ഹൈദരാബാദ്: റോയല്‍ ചലഞ്ചേഴ്‌സ് ബാംഗ്ലൂരിനോട് വമ്പന്‍ തോല്‍വി വഴങ്ങിയതോടെ ഐപിഎല്‍ പോയിന്‍റ് പട്ടികയില്‍ ആറാം സ്ഥാനത്തേക്ക് വീണ് രാജസ്ഥാന് റോയല്‍സ്. ഇന്നലെ സവായ് മാന്‍സിങ് സ്റ്റേഡിയത്തില്‍ ആര്‍സിബിക്കെതിരെ നടന്ന മത്സരത്തില്‍ 112 റണ്‍സിന്‍റെ കൂറ്റന്‍ തോല്‍വി വഴങ്ങിയതോടെയാണ് സഞ്‌ജുവും സംഘവും ആറാം സ്ഥാനത്തേക്ക് എത്തിയത്. ഈ തോല്‍വി നെറ്റ് റണ്‍റേറ്റിനെയും കാര്യമായി ബാധിച്ചതോടെ ടീമിന്‍റെ പ്ലേ ഓഫ് മോഹങ്ങള്‍ക്കും മങ്ങലേറ്റിട്ടുണ്ട്.
കഴിഞ്ഞ വര്‍ഷത്തെ ഫൈനലിസ്റ്റുകളായ രാജസ്ഥാന് നിലവില്‍ 13 കളികളില്‍ നിന്നും 12 പോയിന്‍റാണ് ഉള്ളത്. ശേഷിക്കുന്ന ഒരു മത്സരത്തില്‍ വമ്പന്‍ ജയം നേടിയാലും അത്ഭുതങ്ങള്‍ സംഭവിച്ചാലെ രാജസ്ഥാന് ഇനിയൊരു മുന്നേറ്റം സാധ്യമാകൂ. പഞ്ചാബ് കിങ്‌സിനോടാണ് ഇനി രാജസ്ഥാന് പോരടിക്കാനുള്ളത്.
രാജസ്ഥാനെ വീഴ്‌ത്തിയതോടെ പോയിന്‍റ് പട്ടികയില്‍ ഏഴാം സ്ഥാനത്തായിരുന്ന റോയല്‍ ചലഞ്ചേഴ്‌സ് ബാംഗ്ലൂര്‍ അഞ്ചാമതേക്ക് എത്തി. റോയല്‍സിനെതിരായ കൂറ്റന്‍ ജയത്തോടെ നെറ്റ് റണ്‍റേറ്റ് മെച്ചപ്പെടുത്താനും ആര്‍സിബിക്ക് സാധിച്ചു. 12 മത്സരങ്ങളില്‍ 12 പോയിന്‍റുള്ള ആര്‍സിബി +0.166 റണ്‍റേറ്റിന്‍റെ കരുത്തിലാണ് അഞ്ചാം സ്ഥാനം പിടിച്ചിരിക്കുന്നത്.
പോയിന്‍റ് പട്ടികയിലെ രണ്ടാം സ്ഥാനക്കാരായ ചെന്നൈ സൂപ്പര്‍ കിങ്സിനെ വീഴ്‌ത്തിയ കൊല്‍ക്കത്ത നൈറ്റ് റൈഡേഴ്‌സ് 7-ാം സ്ഥാനത്താണ്. 13 മത്സരങ്ങളില്‍ നിന്നും 12 പോയിന്‍റാണ് നിലവില്‍ കൊല്‍ക്കത്തയ്‌ക്കുള്ളത്. അതേസമയം കൊല്‍ക്കത്തയോടെ തോല്‍വി വഴങ്ങിയതോടെ ചെന്നൈ സൂപ്പര്‍ കിങ്‌സിനും തങ്ങളുടെ അവസാന മത്സരം നിര്‍ണായകമായിട്ടുണ്ട്.
നിലവില്‍ 13 കളികളില്‍ നിന്നും 15 പോയിന്‍റാണ് ധോണിക്കും സംഘത്തിനും ഉള്ളത്. ഡല്‍ഹി ക്യാപിറ്റല്‍സിനെതിരായ അവസാന മത്സരത്തില്‍ ജയം പിടിച്ചാലെ ചെന്നൈക്ക് പ്ലേഓഫില്‍ ഇടം പിടിക്കാന്‍ സാധിക്കൂ. 16 പോയിന്‍റുള്ള ഗുജറാത്ത് ടൈറ്റന്‍സ് ആണ് നിലവില്‍ പോയിന്‍റ് പട്ടികയിലെ ഒന്നാം സ്ഥാനക്കാര്‍.
12 മത്സരങ്ങളാണ് ഹാര്‍ദികും സംഘവും ഇതുവരെ കളിച്ചത്. ലീഗില്‍ ഏറ്റവും മികച്ച നെറ്റ് റണ്‍റേറ്റുള്ള ടീമും ഗുജറാത്താണ്. 0.761 ആണ് ഗുജറാത്തിന്‍റെ നെറ്റ് റണ്‍റേറ്റ്.
മുംബൈ ഇന്ത്യന്‍സാണ് പോയിന്‍റ് പട്ടികയിലെ മൂന്നാം സ്ഥാനക്കാര്‍ 12 മത്സരങ്ങളില്‍ നിന്നും 14 പോയിന്‍റാണ് രോഹിതിനും സംഘത്തിനുമുള്ളത്. നിലവില്‍ ആദ്യ നാലിലുള്ള ടീമുകളില്‍ നെഗറ്റീവ് നെറ്റ്റണ്‍റേറ്റുള്ള ഏക ടീം മുംബൈയാണ്. ഇനി രണ്ട് മത്സരങ്ങളാണ് അവര്‍ക്ക് ശേഷിക്കുന്നത്.
നിലവില്‍ പോയിന്‍റ് പട്ടികയിലെ നാലാം സ്ഥാനക്കാര്‍ ലഖ്‌നൗ സൂപ്പര്‍ ജയന്‍റ്‌സ് ആണ്. 12 കളിയില്‍ 5ലും ജയിച്ച ലഖ്‌നൗവിന് 13 പോയിന്‍റാണുള്ളത്. സൂപ്പര്‍ ജയന്‍റ്‌സിനെക്കാള്‍ ഒരു പോയിന്‍റ് മാത്രം വ്യത്യാസമുള്ള പഞ്ചാബ് കിങ്‌സ് എട്ടാം സ്ഥാനത്താണ്. എട്ട് പോയിന്‍റോടെ സണ്‍റൈസേഴ്‌സ് ഹൈദരാബാദും ഡല്‍ഹി ക്യാപിറ്റല്‍സുമാണ് അവസാന സ്ഥാനങ്ങളില്‍.
Also Read : '18 കോടിയുടെ ആ മൊതല്‍ എന്തുചെയ്‌തു?'; സാം കറനെ കടന്നാക്രമിച്ച് വിരേന്ദർ സെവാഗ്
