ടെല്‍ അവീവ് (ഇസ്രയേല്‍) : ബന്ദികളാക്കിയ 50 ഇസ്രയേല്‍ പൗരന്മാരെ വിട്ടയയ്‌ക്കുമെന്ന് ഹമാസ്. നാല് ദിവസത്തെ വെടി നിര്‍ത്തലിനും ഇരു വിഭാഗവും തമ്മില്‍ ധാരണയായി (Hamas release 50 Hostages and ceasefire deal by Israel). കരാര്‍ ഇസ്രയേല്‍ കാബിനറ്റ് അംഗീകരിച്ചതായി പ്രധാനമന്ത്രി ബെഞ്ചമിന്‍ നെതന്യാഹുവിന്‍റെ ഓഫിസ് അറിയിച്ചു. അതേസമയം കരാറിനെ എത്ര മന്ത്രിമാര്‍ പിന്തുണച്ചു എന്നതില്‍ വ്യക്തതയില്ല.
ബന്ദികളാക്കപ്പെട്ട മുഴുവന്‍ ആളുകളെയും തിരിച്ച് സ്വന്തം നാട്ടിലെത്തിക്കാന്‍ ഇസ്രയേല്‍ ഭരണകൂടം പ്രതിജ്ഞാബദ്ധമാണെന്ന് നെതന്യാഹു വ്യക്തമാക്കി. ഹമാസ് തട്ടിക്കൊണ്ടുപോയ സ്‌ത്രീകളും കുട്ടികളും അടങ്ങുന്ന സംഘത്തെയാണ് ആദ്യഘട്ടത്തില്‍ മോചിപ്പിക്കുന്നത്. വെടി നിര്‍ത്തല്‍ നിലനില്‍ക്കുന്ന ദിവസങ്ങളിലാകും ബന്ദികളെ മോചിപ്പിക്കുക എന്നും സൂചനയുണ്ട് (Israel Hamas conflict latest).
അതേസമയം താത്‌കാലിക വെടി നിര്‍ത്തലിന് ശേഷം യുദ്ധം തുടരുമെന്നും നെതന്യാഹു വ്യക്തമാക്കി (ceasefire deal between Israel and Hamas). 'ബന്ദികളാക്കിയ മുഴുവന്‍ പേരെയും മോചിപ്പിക്കുന്നതിനും ഹമാസിനെ ഉന്‍മൂലനം ചെയ്യുന്നതിനും ഇസ്രയേലിന് ഗാസ വെല്ലുവിളി ആകില്ലെന്ന് ഉറപ്പിക്കുന്നതിനും വേണ്ടി യുദ്ധം തുടരും' -നെതന്യാഹു പറഞ്ഞു.
ഇസ്രയേലിന്‍റെ തടവില്‍ കഴിയുന്ന 150 പലസ്‌തീനികളെ മോചിപ്പിക്കുമെന്നും കരാറിന്‍റെ ഭാഗമായി ഗാസയിലേക്ക് അധിക ഇന്ധനം, മാനുഷിക സഹായം എന്നിവ എത്തിക്കുമെന്നും നേരത്തെ റിപ്പോട്ടുകള്‍ വന്നിരുന്നു. എന്നാല്‍ ഇത്തരം കാര്യങ്ങളൊന്നും നെതന്യാഹുവിന്‍റെ ഓഫിസ് ഇറക്കിയ പ്രസ്‌താവനയില്‍ പറയുന്നില്ലെന്നാണ് ഇസ്രയേലി മാധ്യമങ്ങള്‍ റിപ്പോര്‍ട്ട് ചെയ്യുന്നത്. യുഎസും ഖത്തറും ഇടനിലക്കാരായി ഉണ്ടാക്കിയ ഉടമ്പടി എപ്പോള്‍ പ്രാബല്യത്തില്‍ വരും എന്നകാര്യത്തിലും വ്യക്തതയില്ല.
ഇക്കഴിഞ്ഞ ഒക്‌ടോബര്‍ 7ന് ഹമാസ്, അതിര്‍ത്തി കടന്ന് ഇസ്രയേലില്‍ എത്തുകയും 1200 പേരെ വധിക്കുകയും നൂറുകണക്കിന് ആളുകളെ ബന്ദികളാക്കുകയും ചെയ്‌തതോടെയാണ് യുദ്ധം പൊട്ടിപ്പുറപ്പെട്ടത്. മരിച്ചവരില്‍ ഭൂരിഭാഗവും സാധാരണക്കാരാണെന്നും ബന്ദികളാക്കപ്പെട്ടവരില്‍ സ്‌ത്രീകളും കുട്ടികളും പ്രായമായവരും ഉള്‍പ്പെടുന്നു എന്നുമാണ് ലഭ്യമായ വിവരം. ഗാസയില്‍ ആഴ്‌ചകള്‍ നീണ്ട വ്യോമാക്രമണം നടത്തിയാണ് ഇസ്രയേല്‍ തിരിച്ചടിച്ചത്.
ആക്രമണത്തില്‍ 11000 പലസ്‌തീനികള്‍ക്ക് ജീവന്‍ നഷ്‌ടപ്പെട്ടതായി ആരോഗ്യ മന്ത്രാലയം വ്യക്തമാക്കി. മരിച്ചവരില്‍ മൂന്നില്‍ രണ്ട് ഭാഗം സ്‌ത്രീകളും പ്രായപൂര്‍ത്തിയാകാത്തവരും ആയിരുന്നു എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. ഇസ്രയേല്‍ ആക്രമണം ഗാസ സിറ്റി ഉള്‍പ്പെടെയുള്ള വടക്കന്‍ ഗാസയില്‍ വന്‍ തോതിലുള്ള നാശത്തിന് കാരണമായി.
ഏകദേശം 1.7 ദശലക്ഷം ആളുകളെയാണ് മാറ്റി പാര്‍പ്പിച്ചത്. കൂടാതെ ഭക്ഷണം, മരുന്ന്, ഇന്ധനം തുടങ്ങിയ അവശ്യ വസ്‌തുക്കളുടെ ക്ഷാമം വലിയ പ്രതിസന്ധിക്കും കാരണമായി. അന്താരാഷ്‌ട്ര തലത്തില്‍ ഇസ്രയേലിന് രൂക്ഷ വിമര്‍ശനങ്ങളാണ് നേരിടേണ്ടി വരുന്നത്. എന്നാല്‍ വിമര്‍ശനങ്ങള്‍ക്ക് ചെവികൊടുക്കാതെ ഹമാസിനെതിരെയുള്ള യുദ്ധം തുടരാനുറച്ച് മുന്നോട്ടു പോകുകയാണ് ഇസ്രയേല്‍.
Also Read: ഗാസയിലെ ബന്ദികളെ മോചിപ്പിക്കണം, ഇസ്രയേല്‍ സര്‍ക്കാരിനോട് നടപടി ആവശ്യപ്പെട്ട് കൂറ്റന്‍ റാലി
