് 137 റണ്‍സ് എടുത്തത്. അപരാജിത അര്‍ധ സെഞ്ച്വറിയുമായി തിളങ്ങിയ നിദ ദാറിന്‍റെ പ്രകടനമാണ് പാകിസ്ഥാന് തുണയായത്. 37 പന്തില്‍ 56 റണ്‍സാണ് നിദ നേടിയത്.
അന്താരാഷ്‌ട്ര ടി20യില്‍ ഇന്ത്യയ്‌ക്കെതിരെ ഒരു പാക് വനിത താരത്തിന്‍റെ ഉയര്‍ന്ന സ്‌കോറാണിത്. ക്യാപ്റ്റന്‍ ബിസ്‌മ മറൂഫ് 35 പന്തില്‍ 32 റണ്‍സെടുത്തു. പവര്‍പ്ലേയില്‍ 33 റണ്‍സിന് പാകിസ്ഥാന്‍റെ മൂന്ന് വിക്കറ്റുകള്‍ വീഴ്‌ത്താന്‍ ഇന്ത്യന്‍ ബോളര്‍മാര്‍ക്ക് കഴിഞ്ഞു.
മുനീബ അലി (17 പന്തില്‍), സിദ്ര അമീൻ (14 പന്തില്‍ 11), ഒമൈമ സൊഹൈൽ (2 പന്തില്‍ 0) എന്നിവരാണ് വേഗം തിരിച്ച് കയറിയത്. തുടര്‍ന്ന് ക്രീസിലൊന്നിച്ച ബിസ്‌മ മറൂഫ്- നിദ ദാര്‍ സഖ്യം പാകിസ്ഥാനെ മുന്നോട്ട് നയിച്ചു. നാലാം വിക്കറ്റില്‍ 76 റണ്‍സിന്‍റെ കൂട്ടുകെട്ടാണ് ഇരുവരും ചേര്‍ത്തത്.
ബിസ്‌മയെ പുറത്താക്കി രേണുക സിങ്ങാണ് ഇന്ത്യയ്‌ക്ക് ബ്രേക്ക് ത്രൂ നല്‍കിയത്. തുടര്‍ന്നെത്തിയ ആലിയ റിയാസ് (7പന്തില്‍7), ആയിഷ നസീം (7 പന്തില്‍ 9) എന്നിവര്‍ക്ക് അധികം പിടിച്ച് നില്‍ക്കാന്‍ കഴിഞ്ഞില്ല. നിദയോടൊപ്പം തുബ ഹസ്സനും (1 പന്തില്‍ 1) പുറത്താവാതെ നിന്നു.
അഞ്ച് ഫോറുകളും ഒരു സിക്‌സും അടങ്ങുന്നതാണ് നിദയുടെ ഇന്നിങ്‌സ്. ഇന്ത്യയ്‌ക്കായി ദീപ്‌തി ശര്‍മ നാല് ഓവറില്‍ 27 റണ്‍സ് വഴങ്ങി മൂന്ന് വിക്കറ്റ് വീഴ്‌ത്തി. നാല് ഓവറില്‍ 23 റണ്‍സ് വിട്ടുനല്‍കിയ പൂജ വസ്‌ത്രാകര്‍ രണ്ടും, 24 റണ്‍സ് വഴങ്ങിയ രേണുക സിങ് ഒരു വിക്കറ്റും നേടി.
മത്സരത്തില്‍ പരാജയപ്പെട്ടുവെങ്കിലും പോയിന്‍റ് ടേബിളില്‍ ഇന്ത്യ തലപ്പത്ത് തുടരുകയാണ്. നാല് മത്സരങ്ങളില്‍ ആറ് പോയിന്‍റാണ് സംഘത്തിനുള്ളത്. നാലില്‍ ആറ് പോയിന്‍റുള്ള പാകിസ്ഥാന് രണ്ടാം സ്ഥാനത്താണ്.
also read: സഞ്‌ജു യുവിയെപ്പോലെ, ഒരോവറില്‍ ആറ് സിക്‌സടിക്കാന്‍ കഴിവുണ്ടെന്ന് ഡെയ്ൽ സ്‌റ്റെയ്‌ന്‍
