മുംബൈ: ഏകദിന ലോകകപ്പിൽ (Cricket World Cup 2023) ഇതുവരെ കളിച്ച ഏഴ്‌ മത്സരങ്ങളും വിജയിച്ച ഇന്ത്യ സെമി ഫൈനല്‍ ഉറപ്പിച്ച് കഴിഞ്ഞു. ഇതിനിടെ മധ്യനിര ബാറ്റര്‍ ശ്രേയസ് അയ്യര്‍ക്ക് (Shreyas Iyer) ചില വിമര്‍ശനങ്ങള്‍ നേരിടേണ്ടി വന്നിരുന്നു. ടീമിന്‍റെ ആദ്യ ആറ് മത്സരങ്ങളില്‍ നിന്നു ഒരു അര്‍ധസെഞ്ചുറി ഉള്‍പ്പടെ 134 റണ്‍സ് മാത്രമായിരുന്നു ശ്രേയസിന് നേടാന്‍ കഴിഞ്ഞത്. ഇതില്‍ ഏറിയ മത്സരങ്ങളിലും ഷോട്ട് ബോളുകളിലായിരുന്നു ശ്രേയസ് പുറത്തായത്.
ഇതോടെ ഷോട്ട് ബോള്‍ കളിക്കാന്‍ അറിയാത്ത താരമെന്ന കടുത്ത വിമര്‍ശനമാണ് 28-കാരന് നേരിടേണ്ടി വന്നത് (Shreyas Iyer Short Ball Issue). ഇതു സംബന്ധിച്ച് വാര്‍ത്ത സമ്മേളനത്തില്‍ ഉയര്‍ന്ന ചോദ്യത്തോട് രൂക്ഷമായി ആയിരുന്നു ശ്രേയസ് മറുപടി നല്‍കിയത്. ഇതിന് പിന്നാലെ വിഷയത്തില്‍ ഇടിവി ഭാരതിനോട് പ്രതികരിച്ചിരിക്കുകയാണ് താരത്തിന്‍റെ അച്ഛന്‍ സന്തോഷ് അയ്യര്‍ (Shreyas Iyer father Santosh Iyer). ഷോട്ട് ബോളില്‍ ശ്രേയസ് പ്രയാസപ്പെടുന്നുവെന്നത് തെറ്റായ വ്യാഖ്യാനമാണെന്നാണ് അദ്ദേഹം പറയുന്നത്.
"ഷോട്ട് ബോളുകള്‍ക്ക് എതിരെ അവന് പ്രയാസപ്പെടുന്നുവെന്ന് പറയുന്നത് തീര്‍ത്തും തെറ്റാണ്. അവനൊരു മികച്ച കളിക്കാരനാണ്. എല്ലാ കളിക്കാര്‍ക്കും അവരുടെ ഗെയിമില്‍ ചില പോസിറ്റീവും നെഗറ്റീവുമുണ്ട്, മുന്നോട്ട് പോകുമ്പോൾ അവർ അതിൽ പ്രവർത്തിക്കണം", സന്തോഷ് അയ്യര്‍ പറഞ്ഞു.
ഏകദിന ലോകകപ്പിലെ ഏഴാം മത്സരത്തില്‍ ശ്രീലങ്കയ്‌ക്ക് എതിരെ തകര്‍പ്പന്‍ പ്രകടനം നടത്താന്‍ ശ്രേയസിന് കഴിഞ്ഞിരുന്നു. 56 പന്ത് നേരിട്ട ശ്രേയസ് അയ്യര്‍ 82 റണ്‍സ് നേടിയാണ് മടങ്ങിയത്. മത്സരത്തില്‍ ടീം ടോട്ടല്‍ 300 കടത്തുന്നതില്‍ ശ്രേയസിന്‍റെ ഈ മികവ് നിര്‍ണായകമാവുകയും ചെയ്‌തു. തനിക്ക് നേരിടേണ്ടി വന്ന സമ്മര്‍ദം ശ്രീലങ്കയ്‌ക്ക് എതിരായ മത്സരത്തിലൂടെ മറികടക്കാന്‍ ശ്രേയസിന് കഴിഞ്ഞതായും സന്തോഷ് അയ്യര്‍ പറഞ്ഞു.
"അവസാന മത്സരം ഇന്ത്യയെ സംബന്ധിച്ചിടത്തോളം ഉജ്ജ്വലമായിരുന്നു. ടീമിനെ വൻ ടോട്ടലിലേക്ക് നയിക്കുന്നതില്‍ ശ്രേയസിന്‍റെ പ്രകടനം പ്രധാന പങ്കുവഹിച്ചു. കുറച്ച് മത്സരങ്ങളില്‍ കുറഞ്ഞ സ്‌കോറുകൾ നേടിയതിന് ശേഷം കടുത്ത സമ്മര്‍ദമാണ് അവന് നേരിടേണ്ടി വന്നത്.
ഒരു പരിധി വരെ കളിക്കളത്തിന് പുറത്ത് നിന്നുള്ളവരും മാധ്യമങ്ങളും അവനെ ബാധിച്ചു. പക്ഷേ അതിനെ മറികടക്കാനുള്ള ദൃഢനിശ്ചയമാണ് അവന് പ്രകടിപ്പിച്ചത്", അദ്ദേഹം പറഞ്ഞു. ശ്രേയസിന്‍റെ ആത്മവിശ്വാസവും ഒരിക്കലും തളരാത്ത മനോഭാവവുമാണ് പ്രൊഫഷണൽ ക്രിക്കറ്റർ എന്ന നിലയിൽ വിജയിക്കാൻ യുവാക്കൾക്ക് അനുകരിക്കാവുന്ന ഗുണങ്ങളെന്നും സന്തോഷ് കൂട്ടിച്ചേര്‍ത്തു.
ALSO READ: 'ഷോട്ട് ബോളുകളാണോ എന്നെ ബുദ്ധിമുട്ടിക്കുന്നത്...?' മാധ്യമപ്രവര്‍ത്തകനോട് ചൂടായി ശ്രേയസ് അയ്യര്‍
