അഹമ്മദാബാദ്: ഐപിഎൽ രണ്ടാം ക്വാളിഫയറിൽ ബാംഗ്ലൂരിനെതിരായ മത്സരത്തിൽ ജോസ് ബട്‍ലർ പുറത്താകാതെ നേടിയ സെഞ്ച്വറിയുടെ കരുത്തിലാണ് രാജസ്ഥാൻ റോയൽസ് കലാശപ്പോരാട്ടത്തിനുള്ള ടിക്കറ്റുറപ്പിച്ചത്. ഈ സെഞ്ച്വറിയോടെ മുൻ ആർസിബി നായകനായ വിരാട് കോലിയുടെ റെക്കോഡുകൾക്ക്ഒപ്പമെത്തിയിരിക്കുകയാണ് ബട്‍ലർ. ഒരു ട്വന്‍റി-20 സീരിസിൽ ഏറ്റവും കൂടുതൽ സെഞ്ച്വറി എന്ന റെക്കോഡാണ് കോലിയും ബട്ലറും ഇപ്പോൾ പങ്കിടുന്നത്.
2016ൽ ആർസിബിക്കായി തകർത്തു കളിച്ച കോലി നാല് സെഞ്ച്വറികൾ സ്വന്തമാക്കിയിരന്നു. അതിനൊപ്പമാണ് ബാംഗ്ലൂരിനെതിരായ സെഞ്ച്വറിയോടെ ബട്ലറും എത്തിയത്. അതോടൊപ്പം, ഐപിഎല്ലിൽ ഏറ്റവും കൂടുതൽ സെഞ്ചുറി നേടിയ താരങ്ങളിൽ രണ്ടാം സ്ഥാനത്തുള്ള കോലിക്ക് ഒപ്പമെത്താനും ഇന്നലത്തെ തിളക്കമാർന്ന പ്രകടനത്തിലൂടെ താരത്തിന് സാധിച്ചു.
ഇരുവർക്കും ഐപിഎല്ലിൽ അഞ്ച് സെഞ്ചുറികളാണുള്ളത്. ആറ് സെഞ്ചുറികളുമായി വിൻഡീസ് ബാറ്റർ ക്രിസ് ഗെയിലാണ് ഒന്നാമത്. ഐപിഎൽ കലാശ പോരിൽ ഗുജറാത്ത് ടൈറ്റൻസിനെ നേരിടുമ്പോൾ തന്‍റെ ഫോം ആവർത്തിക്കാനും റെക്കോർഡ് പുസ്‌തകത്തിൽ ഇടംപിടിക്കാനും ബട്‌ലറിനാകുമോ എന്നാണ് ആരാധകർ ഉറ്റുനോക്കുന്നത്.
