മുംബൈ : ഏകദിന ക്രിക്കറ്റ് ലോകകപ്പില്‍ (Cricket World Cup 2023) ശ്രീലങ്കയ്‌ക്കെതിരായ അഞ്ച് വിക്കറ്റ് നേട്ടത്തിന് പിന്നാലെ ഇന്ത്യന്‍ സ്റ്റാര്‍ പേസര്‍ മുഹമ്മദ് ഷമിയെ പ്രശംസിച്ച് മുന്‍ താരം റോബിന്‍ ഉത്തപ്പ (Robin Uthappa). ഇന്ത്യന്‍ സ്റ്റാര്‍ ബാറ്റര്‍ വിരാട് കോലിയും (Virat Kohli) പേസര്‍ മുഹമ്മദ് ഷമിയും (Mohammed Shami) മത്സരങ്ങളെ ഒരേ രീതിയിലാണ് സമീപിക്കുന്നതെന്ന് റോബിന്‍ ഉത്തപ്പ പറഞ്ഞു. ഏകദിന ക്രിക്കറ്റ് ലോകകപ്പില്‍ ഇന്ത്യ അപരാജിത കുതിപ്പ് തുടരുന്നതിനിടെയാണ് മുന്‍ ഇന്ത്യന്‍ താരത്തിന്‍റെ പ്രതികരണം (Robin Uthappa About Mohammed Shami).
'മുഹമ്മദ് ഷമിയെ ഒരു ഇതിഹാസമെന്ന് വാഴ്‌ത്തപ്പെടാന്‍ സമയമായിട്ടില്ല, കാരണം ഇപ്പോഴും അദ്ദേഹം കളിക്കുന്നത് തുടരുകയാണ്. ക്രിക്കറ്റില്‍ ഇനിയും ഒരുപാട് നേട്ടങ്ങള്‍ അദ്ദേഹത്തിന് സ്വന്തമാക്കാന്‍ ബാക്കിയുണ്ട്. ഇന്ത്യയ്‌ക്കായി തകര്‍പ്പന്‍ പ്രകടനങ്ങള്‍ പുറത്തെടുത്തിട്ടുള്ള സഹീര്‍ ഖാന്‍, ജവഗല്‍ ശ്രീനാഥ് എന്നിവരുടേതിന് സമാനമായ വ്യക്തിത്വത്തിന് ഉടമയാണ് ഷമിയും.
വിക്കറ്റിനോടുള്ള ആഗ്രഹവും, അതേ മനോഭാവവുമെല്ലാം ഷമിക്കുമുണ്ട്. വിരാട് കോലിക്കുള്ള അതേ കാലിബര്‍ തന്നെയാണ് ഷമിക്കുമുള്ളത്. കോലി ഇന്ത്യയുടെ ബാറ്ററാണ് ഷമി ബൗളറും എന്നത് മാത്രമാണ് വ്യത്യാസം.
ലളിതമായിട്ടാണ് ഓരോ മത്സരങ്ങളെയും അദ്ദേഹം നേരിടുന്നത്. വിരാട് കോലിയും അത് ചെയ്യുന്നത് നമ്മള്‍ കണ്ടിട്ടുണ്ട്. ലങ്കയ്‌ക്കെതിരായ മത്സരത്തില്‍ ആദ്യ പത്തോവറില്‍ അല്‍പം പാടുപെട്ടെങ്കിലും വിരാടിന് പിന്നീട് കാര്യങ്ങള്‍ എളുപ്പമാക്കാനായി.
അതുപോലെ തന്നെയാണ് ഷമിയുടെയും കാര്യം. പന്തെറിയാനെത്തുമ്പോഴെല്ലാം ശരിയായ സ്ഥലത്തേക്ക് തന്നെ ബൗള്‍ ചെയ്യാന്‍ അദ്ദേഹത്തിനാകുന്നു. ചില സമയങ്ങളില്‍ മോശം പന്തെറിയുമെങ്കിലും കാര്യങ്ങളെല്ലാം ലളിതമാക്കി തന്നെ വയ്‌ക്കാന്‍ ഷമിക്ക് സാധിക്കാറുണ്ട്' -റോബിന്‍ ഉത്തപ്പ പറഞ്ഞു.
ലോകകപ്പില്‍ തകര്‍പ്പന്‍ ഫോമിലാണ് മുഹമ്മദ് ഷമി. മൂന്ന് മത്സരം മാത്രം കളിച്ച താരം ഇതുവരെ 14 വിക്കറ്റുകളാണ് ലോകകപ്പില്‍ നേടിയിട്ടുള്ളത്. ലോകകപ്പിലെ വിക്കറ്റ് വേട്ടക്കാരുടെ പട്ടികയില്‍ നിലവില്‍ ആറാം സ്ഥാനക്കാരനാണ് മുഹമ്മദ് ഷമി.
മുംബൈ വാങ്കഡെയില്‍ ശ്രീലങ്കയ്‌ക്കെതിരെ ഇന്ത്യ 302 റണ്‍സിന്‍റെ റെക്കോഡ് ജയം നേടിയ മത്സരത്തില്‍ അഞ്ചോവറില്‍ 18 റണ്‍സ് മാത്രം വിട്ടുകൊടുത്താണ് മുഹമ്മദ് ഷമി അഞ്ച് വിക്കറ്റ് നേട്ടം സ്വന്തമാക്കിയത്. ഈ പ്രകടനത്തോടെ ലോകകപ്പില്‍ കൂടുതല്‍ അഞ്ച് വിക്കറ്റുകളെന്ന നേട്ടത്തിലേക്കും ഷമിക്ക് എത്താനായിരുന്നു.
Also Read : 'ഷമി കാ ഹുക്കും...' ലോകകപ്പില്‍ വിക്കറ്റ് വേട്ടയ്‌ക്കൊപ്പം മുഹമ്മദ് ഷമിയുടെ റെക്കോഡ് വേട്ടയും
