ദുബായ്: ഇന്ത്യയുടെ ടോപ്പ് ഓർഡർ ബാറ്റര്‍ ജെമിമ റോഡ്രിഗസിന് 2022 ഓഗസ്റ്റിലെ മികച്ച വനിത താരത്തിനുള്ള പുരസ്‌കാരത്തിന് നാമനിർദേശം(ഐസിസി പ്ലയര്‍ ഓഫ്‌ ദി മന്ത്). ഓസ്‌ട്രേലിയയുടെ ബെത്ത് മൂണി, താലിയ മഗ്രാത്ത് എന്നിവരും നാമനിർദേശ പട്ടികയിൽ ഇടംപിടിച്ചിട്ടുണ്ട്. അടുത്തിടെ അവസാനിച്ച കോമണ്‍വെല്‍ത്ത് ഗെയിംസില്‍ ഇന്ത്യയെ ഫൈനലില്‍ എത്തിക്കുന്നതില്‍ നിര്‍ണായകമായ താരമാണ് ജെമിമ റോഡ്രിഗസ്.
അഞ്ച് മത്സരങ്ങളില്‍ 146 റണ്‍സടിച്ച താരം ടൂര്‍ണമെന്‍റിലെ റണ്‍ വേട്ടക്കാരുടെ പട്ടികയില്‍ അഞ്ചാമതായിരുന്നു. ബാര്‍ബഡോസിനെതിരെ 46 പന്തില്‍ 56 റണ്‍സടിച്ച ജമീമയുടെ മികവിലാണ് ഇന്ത്യ സെമിയുറപ്പിച്ചത്. സെമിയില്‍ ഇംഗ്ലണ്ടിനെതിരെ തിളങ്ങിയ താരം 31 പന്തില്‍ 44 റണ്‍സടിച്ചാണ് ഇന്ത്യയ്‌ക്ക് ഫൈനല്‍ ഉറപ്പിച്ചത്.
ഫൈനലില്‍ ഓസ്‌ട്രേലിയയോട് ഒമ്പത് റണ്‍സിന് ഇന്ത്യ തോറ്റിരുന്നു. ഈ മത്സരത്തില്‍ 33 റണ്‍സടിച്ച താരമാണ് തുടക്കത്തിലെ തകര്‍ച്ചയില്‍ നിന്നും ഇന്ത്യയെ കരകയറ്റിയത്.
അതേസമയം ഓഗസ്റ്റിലെ മികച്ച പുരുഷ താരത്തിനുള്ള പട്ടികയില്‍ സിംബാബ്‌വെ ബാറ്റര്‍ സിക്കന്ദര്‍ റാസ, ഓസ്‌ട്രേലിയയുടെ മിച്ചല്‍ സാന്‍റ്‌നര്‍, ഇംഗ്ലണ്ടിന്‍റെ ബെന്‍സ്റ്റോക്‌സ് എന്നിവരാണ് ഇടം പിടിച്ചത്. ഈ മാസം മൂന്ന് സെഞ്ച്വറികള്‍ നേടാന്‍ റാസയ്‌ക്ക് കഴിഞ്ഞിരുന്നു. ഇന്ത്യയ്‌ക്കെതിരെ ഒരു സെഞ്ചുറി നേടിയ താരം, ബംഗ്ലാദേശിനെതിരെ രണ്ട് സെഞ്ച്വറികള്‍ കണ്ടെത്തിയിരുന്നു.
