ഹൈദരാബാദ്: മസില്‍ എന്ന് പറയുമ്പോള്‍ ഇന്ത്യക്കാരുടെ മനസില്‍ ആദ്യം ഓടിയെത്തുക ബോളിവുഡ് സൂപ്പര്‍സ്‌റ്റാര്‍ സല്‍മാന്‍ ഖാനെയാണ്. ശാരീരികമായി ഫിറ്റ്‌നസ് നേടുവാന്‍ ആഗ്രഹിക്കുന്നവര്‍ക്ക് ഒരു റോള്‍ മോഡല്‍ കൂടിയാണ് താരം. ഫിറ്റ്‌നസ് നിലനിര്‍ത്തുവാന്‍ ജിമ്മില്‍ കഠിനാധ്വാനം ചെയ്യുന്ന താരം ശരീരസൗന്ദര്യം തുറന്നുകാട്ടുന്ന ചിത്രങ്ങള്‍ സമൂഹമാധ്യമങ്ങളില്‍ തന്‍റെ ആരാധകര്‍ക്കായി പങ്കുവയ്‌ക്കാറുണ്ട്.
അത്തരത്തില്‍ സ്വിമ്മിങ് പൂളില്‍ നിന്നുകൊണ്ട് താരം പോസ്‌ ചെയ്യുന്ന ചിത്രമാണ് നിലവില്‍ ആരാധകര്‍ ഏറ്റെടുത്തിരിക്കുന്നത്. വര്‍ക്കൗട്ടില്‍ നിന്നും ഒട്ടു പിന്നോട്ടില്ല എന്ന് സൂചിപ്പിക്കുന്ന തരത്തിലാണ് സല്‍മാന്‍ തന്‍റെ ശരീര സൗന്ദര്യം നിലനിര്‍ത്തുന്നത്. 'ജീവിതത്തിലേക്കും യാഥാര്‍ഥ്യത്തിലേക്കും തിരികെയെത്തുന്നു' എന്ന കുറിപ്പോടു കൂടിയാണ് സല്‍മാന്‍ ഖാന്‍ തന്‍റെ ഇന്‍സ്‌റ്റഗ്രാം പേജില്‍ ചിത്രം പങ്കുവച്ചത്.
- " class="align-text-top noRightClick twitterSection" data="
">
ആരാധകരുടെ കമന്‍റ് പ്രവാഹം: ചിത്രത്തില്‍ ആകര്‍ഷകമായ ശരീരം കാണിച്ച് ക്യാമറയ്‌ക്ക് പിന്‍തിരിഞ്ഞുകൊണ്ടാണ് സല്‍മാന്‍ പോസ്‌ ചെയ്യുന്നത്. സല്‍മാന്‍റെ ശരീര സൗന്ദര്യത്തെ പ്രശംസിച്ചുകൊണ്ട് നിരവധി ആരാധകരാണ് പോസ്‌റ്റിന് കമന്‍റിട്ടത്. നിങ്ങളുടെ മുഖത്തെക്കാള്‍ ഏറെ പ്രശസ്‌തി നേടിയത് നിങ്ങളുടെ പിന്തിരിഞ്ഞുള്ള പോസിനാണെന്ന് ഒരു ആരാധകന്‍ കമന്‍റ് ചെയ്‌തു.
ഹോളിവുഡിന് ആര്‍ണോള്‍ഡ്, ഡ്വെയ്ൻ, സ്റ്റാലോൺ എന്നിവരുണ്ടെങ്കില്‍ ഞങ്ങള്‍ക്ക് സല്‍മാന്‍ ഖാനുണ്ടെന്ന് മറ്റൊരാളും ടൈഗറിന്‍റെ മൂന്നാം ഭാഗത്ത് ഇത് പ്രകടമാക്കു എന്ന് മറ്റൊരു ആരാധകനും കമന്‍റ് ചെയ്‌തു. കൂടാതെ, ഹാര്‍ട്ട്, ഫയര്‍ തുടങ്ങിയ ഇമോജി ഉപയോഗിച്ച് നിരവധി പേരാണ് സല്‍മാനെ പ്രശംസിച്ചത്.
