'ഇവിടെ കളി നടക്കില്ല, ബാറ്റര്‍മാര്‍ക്ക് കാര്യങ്ങള്‍ കടുപ്പമാകും...': ദക്ഷിണാഫ്രിക്കന്‍ സാഹചര്യങ്ങളെ കുറിച്ച് രോഹിത് ശര്‍മ

South Africa vs India Test Series: പ്രോട്ടീസിനെതിരായ ആദ്യ ടെസ്റ്റിന് മുന്‍പ് ദക്ഷിണാഫ്രിക്കയിലെ ബാറ്റിങ് സാഹചര്യങ്ങളെ കുറിച്ച് രോഹിത് ശര്‍മയുടെ വെളിപ്പെടുത്തല്‍.

സെഞ്ചൂറിയന്‍: ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയിലെ ആദ്യ മത്സരത്തിനായി കളത്തിലിറങ്ങാന്‍ ഒരുങ്ങുകയാണ് ടീം ഇന്ത്യ (South Africa vs India Test Series). സെഞ്ചൂറിയിനില്‍ ഇന്ന് ഉച്ചയ്‌ക്ക് ഒന്നരയ്‌ക്കാണ് പരമ്പരയിലെ ആദ്യ മത്സരം ആരംഭിക്കുന്നത് (South Africa vs India 1st Test). ഏകദിന ക്രിക്കറ്റ് ലോകകപ്പ് ഫൈനലിലെ തോല്‍വിയ്‌ക്ക് ശേഷം ഇന്ത്യന്‍ നായകന്‍ രോഹിത് ശര്‍മ (Rohit Sharma), സ്റ്റാര്‍ ബാറ്റര്‍ വിരാട് കോലി (Virat Kohli), സ്റ്റാര്‍ പേസര്‍ ജസ്‌പ്രീത് ബുംറ (Jasprit Bumrah) എന്നിവരെല്ലാം കളത്തിലേക്ക് മടങ്ങിയെത്തുന്ന മത്സരം കൂടിയാണ് ഇന്ന് ആരംഭിക്കുന്നത്.

ഇന്ത്യ വേദിയായ ഏകദിന ലോകകപ്പില്‍ തകര്‍പ്പന്‍ ബാറ്റിങ് പ്രകടനമായിരുന്നു ക്യാപ്‌റ്റന്‍ രോഹിത് ശര്‍മ പുറത്തെടുത്തത്. ഫൈനലിലേക്കുള്ള ഇന്ത്യയുടെ കുതിപ്പില്‍ ഏറെ നിര്‍ണായകമായതായിരുന്നു ലോകകപ്പില്‍ രോഹിത് ശര്‍മയുടെ ബാറ്റിങ്. ലോകകപ്പ് ഫൈനല്‍ കഴിഞ്ഞ് ഒരു മാസത്തെ വിശ്രമത്തിന് ശേഷം ദക്ഷിണാഫ്രിക്കന്‍ മണ്ണില്‍ കളിക്കാനെത്തുമ്പോള്‍ കാര്യങ്ങള്‍ അന്നത്തേത് പോലെ എളുപ്പമായിരിക്കില്ലെന്നാണ് രോഹിത് ശര്‍മയുടെ അഭിപ്രായം.

ഒരു ബാറ്ററിന് ഏറ്റവും കൂടുതല്‍ വെല്ലുവിളി ഉയര്‍ത്തുന്ന പിച്ചുകളാണ് ദക്ഷിണാഫ്രിക്കയില്‍ ഉള്ളതെന്നാണ് ഇന്ത്യന്‍ നായകന്‍റെ അഭിപ്രായം. ദക്ഷിണാഫ്രിക്കയ്‌ക്കെതിരായ ആദ്യ ടെസ്റ്റ് മത്സരത്തിന്‍റെ തലേദിവസം മാധ്യമങ്ങളെ കണ്ടപ്പോഴാണ് രോഹിത് ഇക്കാര്യം വ്യക്തമാക്കിയത്. ദക്ഷിണാഫ്രിക്കയില്‍ രോഹിത് ശര്‍മയുടെ ബാറ്റിങ് പ്രകടനത്തില്‍ നിന്നും ഇക്കാര്യം വ്യക്തമാണ്.

ഇതുവരെ ദക്ഷിണാഫ്രിക്കയില്‍ നടന്ന നാല് ടെസ്റ്റ് മത്സരങ്ങളിലാണ് രോഹിത് ഇന്ത്യയ്‌ക്ക് വേണ്ടി പാഡ് അണിഞ്ഞിട്ടുള്ളത്. ഈ മത്സരങ്ങളില്‍ നിന്നും 123 റണ്‍സ് മാത്രമാണ് താരത്തിന്‍റെ ബാറ്റില്‍ നിന്നും പിറന്നത്. 15.37 മാത്രമാണ് ദക്ഷിണാഫ്രിക്കയില്‍ രോഹിതിന്‍റെ ബാറ്റിങ് ശരാശരി (Rohit Sharma Test Stats In South Africa).

'ഒരു ബാറ്ററെന്ന നിലയില്‍ ദക്ഷിണാഫ്രിക്കയില്‍ വന്ന് മികച്ച പ്രകടനം നടത്തുക എന്നത് വലിയ വെല്ലുവിളിയാണ്. വിദേശ ബാറ്റര്‍മാര്‍ക്ക് കളിക്കാന്‍ ഏറെ ദുഷ്‌കരമാണ് ഇവിടുത്തെ സാഹചര്യങ്ങള്‍. ആ വെല്ലുവിളി ഏറ്റെടുക്കാനുള്ള കാത്തിരിപ്പിലാണ് ഞാന്‍ ഉള്ളത്.

പരിക്കിനെ തുടര്‍ന്ന് കഴിഞ്ഞ പ്രാവശ്യം ഇന്ത്യന്‍ ടീം ദക്ഷിണാഫ്രിക്കയില്‍ എത്തിയപ്പോള്‍ എനിക്ക് അവര്‍ക്കൊപ്പം എത്താന്‍ സാധിച്ചിരുന്നില്ല. ഇത്തവണ ഒരു ബാറ്ററായി ടീമിന് ആവശ്യമുള്ളത് ചെയ്യാന്‍ ഞാന്‍ ശ്രമിക്കും.

ബൗണ്‍സും ലാറ്ററല്‍ മൂവ്‌മെന്‍റ്‌സും കൊണ്ടാണ് ഇവിടെ ബൗളര്‍മാര്‍ക്ക് കൂടുതല്‍ ആധിപത്യം പുലര്‍ത്താന്‍ സാധിക്കുന്നത്. പിച്ചില്‍ വിള്ളലുകള്‍ രൂപപ്പെടുന്നതിന് അനുസരിച്ച് ബാറ്റര്‍മാര്‍ക്ക് കാര്യങ്ങളും ദുഷ്‌കരമാകും. ഈ സാഹചര്യത്തെ അതിജീവിക്കുക എന്നത് ബുദ്ധിമുട്ടേറിയ കാര്യമായിരിക്കും. എന്നാല്‍, എങ്ങനെയും റണ്‍സ് കണ്ടെത്തണം എന്ന മാനസികാവസ്ഥയോടെ പോകുന്നത് ചിലപ്പോള്‍ നിങ്ങളെ സഹായിക്കുന്നതായിരിക്കും. '- രോഹിത് ശര്‍മ പറഞ്ഞു.