കൊല്‍ക്കത്ത: ഐപിഎല്‍ 16-ാം പതിപ്പില്‍ സ്വപ്‌നതുല്യമായ തുടക്കമാണ് റോയല്‍ ചലഞ്ചേഴ്‌സ് ബാംഗ്ലൂരിനും മുന്‍ നായകന്‍ വിരാട് കോലിക്കും ലഭിച്ചിരിക്കുന്നത്. മുംബൈ ഇന്ത്യന്‍സിനെതിരായ ആദ്യ മത്സരത്തില്‍ വിരാട് കോലി പുറത്താകാതെ 82 റണ്‍സ് നേടിയപ്പോള്‍ മുന്‍ ചാമ്പ്യന്മാര്‍ക്കെതിരെ എട്ട് വിക്കറ്റിന്‍റെ തകര്‍പ്പന്‍ ജയം സ്വന്തമാക്കാന്‍ ആര്‍സിബിക്കായി. മുംബൈ ഉയര്‍ത്തിയ 172 റണ്‍സ് പിന്തുടര്‍ന്നിറങ്ങിയ ആര്‍സിബിക്കായി നായകന്‍ ഫാഫ് ഡുപ്ലെസിസിനൊപ്പം വിരാട് കോലി ഒന്നാം വിക്കറ്റില്‍ 148 റണ്‍സ് കൂട്ടുകെട്ടുമുണ്ടാക്കി.
ഈ അര്‍ധ സെഞ്ച്വറിയോടെ ഐപിഎല്‍ ചരിത്രത്തില്‍ 50ലധികം തവണ ഒരു ഇന്നിങ്‌സില്‍ അര്‍ധ സെഞ്ച്വറിയോ അതില്‍ കൂടുതലോ റണ്‍സ് നേടുന്ന ആദ്യ ഇന്ത്യന്‍ താരമായും കോലി മാറിയിരുന്നു. ഐപിഎല്‍ റണ്‍വേട്ടക്കാരില്‍ ഒന്നാമതുള്ള വിരാട് കോലി ഡേവിഡ് വാര്‍ണറിന് പിന്നാലെ ഈ നേട്ടം സ്വന്തമാക്കുന്ന രണ്ടാമത്തെ താരം കൂടിയാണ്. വിരാട് കോലിയുടെ ഫോം ആദ്യ കിരീടം ലക്ഷ്യമിടുന്ന റോയല്‍ ചലഞ്ചേഴ്‌സ് ബാംഗ്ലൂരിനും ഈ സീസണില്‍ വലിയ പ്രതീക്ഷയാണ്.
ഇതിന് പിന്നാലെ വിരാട് കോലിയുടെ പ്രകടനത്തിനുള്ള കാരണം വ്യക്തമാക്കി രംഗത്തെത്തിയിരിക്കുകയാണ് ആര്‍സിബി മുന്‍താരം എ ബി ഡിവില്ലിയേഴ്‌സ്. ക്യാപ്‌റ്റന്‍ സ്ഥാനം ഒഴിഞ്ഞതോടെ കോലിക്ക് കൂടുതല്‍ ഫ്രീയായി കളിക്കാന്‍ സാധിക്കുന്നുവെന്ന് ഡിവില്ലിയേഴ്‌സ് അഭിപ്രായപ്പെട്ടു.
Also Read: IPL 2023 | ആര്‍ച്ചറെ തല്ലിയൊതുക്കി വിരാട് കോലി, 17 പന്തില്‍ നേടിയത് 28 റണ്‍സ്
'കഴിഞ്ഞ സീസണില്‍ നായകസ്ഥാനം ഒഴിഞ്ഞത് കോലിക്ക് റിലാക്‌സ് ചെയ്‌ത് കളിക്കാനുള്ള അവസരം ഒരുക്കിയതായാണ് ഞാന്‍ കരുതുന്നത്. ഐപിഎല്ലിലും അന്താരാഷ്‌ട്ര തലത്തിലും അവന് ടീമിനെ നല്ല രീതിയിലാണ് നയിച്ചിരുന്നത്. ഇക്കാലയളവില്‍ അവന് കൂടുതല്‍ കാര്യങ്ങള്‍ ആസ്വദിക്കാന്‍ കഴിഞ്ഞിരുന്നില്ല.
എന്നാല്‍ ഇപ്പോള്‍ കാര്യങ്ങള്‍ അങ്ങനെയല്ല. കൂടുതല്‍ ചിരിക്കുന്ന ഒരു വിരാട് കോലിയെ ആണ് ഇപ്പോള്‍ കാണാന്‍ സാധിക്കുന്നത്. അത് അദ്ദേഹത്തിന്‍റെ പ്രകടനത്തിലും കാണാന്‍ കഴിയും'- ഡിവില്ലിയേഴ്‌സ് വ്യക്തമാക്കി.
വിരാട് കോലിയുടെ ബാറ്റിങ് ടെക്‌നിക്കുകളില്‍ അധികം മാറ്റം സംഭവിച്ചിട്ടില്ലെന്നും ഡിവില്ലിയേഴ്‌സ് പറഞ്ഞു. ക്രീസില്‍ നല്ല ബാലന്‍സുള്ള ബാറ്ററാണ് അവന്, മൈതാനത്ത് എപ്പോഴും ഊര്‍ജസ്വലതയുള്ള കളിക്കാരനായി തന്നെയാണ് വിരാടിനെ കാണാന്‍ സാധിക്കുന്നതെന്നും ഡിവില്ലിയേഴ്‌സ് കൂട്ടിച്ചേര്‍ത്തു. ഈ സീസണിലെ വിരാട് കോലിയുടെ മികച്ച പ്രകടനം തന്നെ കാണാന്‍ സാധിക്കുമെന്നാണ് താന്‍ കരുതുന്നതെന്നും ഡിവില്ലിയേഴ്‌സ് പറഞ്ഞു.
അതേസമയം, ഐപിഎല്ലിലെ രണ്ടാം മത്സരത്തില്‍ റോയല്‍ ചലഞ്ചേഴ്‌സ് ബാംഗ്ലൂര്‍ ഇന്ന് കളത്തിലിറങ്ങും. ഈഡന്‍ ഗാര്‍ഡന്‍സില്‍ ആതിഥേയരായ കൊല്‍ക്കത്ത നൈറ്റ് റൈഡേഴ്‌സാണ് ബാംഗ്ലൂരിന്‍റെ എതിരാളികള്‍. രാത്രി ഏഴരയ്‌ക്കാണ് മത്സരം ആരംഭിക്കുന്നത്.
ആദ്യ മത്സരത്തില്‍ മുംബൈ ഇന്ത്യന്‍സിനെ വീഴ്‌ത്തിയ ആര്‍സിബി നിലവില്‍ പോയിന്‍റ് പട്ടികയില്‍ മൂന്നാം സ്ഥാനത്താണ്. പഞ്ചാബിനെതിരായ ആദ്യ മത്സരത്തില്‍ കൊല്‍ക്കത്ത പരാജയപ്പെട്ടിരുന്നു. ഹോം ഗ്രൗണ്ടില്‍ സീസണിലെ ആദ്യ ജയം തേടിയാണ് കൊല്‍ക്കത്ത നൈറ്റ് റൈഡേഴ്‌സ് ഇന്ന് ഇറങ്ങുന്നത്.
