ഗയാന : ടി20 ലോകകപ്പിനുള്ള വെസ്റ്റ്ഇന്ഡീസ് ടീമില്‍ നിന്നും ബാറ്റര്‍ ഷിംറോണ്‍ ഹെറ്റ്‌മയര്‍ പുറത്ത്. ഓസ്‌ട്രേലിയയിലേക്കുള്ള ഫ്ലൈറ്റ് മിസ്സായതിനാലാണ് താരം ടീമില്‍ നിന്നും പുറത്തായത്. ഹെറ്റ്‌മയര്‍ക്ക് പകരം ഷംറ ബ്രൂക്‌സിനെ ടീമില്‍ ഉള്‍പ്പെടുത്തിയതായി ക്രിക്കറ്റ് വെസ്റ്റ്ഇന്ഡീസ് അറിയിച്ചു.
കുടുംബപരമായ കാരണങ്ങളാല്‍ റീ ഷെഡ്യൂള്‍ ചെയ്‌ത് നല്‍കിയ ഫ്ലൈറ്റാണ് ഐപിഎല്ലില്‍ രാജസ്ഥാന്‍ റോയല്‍സിന്‍റെ ഫിനിഷറായ ഹെറ്റ്‌മയര്‍ മിസ്സാക്കിയത്. ലോകകപ്പിന് മുന്നോടിയായി ഓസ്‌ട്രേലിയയ്‌ക്കെതിരെ രണ്ട് ടി20 മത്സരങ്ങള്‍ വിന്‍ഡീസ് കളിക്കുന്നുണ്ട്. ഇതിനായി ഒക്‌ടോബര്‍ ഒന്നിനായിരുന്നു ടീമിന്‍റെ യാത്ര നിശ്ചയിച്ചിരുന്നത്.
വ്യക്തിപരമായ കാരണങ്ങളാല്‍ ഈ ദിവസം എത്താന്‍ സാധ്യമല്ലെന്ന് അറിയിച്ചതോടെയാണ് താരത്തിന് ഫ്ലൈറ്റ് റീ ഷെഡ്യൂള്‍ ചെയ്‌ത് നല്‍കിയത്. കൃത്യസമയത്ത് വിമാനത്താവളത്തിലെത്താൻ കഴിയില്ലെന്ന് ഹെറ്റ്‌മയര്‍ ക്രിക്കറ്റ് വെസ്റ്റ്ഇന്ഡീസ് ഡയറക്ടർ ജിമ്മി ആഡംസിനെ അറിയിക്കുകയായിരുന്നു. തുടര്‍ന്നാണ് പകരം താരത്തെ ഉള്‍പ്പെടുത്തിയത്.
also read:'ഇന്ത്യയ്‌ക്കായി ആര്‍പ്പുവിളിക്കാന്‍ ഞാനുണ്ടാവും'; ആദ്യ പ്രതികരണവുമായി ജസ്‌പ്രീത് ബുംറ
ഓസീസിനെതിരെ നാളെയാണ് വിന്‍ഡീസ് ടീം ആദ്യ ടി20 കളിക്കുന്നത്. തുടര്‍ന്ന് ഒക്‌ടോബര്‍ ഏഴിന് പരമ്പരയിലെ അവസാന മത്സരവും നടക്കും. ലോകകപ്പിന് മുമ്പ് വിന്‍ഡീസ് കളിക്കുന്ന അവസാന ടി20 പരമ്പരയാണിത്. ഒക്‌ടോബര്‍ 16 മുതല്‍ നവംബര്‍ 13 വരെയാണ് ടി20 ലോകകപ്പ് നടക്കുന്നത്.
ഗ്രൂപ്പ് ഘട്ടത്തില്‍ സ്‌കോട്‌ലന്‍ഡ്, സിംബാബ്‌വെ, അയര്‍ലന്‍ഡ് എന്നീ ടീമുകള്‍ക്കെതിരെയാണ് മുന്‍ ചാമ്പ്യന്മാരായ വിന്‍ഡീസ് കളിക്കുന്നത്. ഗ്രൂപ്പില്‍ നിന്ന് രണ്ട് ടീമുകള്‍ മാത്രമാണ് അടുത്ത ഘട്ടമായ സൂപ്പര്‍ 12ലേക്ക് മുന്നേറുക.
