സാൻഫ്രാൻസിസ്കോ : സമൂഹമാധ്യമ പ്ലാറ്റ്‌ഫോമായ ട്വിറ്ററിനെ റീബ്രാൻഡ് ചെയ്യാൻ പദ്ധതിയിടുന്നതായി ഉടമ ഇലോൺ മസ്‌ക്. മൈക്രോ ബ്ലോഗിങ് പ്ലാറ്റ്‌ഫോമിന്‍റെ 'ബ്ലൂ ബേഡ്' ലോഗോയ്ക്ക് പകരം 'എക്‌സ്' ലോഗോ ഉടൻ നൽകുമെന്ന് ട്വീറ്റിലൂടെയാണ് ഇലോൺ മസ്‌ക് പ്രഖ്യാപിച്ചത്. മസ്‌കിന്‍റെ ട്വീറ്റ് പുറത്തുവന്നതോടെ പുതിയ മാറ്റത്തെക്കുറിച്ചുള്ള ചർച്ചകളാണ് സാമൂഹിക മാധ്യമങ്ങളിലെല്ലാം നിറഞ്ഞുനിൽക്കുന്നത്. കഴിഞ്ഞ വർഷം ഉടമസ്ഥാവകാശം ഏറ്റെടുത്തത് മുതൽ ട്വിറ്ററിൽ മസ്‌കിന്‍റെ പരീക്ഷണങ്ങൾക്കാണ് ടെക് ലോകം സാക്ഷിയായിക്കൊണ്ടിരിക്കുന്നത്.
'സത്യസന്ധമായി പറഞ്ഞാൽ, ഈ പ്ലാറ്റ്‌ഫോമിലെ നെഗറ്റീവ് ഫീഡ്‌ബാക്കുകൾ ഞാൻ ഇഷ്‌ടപ്പെടുന്നു. ചില വെറുപ്പുളവാക്കുന്ന സെൻസർഷിപ്പ് ബ്യൂറോയേക്കാൾ വളരെ അഭികാമ്യമാണത്'. ഈ ട്വീറ്റിന് പിന്നാലെയാണ് 'ഉടൻ തന്നെ ഞങ്ങൾ ട്വിറ്റർ ബ്രാൻഡിനോടും ക്രമേണ എല്ലാ പക്ഷികളോടും വിടപറയും എന്ന പ്രസ്‌താവനയുമായി മസ്‌ക് രംഗത്തെത്തിത്. 'ഇന്ന് രാത്രി മികച്ച 'എക്‌സ്' ലോഗോ ലഭിച്ചാൽ ലോകമെമ്പാടും അത് നിലവിൽ വരുമെന്ന് മറ്റൊരു ട്വീറ്റിൽ മസ്‌ക് അറിയിച്ചതോടെയാണ് റീബ്രാൻഡിങ് കൂടുതൽ ചർച്ചയായത്. ഏകദേശം അരമണിക്കൂറിനുശേഷം, 'എക്‌സ്' ലോഗോ ഹൈലൈറ്റ് ചെയ്യുന്ന ഒരു വീഡിയോ അദ്ദേഹം പോസ്റ്റ് ചെയ്‌തു. അത് നിലവിലെ 'നീല പക്ഷി'യ്‌ക്ക് പകരമായാകുമെന്നാണ് ടെക് ലോകം പ്രതീക്ഷിക്കുന്നത്.
റീബ്രാൻഡിങ് ചെയ്യാനുള്ള മസ്‌കിന്‍റെ തീരുമാനത്തെക്കുറിച്ച് നിരവധി ഉപയോക്താക്കളാണ് പ്രതികരിച്ചത്. ഒക്കുലസിന്‍റെ നല്ല പേരിനെ തകർത്ത് ഫേസ്ബുക്ക് ആക്കിക്കൊണ്ട് സക്കർബർഗ് (Mark Zuckerberg) ചെയ്‌ത തെറ്റ് നിങ്ങൾ ചെയ്യരുത്. അങ്ങനെ ചെയ്‌താൽ പൂർണമായും ട്വിറ്റർ പ്ലാറ്റ്‌ഫോം നിങ്ങളെക്കുറിച്ച് മാത്രമാകും.
