ധാക്ക : ലോകമെമ്പാടുമുള്ള ടീമുകളെല്ലാം തന്നെ ഏകദിന ക്രിക്കറ്റ് ലോകകപ്പിനായുള്ള (ODI World Cup) അവസാനഘട്ട ഒരുക്കങ്ങളിലാണ്. പ്രാഥമിക സ്‌ക്വാഡിനെ പ്രഖ്യാപിച്ച് ഓസ്‌ട്രേലിയ, ഇംഗ്ലണ്ട് ടീമുകള്‍ മറ്റ് രാജ്യങ്ങളേക്കാള്‍ ടൂര്‍ണമെന്‍റിലേക്കുള്ള യാത്രയില്‍ ഒരുപടി മുന്നിലാണെന്ന് പറയാന്‍ സാധിക്കും. ഏഷ്യന്‍ ടീമുകള്‍ക്ക് തങ്ങളുടെ ഏറ്റവും മികച്ച ടീം കോമ്പിനേഷന്‍ കണ്ടെത്തുന്നതിന് ഏഷ്യ കപ്പ് (Asia Cup) എന്നൊരു ടൂര്‍ണമെന്‍റും മുന്നിലുണ്ട്.
അതുകൊണ്ട് തന്നെ ഏഷ്യയിലെ ഓരോ ടീമിലെയും താരങ്ങളും കഠിന പരിശീലനത്തിലാണ്. വ്യത്യസ്‌ത രീതിയിലാണ് ഓരോ താരങ്ങളുടെയും പരിശീലനം. നെറ്റ്‌സില്‍ പന്തെറിയുന്നതിനും ബാറ്റ് ചെയ്യുന്നതിനും പുറമെ തങ്ങളുടെ മനക്കരുത്ത് വര്‍ധിപ്പിക്കാന്‍ വേണ്ട കാര്യങ്ങളും ഓരോ താരങ്ങളും ചെയ്യുന്നുണ്ട്.
ബാറ്റിങ്, ബൗളിങ് കഴിവിനൊപ്പം തന്നെ ഒരു മത്സരം തങ്ങള്‍ക്ക് അനുകൂലമാക്കുന്നതില്‍ താരങ്ങളുടെ മനസാന്നിധ്യവും പ്രധാന പങ്ക് വഹിക്കുന്നുണ്ട്. സമ്മര്‍ദം ഏറെയുണ്ടാകുന്ന സാഹചര്യങ്ങളില്‍ താരങ്ങള്‍ അതിനെ എങ്ങനെ കൈകാര്യം ചെയ്യുന്നു എന്നതിനെ ആശ്രയിച്ചായിരിക്കും പലപ്പോഴും ആ മത്സരത്തിന്‍റെ ഫലമുണ്ടാകുന്നത്.
അത്തരത്തിലുണ്ടാകുന്ന സമ്മര്‍ദ ഘട്ടങ്ങളെ അതിജീവിക്കാനും തന്‍റെ മനക്കരുത്ത് വര്‍ധിപ്പിക്കാനും വ്യത്യസ്‌തമായ രീതിയിലാണ് ഒരു ബംഗ്ലാദേശ് (Bangladesh) ക്രിക്കറ്റ് താരത്തിന്‍റെ പരിശീലനം. ബംഗ്ല യുവ ഓപ്പണര്‍ മുഹമ്മദ് നയിം ഷെയ്ഖ് (Mohammad Naim Sheikh) ആണ് മനക്കരുത്ത് കൂട്ടാന്‍ തീക്കനലിലൂടെ നടന്നത് (Mohammad Naim Sheikh Walks on Fire). സോഷ്യല്‍ മീഡിയ പ്ലാറ്റ്‌ഫോമുകളില്‍ ഇപ്പോള്‍ ഇതിന്‍റെ ദൃശ്യങ്ങള്‍ വ്യാപകമായി പ്രചരിക്കപ്പെടുന്നുണ്ട്.
