ന്യൂഡൽഹി : മഹേന്ദ്ര സിങ് ധോണിയെ ഇന്ത്യന്‍ ക്രിക്കറ്റ് ടീമിന്‍റെ ഉപദേശകനാക്കാനുള്ള തീരുമാനം മികച്ചതാണെന്ന് മുൻ ഇന്ത്യൻ താരം വിരേന്ദർ സെവാഗ്. വൈറ്റ് ബോൾ ക്രിക്കറ്റിൽ ധോണി ബൗളർമാരുടെ ക്യാപ്റ്റനായിരുന്നു എന്നും അതിനാൽ അദ്ദേഹത്തിന്‍റെ സാന്നിധ്യം ഇന്ത്യൻ ബൗളർമാർക്ക് ഏറെ ഗുണം ചെയ്യുമെന്നും സെവാഗ് അഭിപ്രായപ്പെട്ടു.
'ധോണി ബിസിസിഐയുടെ ആവശ്യം സ്വീകരിച്ചതിൽ അതിയായ സന്തോഷമുണ്ട്. ധോണി വീണ്ടും മുഖ്യധാരയിലേക്ക് തിരിച്ചുവരണം എന്നതാണ് എല്ലാവരെപ്പോലെ തന്‍റെയും ആഗ്രഹം. അത് ഉപദേശകന്‍റെ വേഷത്തിലാകുമ്പോൾ കൂടുതൽ സന്തോഷം' - സെവാഗ് പറഞ്ഞു.
വിക്കറ്റ് കീപ്പർ എന്ന നിലയിലും, ഫീൽഡിങ് പ്ലെയ്‌സ്മെന്‍റിലും ധോണിയുടെ കഴിവ് അസാധ്യമാണ്. അതിനാൽ ധോണിയുടെ തന്ത്രപരമായ നിർദേശങ്ങൾ ഉപയോഗിച്ച് ബൗളർമാർക്ക് മികച്ച പ്രകടനം കാഴ്‌ചവയ്ക്കാൻ സാധിക്കും.
