മലയാളത്തിന്‍റെപ്രിയതാരം ജഗതി ശ്രീകുമാർ വീണ്ടും ക്യാമറക്ക് മുന്നിലെത്തുന്നു. മകൻ രാജ്‌കുമാറിന്‍റെ പരസ്യസ്ഥാപനം നിര്‍മിക്കുന്ന പരസ്യചിത്രത്തിലൂടെയാണ് ജഗതി ശ്രീകുമാർ അഭിനയത്തിലേക്ക് തിരിച്ചെത്തുന്നത്. സിൽവർ സ്റ്റോം വാട്ടർ തീം പാർക്കിന്‍റെപരസ്യത്തിലാണ് ജഗതി പ്രത്യക്ഷപ്പെടുക എന്നാണ് റിപ്പോർട്ട്. ഏഴ് വർഷം മുമ്പുണ്ടായ വാഹനാപകടത്തില്‍ പരിക്കേറ്റതിനെ തുടർന്ന് അഭിനയത്തിൽ നിന്നും വിട്ടുനിൽക്കുന്ന താരം അഭിനയത്തിലേക്ക് തിരിച്ചെത്തുന്നതിന്‍റെ സന്തോഷത്തിലാണ് കുടുംബവും സുഹൃത്തുക്കളും ആരാധകരും.
പരസ്യചിത്രത്തിൽ ജഗതി ശ്രീകുമാറിനൊപ്പം അഭിനയിക്കുന്നത് ഭാര്യയും രണ്ടു മക്കളും കൊച്ചുമക്കളും ആണ്. അഭിനയത്തിൽ സജീവമാകുന്നത് വഴി താരത്തിന്‍റെ ആരോഗ്യസ്ഥിതിയിൽ പുരോഗതിയുണ്ടാകുമെന്നും തിരിച്ചുവരവിന് വേഗത കൂടുമെന്നും ഡോക്ടർമാർ പറഞ്ഞതായി മകൻ രാജ് കുമാർ പറയുന്നു.
ഏഴ് വർഷം മുമ്പ് ഒരു മാർച്ച് മാസത്തിലായിരുന്നു മലയാളികൾ ഞെട്ടലോടെ ആ അപകടവാർത്ത കേട്ടത്. മലപ്പുറം തേഞ്ഞിപ്പാലത്ത് വച്ചുണ്ടായ വാഹനാപകടത്തിൽ ഗുരുതരമായ പരിക്കുകളാണ് മലയാളികളുടെ പ്രിയതാരത്തിന് ഉണ്ടായത്. ഏറെ നാൾ നീണ്ട ചികിത്സക്ക്ശേഷമാണ് ഇപ്പോൾ വീണ്ടും ക്യാമറക്ക് മുന്നിലേക്ക് വരാൻ ഒരുങ്ങുന്നത്.