നിലവിൽ 'ബ്ലൂബേഡ്' ആണ് ട്വിറ്ററിന്‍റെ ഔദ്യോഗിക ലോഗോ. ഈ ലോഗോയാണ് ട്വിറ്ററിനെ തിരിച്ചറിയാൻ ഏറ്റവും കൂടുതൽ സഹായിക്കുന്നതെന്നാണ് ട്വിറ്ററിന്‍റെ വെബ്‌സൈറ്റിൽ സൂചിപ്പിക്കുന്നത്. അതുകൊണ്ടുതന്നെ അതിനെ സംരക്ഷിക്കുമെന്നായിരുന്നു അധികൃതരുടെ നിലപാട്. കഴിഞ്ഞ ഏപ്രിലിൽ ബ്ലൂബേഡിന് പകരം ട്രോൾ ചിത്രമായ ‘ഡോജ്’ കുറച്ച് ദിവസത്തേയ്ക്ക് ലോഗോയാക്കിയിരുന്നു. ട്വിറ്ററിന്‍റെ വെബ് പതിപ്പിൽ ഹോം പേജിൽ മാത്രമാണ് ഡോജിനെ പ്രതിഷ്‌ഠിച്ചിരുന്നത്.
'ഷിബ ഇനു' ഇനത്തിൽപ്പെട്ട നായയുടെ തലയാണ് പത്ത് വർഷത്തോളമായി ഡോജ് എന്ന പേരിൽ ട്രോളുകളിൽ നിറഞ്ഞുനിൽക്കുന്നത്. 2013 ൽ ഈ നായയുടെ ചിത്രം ലോഗോയാക്കി പുറത്തിറങ്ങിയ ഡോജ് കോയിൻ എന്ന ക്രിപ്റ്റോ കറൻസിയിൽ നിന്നാണ് ഡോജ് എന്ന 'മീം' രൂപംകൊണ്ടത്. ബിറ്റ്‌കോയിൻ ഉൾപ്പടെയുള്ള ക്രിപ്റ്റോ കറൻസികളെ പരിഹസിക്കുന്നതിനായാണ് ഡോജ് കോയിൻ ഇറക്കിയത്. ട്വിറ്ററിന്‍റെ ലോഗോ മാറ്റിയതിനെത്തുടർന്ന് ഈ കോയിന്‍റെ വില 30 ശതമാനത്തിലധികം ഉയർന്നിരുന്നു.
പലസമയത്തായി ‘എക്‌സ്’ എന്ന പേര് മസ്‌ക് ഉപയോഗിച്ചിരുന്നു. പുതിയ സിഇഒ ലിൻഡ യാക്കറിനോയെ സ്വാഗതം ചെയ്‌തപ്പോൾ, 'ഈ പ്ലാറ്റ്‌ഫോമിനെ എക്‌സ് ആപ്പാക്കി മാറ്റുന്നതിനായി ലിൻഡയ്‌ക്കൊപ്പം പ്രവർത്തിക്കാൻ ഞാൻ കാത്തിരിക്കുന്നു'. എന്നാണ് പറഞ്ഞിരുന്നത്. 'ട്വിറ്റർ സ്വന്തമാക്കുന്നത് എല്ലാത്തിനുമുള്ള ആപ്പായ ‘എക്‌സ്’ രൂപപ്പെടുത്തുന്നതിന്‍റെ ഭാഗമായാണെന്ന് ഉടമസ്ഥാവകാശം സ്വന്തമാക്കുന്ന സമയത്ത് മസ്‌ക് പറഞ്ഞിരുന്നു.
