ന്യൂഡല്‍ഹി : ഏകദിന ലോകകപ്പിലെ (Cricket World Cup 2023) രണ്ടാം മത്സരത്തില്‍ അഫ്‌ഗാനിസ്ഥാനെതിരെ 8 വിക്കറ്റിന്‍റെ തകര്‍പ്പന്‍ ജയമാണ് ഇന്ത്യ സ്വന്തമാക്കിയത് (India vs Afghanistan Match Result). ഡല്‍ഹിയിലെ അരുണ്‍ ജെയ്‌റ്റ്‌ലി സ്റ്റേഡിയത്തില്‍ നടന്ന മത്സരത്തില്‍ അഫ്‌ഗാനിസ്ഥാന്‍ ഉയര്‍ത്തിയ 273 റണ്‍സ് വിജയലക്ഷ്യം 90 പന്തുകള്‍ ശേഷിക്കെയായിരുന്നു ഇന്ത്യ മറികടന്നത്. നായകന്‍ രോഹിത് ശര്‍മയുടെ തകര്‍പ്പന്‍ സെഞ്ച്വറിയും വിരാട് കോലിയുടെ അര്‍ധസെഞ്ച്വറിയുമായിരുന്നു മത്സരത്തില്‍ ടീം ഇന്ത്യയ്‌ക്ക് എളുപ്പത്തില്‍ ഒരു ജയം സമ്മാനിച്ചത്.
തുടക്കം മുതല്‍ തകര്‍ത്തടിച്ച ഇന്ത്യന്‍ നായകന്‍ രോഹിത് ശര്‍മ 84 പന്തില്‍ 131 റണ്‍സ് നേടിയാണ് പുറത്തായത്. 155.95 പ്രഹരശേഷിയില്‍ ബാറ്റ് വീശിയ ഇന്ത്യന്‍ നായകന്‍ 16 ഫോറും അഞ്ച് സിക്‌സറുകളുമാണ് മത്സരത്തില്‍ അടിച്ചെടുത്തത്. മത്സരത്തില്‍ അഫ്‌ഗാന്‍ ബൗളര്‍മാരെ ഇത്രയും തവണ ഗാലറിയിലേക്ക് അടിച്ചുപറത്തിയതോടെ ഒരു റെക്കോഡും രോഹിത് ശര്‍മ തന്‍റെ പേരിലാക്കി.
അന്താരാഷ്‌ട്ര ക്രിക്കറ്റില്‍ കൂടുതല്‍ സിക്‌സറുകള്‍ നേടുന്ന താരമായിട്ടാണ് ഹിറ്റ്‌മാന്‍ രോഹിത് ശര്‍മ മാറിയത്. ക്രിക്കറ്റിന്‍റെ മൂന്ന് ഫോര്‍മാറ്റില്‍ നിന്നായി 553 സിക്‌സറുകള്‍ നേടിയിട്ടുള്ള ക്രിസ് ഗെയിലിന്‍റെ റെക്കോഡാണ് അഫ്‌ഗാനെതിരായ പ്രകടനത്തോടെ രോഹിത് ശര്‍മ മറികടന്നത്. നിലവില്‍ 453 മത്സരങ്ങളില്‍ നിന്നായി 556 സിക്‌സറുകളാണ് രോഹിത് ഗാലറിയിലേക്ക് എത്തിച്ചിട്ടുള്ളത്.
പാക് മുന്‍ താരം ഷാഹിദ് അഫ്രീദിയാണ് ഈ പട്ടികയില്‍ മൂന്നാമന്‍. 524 മത്സരങ്ങളില്‍ നിന്നും 476 സിക്‌സറുകളാണ് അഫ്രീദി അടിച്ചെടുത്തത്. 398 സിക്‌സറുകള്‍ നേടിയ മുന്‍ ന്യൂസിലന്‍ഡ് താരവും നിലവില്‍ ഇംഗ്ലണ്ട് ടെസ്റ്റ് ടീമിന്‍റെ പരിശീലകനുമായ ബ്രണ്ടന്‍ മക്കല്ലമാണ് പട്ടികയിലെ നാലാമന്‍ (Most Sixes In International Cricket).
അഫ്‌ഗാനിസ്ഥാനെതിരായ മിന്നും പ്രകടനത്തോടെ ലോകകപ്പില്‍ കൂടുതല്‍ സെഞ്ച്വറികള്‍ നേടുന്ന താരമാകാനും രോഹിത് ശര്‍മയ്‌ക്ക് സാധിച്ചിരുന്നു. ഇന്ത്യയുടെ മുന്‍താരം സച്ചിന്‍ ടെണ്ടുല്‍ക്കറിന്‍റെ പേരിലുണ്ടായിരുന്ന റെക്കോഡാണ് രോഹിത് മറികടന്നത്. ലോകകപ്പ് കരിയറിലെ ഏഴാമത്തെ സെഞ്ച്വറിയിലൂടെയാണ് രോഹിത് ശര്‍മ സച്ചിന്‍റെ റെക്കോഡ് തകര്‍ത്തത്.
1992-2011 കാലയളവില്‍ നടന്ന ആറ് ലോകകപ്പുകളില്‍ ഇന്ത്യയ്‌ക്കായി കളിച്ച സച്ചിന്‍ ടെണ്ടുല്‍ക്കര്‍ ആറ് സെഞ്ച്വറികളായിരുന്നു നേടിയിരുന്നത്. 45 മത്സരങ്ങളില്‍ നിന്നായിരുന്നു സച്ചിന്‍റെ സെഞ്ച്വറി നേട്ടം. എന്നാല്‍, ലോകകപ്പ് കരിയറിലെ 19-ാം മത്സരത്തിലാണ് രോഹിത് സച്ചിന്‍റെ റെക്കോഡ് മറികടന്നത്. രോഹിതിന്‍റെ ഏഴ് ലോകകപ്പ് സെഞ്ച്വറികളില്‍ അഞ്ചും പിറന്നത് 2019ല്‍ ആയിരുന്നു.
