ഹൈദരാബാദ്: ബോളിവുഡ് യുവ താരനിരയിൽ ഏറെ ശ്രദ്ധേയയാണ് പരിനീതി ചോപ്ര. 'ചംകില'യാണ് താരത്തിന്‍റേതായി അണിയറയിൽ ഒരുങ്ങുന്ന പ്രധാന ചിത്രം. ഇപ്പോഴിതാ 'ചംകില' സിനിമയിലെ കഥാപാത്രത്തിനായി താൻ നടത്തിയ തയ്യാറെടുപ്പുകൾ ആരാധകരുമായി പങ്കുവച്ചിരിക്കുകയാണ് പരിനീതി (Parineeti Chopra's preparations for Chamkila video).
സോഷ്യൽ മീഡിയ ഹാൻഡിലിൽ തിങ്കളാഴ്‌ച പോസ്റ്റ് ചെയ്‌ത വീഡിയോയിലൂടെയാണ് താരം അനുഭവങ്ങൾ പങ്കുവച്ചത്. ചംകിലയിൽ ഗായികയാകാനും പരിനീതി തയ്യാറെടുപ്പുകൾ നടത്തിയിരുന്നു. ഈ വർഷം, എ ആർ റഹ്മാന്‍റെ സ്റ്റുഡിയോയിൽ താൻ ആറ് മാസത്തോളം പരിശീലനത്തിന് ചെലവഴിച്ചതായി താരം വീഡിയോയിൽ വെളിപ്പെടുത്തി (6 months in AR Rahman's studio eating junk to put on 15 kilos says Parineeti Chopra).
കൂടാതെ, സിനിമയിലെ തന്‍റെ കഥാപാത്രത്തിന് വേണ്ടി 15 കിലോ കൂട്ടാൻ ജങ്ക് ഫുഡിനെ കൂട്ടുപിടിച്ചതായും പരിനീതി പറഞ്ഞു. "ഞാൻ ഈ വർഷം 6 മാസം റഹ്മാൻ സാറിന്‍റെ സ്റ്റുഡിയോയിൽ പാട്ടുപാടി, വീട്ടിലേക്ക് മടങ്ങി ചാംകിലയ്‌ക്ക് വേണ്ടി 15 കിലോഗ്രാം കൂട്ടാനായി കഴിയുന്നത്ര ജങ്ക് ഫുഡ് കഴിച്ചു! നെറ്റ്ഫ്ലിക്‌സിലൂടെ ചംകീല ഉടൻ വരുന്നു''- തന്‍റെ ഇൻസ്റ്റഗ്രാം അക്കൗണ്ടിൽ പോസ്റ്റ് ചെയ്‌ത വീഡിയോയിൽ പരിനീതി പറഞ്ഞു.
സംഗീതവും ഭക്ഷണവും അതായിരുന്നു എന്‍റെ പതിവ്. ഇപ്പോൾ സിനിമ പൂർത്തിയായപ്പോൾ ഇതെല്ലാം തീർത്തും മാറിമറഞ്ഞു. ഞാൻ സ്റ്റുഡിയോ വല്ലാതെ മിസ് ചെയ്യുന്നു, വീണ്ടും ഞാനായി മാറാൻ ജിമ്മിൽ കഠിനമായ പരിശ്രമം നടത്തുകയാണ്. അമർജോത് ജിയെപ്പോലെയല്ല! ഇത് വളരെ ബുദ്ധിമുട്ടായിരുന്നു. എന്നാൽ ഇംതിയാസ് സാർ നിങ്ങൾക്ക് വേണ്ടി എന്തും ചെയ്യാൻ ഞാൻ ഒരുക്കമാണ്! ഈ റോളിന് വേണ്ടിയും. ഇനിയും ഒരുപാട് പോകാനുണ്ട്. നമുക്കിത് ചെയ്യാം''- താരം പറയുന്നു.
പഞ്ചാബ് പശ്ചാത്തലമാക്കി ഇംതിയാസ് അലി സംവിധാനം ചെയ്യുന്ന ചിത്രമാണ് ചംകില. ഗായക ദമ്പതികളായ, കൊല്ലപ്പെട്ട അമർ സിംഗ് ചംകിലയുടെയും അമർജോത് കൗറിന്‍റെയും യഥാർഥ ജീവിതകഥയെ ആസ്‌പദമാക്കിയുള്ളതാണ് ഈ ചിത്രം. 1988ലാണ് അമർ സിംഗ് ചംകിലയും അമർജോത് കൗറും ഒപ്പം ഇവരുടെ ബാൻഡിലെ മറ്റ് രണ്ടുപേരും കൊല്ലപ്പെട്ടത്. ഇന്നും പരിഹരിക്കപ്പെടാതെ ഈ കേസ് ദുരൂഹമായി തുടരുകയാണ്.
പരിനീതി ചോപ്രയ്‌ക്കൊപ്പം ദിൽജിത് ദോസഞ്ജ് ആണ് ഈ ചിത്രത്തിൽ പ്രധാന വേഷത്തിൽ എത്തുന്നത്. ഇംതിയാസ് അലി ഒരുക്കുന്ന ഈ ചിത്രം നിർമ്മിക്കുന്നത് മോഹിത് ചൗധരി, സെലക്‌ട് മീഡിയ ഹോൾഡിംഗ്‌സ് എൽഎൽപി, സരിഗമ, റിലയൻസ് എന്‍റർടെയിൻമെന്‍റ് എന്നിവർ ചേർന്നാണ്. നെറ്റ്ഫ്ലിക്‌സ് റിലീസായി ചിത്രം പ്രേക്ഷകർക്കരികിലേക്കെത്തും.
അടുത്തിടെയാണ് പരിനീതി ചോപ്രയുടെ വിവാഹം നടന്നത്. ആം ആദ്‌മി പാര്‍ട്ടി നേതാവ് രാഘവ് ഛദ്ദയെയാണ് താരം വിവാഹം ചെയ്‌തത്. ബോളിവുഡ് ആഘോഷമാക്കിയ വിവാഹമായിരുന്നു ഇവരുടേത്. വിവാഹ ചടങ്ങിന്‍റെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലായിരുന്നു.
READ MORE: കൈ കോര്‍ത്ത് പരിനീതിയും രാഘവും; വിവാഹ ചിത്രങ്ങള്‍ പുറത്ത്