മികച്ച കലക്ഷന്‍ നേടി 'കിസി കാ ഭായി കിസി കി ജാന്‍': അതേസമയം, ഏപില്‍ 21ന് റിലീസ് ചെയ്‌ത സല്‍മാന്‍ ഖാന്‍ ചിത്രം 'കിസി കാ ഭായി കിസി കി ജാന്‍' ബോക്സോഫിസില്‍ മികച്ച പ്രകടനമാണ് കാഴ്‌ചവയ്‌ക്കുന്നത്. പ്രദര്‍ശന ദിനത്തില്‍ 15 കോടി രൂപ നേടിയ ചിത്രം ഈദ് ദിനത്തില്‍ 25 കോടിയാണ് സ്വന്തമാക്കിയത്. ഫര്‍ഹാജ് സാംജി സംവിധാനം നിര്‍വഹിച്ച ചിത്രം നിര്‍മിച്ചിരിക്കുന്നത് സല്‍മാന്‍ ഖാന്‍ ഫിലിംസിന്‍റെ ബാനറിലാണ്.
സല്‍മാന്‍ ഖാന്‍ നായകനായ ചിത്രത്തില്‍ പൂജ ഹെഗ്‌ഡെയാണ് നായിക. വെങ്കിടേഷ് ദഗ്ഗുബതി. ബിഗ് ബോസ് സീസണ്‍ 13 താരം ഷെഹ്‌നാസ് ഗില്‍, പാലക് തിവാരി, ജഗപതി ബാബു, ഭൂമിക ചൗള, ജാസി ഗില്‍, അഭിമന്യു സിംഗ് ജുയാല്‍, സിദ്ധാര്‍ഥ് നിഗം, വിജേന്ദര്‍ സിങ്, വിനാലി ഭട്‌നാഗര്‍ എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.
വിവാദ പരാമര്‍ശം നടത്തി സല്‍മാന്‍ ഖാന്‍: കഴിഞ്ഞ ദിവസം സല്‍മാന്‍ ഖാന്‍ നടത്തിയ പരാമര്‍ശം ഏറെ പ്രേക്ഷക ശ്രദ്ധ പിടിച്ചുപറ്റിയിരുന്നു. സ്‌ത്രീകളുടെ ശരീരം വിലപ്പെട്ടതാണെന്നും അത് എത്രത്തോളം മൂടുന്നുവോ അത്രയും നല്ലതാണെന്നുമുള്ള പ്രസ്‌താവന സല്‍മാന്‍ ആപ് കി അദാലത്ത് എന്ന ചാറ്റ് ഷോയില്‍ പങ്കെടുക്കവെ പറഞ്ഞിരുന്നു. നടി പാലക് തിവാരിയുടെ വെളിപ്പെടുത്തലിനെ തുടര്‍ന്ന് താരത്തിനെതിരെ ഏറെ വിവാദങ്ങള്‍ ഉയര്‍ന്നതോടെയാണ് സല്‍മാന്‍റെ പ്രതികരണം.
സല്‍മാന്‍റെ സിനിമ ഷൂട്ടിങ് സെറ്റുകളില്‍ സ്‌ത്രീകള്‍ കഴുത്തിറക്കം കൂടിയ വസ്‌ത്രങ്ങള്‍ ധരിക്കരുതെന്ന് നടന്‍ എപ്പോഴും നിര്‍ദേശിക്കാറുണ്ടെന്ന നടി പാലക് തിവാരിയുടെ വെളിപ്പെടുത്തലാണ് വിമര്‍ശനങ്ങള്‍ക്ക് കാരണമായത്. മാന്യമായ സിനിമകള്‍ ചെയ്യുമ്പോള്‍ എല്ലാവരും അത് കുടുംബത്തിനൊപ്പം ഇരുന്ന് ആസ്വദിച്ച് കാണുമെന്നും എന്നാല്‍ മറിച്ചാണെങ്കില്‍ കുടുംബത്തോടൊപ്പം ഇരുന്ന് സിനിമ കാണാന്‍ സാധിക്കില്ലെന്നും നടന്‍ പറഞ്ഞു. പ്രശ്‌നം സ്‌ത്രീകളുടെതല്ല പുരുഷന്മാരുടേതാണെന്നും പുരുഷന്മാര്‍ സ്‌ത്രീകളെ കാണുന്ന രീതിയാണെന്നും അദ്ദേഹം പറഞ്ഞു.
