പൊച്ചെസ്‌ട്രോം; തുടർച്ചയായ രണ്ടാം അണ്ടർ 19 ലോകകപ്പ് കിരീടം ലക്ഷ്യമിട്ട് ടീം ഇന്ത്യ ദക്ഷിണാഫ്രിക്കയിലേക്ക് വണ്ടി കയറുമ്പോൾ കപ്പ് ഇന്ത്യയിലേക്ക് വരുമെന്ന് ആരാധകർ ഉറപ്പിച്ചതാണ്. അത്രമേല്‍ ശക്തമായ ബാറ്റിങ്, ബൗളിങ് നിരയുമായാണ് ഇന്ത്യ ലോകകപ്പിന് ഒരുങ്ങിയത്. ലോകകപ്പ് മത്സരങ്ങൾ തുടങ്ങിയ ശേഷവും ഇന്ത്യ ഒട്ടും മോശമാക്കിയില്ല. ബാറ്റിങില്‍ യശസ്വി ജയ്‌സ്വാൾ എന്ന യുവ സൂപ്പർ താരവും നായകൻ പ്രിയം ഗാർഗ്, ധ്രുവ് ജുറൈല്‍, തിലക് വർമ അടക്കമുള്ള താരങ്ങളുടെ ബാറ്റിങ് മികവും എതിരാളികളെ തകർത്ത് മുന്നേറാൻ ഇന്ത്യയെ സഹായിച്ചു.
കാർത്തിക് ത്യാഗി, രവി ബിഷ്ണോയി എന്നി ബൗളർമാർ ഏത് ടീമിന്‍റെയും ബാറ്റിങ് നിരയ്ക്ക് ശക്തമായ വെല്ലുവിളിയായി. ഫൈനലല്‍ വരെയുള്ള ടീം ഇന്ത്യയുടെ ജയത്തുടർച്ച അണ്ടർ 19 ലോകകപ്പിലെ മറ്റൊരു റെക്കോഡ് കൂടിയായി. എന്നാല്‍ കലാശപ്പോരിന് ബംഗ്ലാദേശ് എത്തിയതോടെ കളി മാറി. ആദ്യ പന്തു മുതല്‍ ഇന്ത്യയെ വരിഞ്ഞുമുറുക്കിയ ബംഗ്ലാദേശ് മത്സരത്തില്‍ ഒരു പഴുതുപോലും അനുവദിക്കാതെയാണ് ബൗൾ ചെയ്തത്. ഫീല്‍ഡില്‍ പഴയ ദക്ഷിണാഫ്രിക്കൻ ടീമിനെ അനുസ്മരിപ്പിക്കും വിധം പന്തുകൾ തടഞ്ഞ ബംഗ്ലാ ഫീല്‍ഡർമാർ ആദ്യ പത്ത് ഓവറില്‍ തന്നെ കിരീടം സ്വന്തമാക്കിയിരുന്നു.
അടിച്ചു കളിക്കാൻ മറന്ന ഇന്ത്യൻ മുൻനിര വിക്കറ്റുകൾ ദാനം നല്‍കിയപ്പോൾ വിക്കറ്റുകൾക്കിടയില്‍ ഓടാൻ പോലും മറന്നു. രണ്ട് റണ്ണൗട്ടുകളും സ്കൂൾ നിലവാരത്തിലേക്കാണ് ഇന്ത്യയെ കൊണ്ടു പോയത്. പണ്ട് ഓസ്ട്രേലിയ നടത്തിയിരുന്ന സ്ലെഡ്‌ജിങും പിച്ചിലേക്ക് ഓടിയെത്തി ആക്രോശിച്ചും ബംഗ്ലാ താരങ്ങൾ മത്സരം അവരുടേതാക്കി മാറ്റി. ബംഗ്ലാദേശ് ബാറ്റ് ചെയ്യാനെത്തിയപ്പോഴും കാര്യങ്ങൾക്ക് മാറ്റമുണ്ടായില്ല. 33 എക്‌സ്‌ട്രാ റൺസ് വഴങ്ങിയ ഇന്ത്യൻ ബൗളർമാർ ഇടയ്ക്കിടെ വിക്കറ്റുകൾ വീഴ്ത്തിയെങ്കിലും ബംഗ്ലാദേശ് നായകൻ അക്‌ബർ അലിയുടെ മനസാന്നിധ്യത്തെ കീഴടക്കാനായില്ല.
കൈവിട്ട ക്യാച്ചുകൾ കൂടിയായപ്പോൾ ഇന്ത്യയ്ക്ക് നഷ്ടമായത് തുടർച്ചയായ രണ്ടാം ലോക കിരീടമാണ്. ആദ്യ ക്രിക്കറ്റ് ലോകകപ്പ് കിരീടവുമായി ബംഗ്ലാദേശ് മടങ്ങുമ്പോൾ കളി മറന്ന ഇന്ത്യയ്ക്ക് അടുത്ത ലോകകപ്പിനായി കാത്തിരിക്കാം.
