വത്തിക്കാന്‍ സിറ്റി: പതിനെട്ടാം നൂറ്റാണ്ടില്‍ ക്രിസ്‌തുമതം സ്വീകരിച്ച ദേവസഹായം പിള്ളയെ വിശുദ്ധനായി പ്രഖ്യാപിച്ചു. വത്തിക്കാനിലെ സെന്‍റ് പീറ്റേഴ്‌സ് ചത്വരത്തില്‍ നടന്ന ചടങ്ങില്‍ ഫ്രാന്‍സിസ് മാര്‍പ്പാപ്പയാണ് പ്രഖ്യാപനം നടത്തിയത്. വിശുദ്ധനായി പ്രഖ്യാപിക്കപ്പെടുന്ന ഇന്ത്യയില്‍ നിന്നുള്ള ആദ്യത്തെ സാധാരണക്കാരനാണ് ദേവസഹായം പിള്ള.
1712-ല്‍ പഴയ തിരുവിതാംകൂര്‍ രാജ്യത്തിന്‍റെ ഭാഗമായിരുന്ന കന്യാകുമാരി ജില്ലയിലെ മാര്‍ത്താണ്ഡത്തിന് സമീപമുള്ള നട്ടാലത്ത് എന്ന സ്ഥലത്തെ ഒരു നായര്‍ കുടുംബത്തിലാണ് പിള്ളയുടെ ജനനം. ഹിന്ദു നായര്‍ കുടുംബത്തില്‍ ജനിച്ച അദ്ദേഹത്തിന്‍റെ പേര് നീലകണ്‌ഠ പിള്ള എന്നായിരുന്നു. 1745-ലാണ് ക്രിസ്‌തുമതം സ്വീകരിച്ച പിള്ള "ലസാറസ്" എന്ന പേര് സ്വീകരിച്ചത്.
കോട്ടാർ രൂപതയുടെയും തമിഴ്‌നാട് ബിഷപ്പ്‌സ് കൗൺസിലിന്റെയും കോൺഫറൻസ് ഓഫ് കാത്തലിക് ബിഷപ്‌സ് ഓഫ് ഇന്ത്യയുടെയും അഭ്യർത്ഥന മാനിച്ച് 2004-ലാണ് വാഴ്ത്തപ്പെട്ടവനാക്കാനുള്ള നടപടിക്രമത്തിനായി ദേവസഹായത്തെ ശുപാർശ ചെയ്‌തത്. അദ്ദേഹം ജനിച്ച് 300 വര്‍ഷങ്ങള്‍ക്ക് ശേഷം 2012 ഡിസംബര്‍ രണ്ടിന് കോട്ടൂരില്‍ വെച്ചാണ് വാഴ്‌ത്തപ്പെട്ടവരുടെ നിരയിലേക്ക് ഉയര്‍ത്തിയത്.
വത്തിക്കാനിലെ സെന്‍റ് പീറ്റേഴ്‌സ് ബസിലിക്കയിൽ നടന്ന വിശുദ്ധീകരണ കുർബാനയിൽ വാഴ്ത്തപ്പെട്ട ദേവസഹായം പിള്ള ഉള്‍പ്പടെ പത്ത് പേരെയാണ് ഫ്രാൻസിസ് മാർപാപ്പ വിശുദ്ധരായി പ്രഖ്യാപിച്ചത്.