ഏഷ്യ കപ്പിന് മുന്നോടിയായി 'മൈന്‍ഡ് ട്രെയിനിങ്' (Mind Training) സെഷന്‍റെ ഭാഗമായിട്ടാണ് മുഹമ്മദ് നയിം ഷെയ്ഖ് തീക്കനലിന് മുകളിലൂടെ നടന്നത്. 2019ല്‍ 19-ാം വയസില്‍ ടി20യിലൂടെ ബംഗ്ലാദേശിനായി അരങ്ങേറ്റം നടത്തിയ താരമാണ് മുഹമ്മദ് നയിം. 2020ലായിരുന്നു താരത്തിന്‍റെ ഏകദിന അരങ്ങേറ്റം.
-
Naim Sheikh working with a mind trainer ahead of Asia Cup. pic.twitter.com/mkykegJ06p
— Saif Ahmed 🇧🇩 (@saifahmed75) August 18, 2023 " class="align-text-top noRightClick twitterSection" data="
">Naim Sheikh working with a mind trainer ahead of Asia Cup. pic.twitter.com/mkykegJ06p
— Saif Ahmed 🇧🇩 (@saifahmed75) August 18, 2023Naim Sheikh working with a mind trainer ahead of Asia Cup. pic.twitter.com/mkykegJ06p
— Saif Ahmed 🇧🇩 (@saifahmed75) August 18, 2023
23കാരനായ താരം ഇതുവരെ 35 ടി20 മത്സരങ്ങള്‍ ബംഗ്ലാദേശിന് വേണ്ടി കളിച്ചിട്ടുണ്ട്. കരിയറില്‍ 24 ശരാശരിയില്‍ 815 റണ്‍സാണ് താരത്തിന്‍റെ സമ്പാദ്യം. ടി20യിലെ പോലെ ഏകദിനത്തിലും ടെസ്റ്റിലും താരത്തിന് കൂടുതല്‍ അവസരങ്ങള്‍ ലഭിച്ചിട്ടില്ല.
2020ല്‍ ഏകദിനത്തില്‍ അരങ്ങേറിയ താരം ആകെ നാല് മത്സരങ്ങളാണ് ഇതുവരെ കളിച്ചത്. ടെസ്റ്റില്‍ ഒരു കളിയിലും മുഹമ്മദ് നയിം ബംഗ്ലാദേശ് ജഴ്‌സിയണിഞ്ഞ് കളത്തിലിറങ്ങിയിട്ടുണ്ട്. അതേസമയം, ഓഗസ്റ്റ് 30ന് ആരംഭിക്കുന്ന ഏഷ്യ കപ്പ് ടൂര്‍ണമെന്‍റ് ഹൈബ്രിഡ് മോഡലില്‍ ആണ് ഇപ്രാവശ്യം നടക്കുന്നത്.
Also Read : team India Asia cup ശ്രേയസ് ഇല്ലെങ്കില്‍ നാലാം നമ്പറില്‍ പകരമെത്തേണ്ടത് അവൻ..' സൗരവ് ഗാംഗുലി പറയുന്നു
പാകിസ്ഥാനിലേക്ക് ടീം ഇന്ത്യ പോകില്ലെന്ന് ബിസിസിഐ വ്യക്തമാക്കിയതോടെ ആയിരുന്നു മത്സരങ്ങള്‍ പാകിസ്ഥാന്‍, ശ്രീലങ്ക എന്നിവിടങ്ങളില്‍ നടത്താന്‍ തീരുമാനമായത്. ഗ്രൂപ്പ് ഘട്ടത്തിലെ മൂന്ന് മത്സരങ്ങളും സൂപ്പര്‍ ഫോറിലെ ഒരു മത്സരത്തിനുമാണ് പാകിസ്ഥാന്‍ വേദിയാകുന്നത്. ശേഷിക്കുന്ന മത്സരങ്ങളെല്ലാം ശ്രീലങ്കയിലാണ് നടക്കുക. ടൂര്‍ണമെന്‍റില്‍ സെപ്‌റ്റംബര്‍ രണ്ടിനാണ് ഇന്ത്യ പാകിസ്ഥാന്‍ പോരാട്ടം.
