നുഷ്രത് ബറൂച്ച (Nushrratt Bharuccha) നായികയാകുന്ന ചിത്രം 'അകേലി'യുടെ ടീസർ പുറത്ത് (Akelli Official Teaser). ഏറെ നാളത്തെ കാത്തിരിപ്പ് അവസാനിപ്പിച്ചാണ് നിർമാതാക്കൾ ഇപ്പോൾ ടീസർ പുറത്തുവിട്ടിരിക്കുന്നത്. ഉദ്വേഗഭരിതമായ ടീസർ നിരവധി ചോദ്യങ്ങൾ ബാക്കിയാക്കിയാണ് അവസാനിക്കുന്നത്.
ചിത്രത്തിന്‍റെ നിർമാതാക്കളായ ദശമി സ്റ്റുഡിയോസ് (Dashami Studioz) ഇൻസ്റ്റഗ്രാമിൽ ടീസർ പങ്കുവച്ചിട്ടുണ്ട്. 'അതിജീവനമാണ് അവളുടെ പോരാട്ടം. അവൾ ഈ ഓഗസ്റ്റ് 18 ന് വരുന്നു... #അകേലി' എന്ന അടിക്കുറിപ്പോടെയാണ് നിർമാതാക്കൾ വീഡിയോ പ്രേക്ഷകർക്കായി പങ്കുവച്ചത്.
- " class="align-text-top noRightClick twitterSection" data="">
മികച്ച ത്രില്ലർ അനുഭവമാകും 'അകേലി' കാഴ്‌ചക്കാർക്ക് സമ്മാനിക്കുക എന്ന് ഉറപ്പ് നൽകുന്നതാണ് ഇപ്പോൾ പുറത്തുവന്ന ടീസർ. ചില സാഹചര്യങ്ങളാൽ യുദ്ധത്തിൽ തകർന്ന ഒരു ഭൂമിയിൽ കുടുങ്ങിപ്പോവുകയാണ് നുഷ്‌റത് അവതരിപ്പിക്കുന്ന നായിക കഥാപാത്രം. അവളുടെ ഈ സാഹചര്യങ്ങളിലൂടെയും രക്ഷപ്പെടാനായി നടത്തുന്ന പോരാട്ടങ്ങളിലൂടെയും ആണ് ചിത്രം കടന്നു പോവുക.
പ്രണയ് മേഷ്‌റാം (Pranay Meshram) ആണ് ചിത്രം സംവിധാനം ചെയ്യുന്നത്. വിവിധ സിനിമകളിൽ അസോസിയേറ്റ് ഡയറക്‌ടറായി പ്രവർത്തിച്ചിട്ടുള്ള പ്രണയ് മേഷ്‌റാമിന്‍റെ സംവിധാന അരങ്ങേറ്റ ചിത്രം കൂടിയാണ് 'അകേലി'. ദശമി സ്റ്റുഡിയോസിന്‍റെ ബാനറിൽ നിതിൻ വൈദ്യ, നിനാദ് വൈദ്യ, അപർണ പദ്ഗോങ്കർ, വിക്കി സിദാന, ശശാന്ത് ഷാ എന്നിവർ ചേർന്നാണ് ചിത്രത്തിന്‍റെ നിർമാണം.
കുടുംബത്തെ പോറ്റാൻ വേണ്ടി മാത്രം ജീവനുപോലും ഭീഷണിയുള്ള ലോകത്തേക്ക് പോകാൻ നിർബന്ധിതയായ ഒരു പെൺകുട്ടിയുടെ കഥയാണ് 'അകേലി'യുടെ ഇതിവൃത്തമെന്ന് നിർമാതാവ് നിനാദ് നേരത്തെ വ്യക്തമാക്കിയിരുന്നു. പീഡകരുടെ പിടിയിൽ നിന്ന് രക്ഷപ്പെടാൻ അവൾ കാണിക്കുന്ന ധൈര്യം ചിത്രം എടുത്തുകാണിക്കുമെന്ന് പറഞ്ഞ അദ്ദേഹം ഒറ്റപ്പെട്ട ഒരു ഇന്ത്യൻ സ്‌ത്രീയുടെ നിശ്ചയദാർഢ്യത്തിലേക്കും ചിത്രം വെളിച്ചം വീശുന്നതായി കൂട്ടിച്ചേർത്തു.
എല്ലാ ശക്തരായ സ്‌ത്രീകൾക്കുമാണ് തങ്ങളുടെ ചിത്രം സമർപ്പിക്കുന്നതെന്ന് സംവിധായകൻ പ്രണയ് മേഷ്‌റാമും നേരത്തെ വ്യക്തമാക്കിയിരുന്നു. പ്രേക്ഷകർക്ക് കണക്‌ട് ചെയ്യാൻ പറ്റുന്ന ചിത്രമാകും 'അകേലി' എന്ന് തനിക്ക് ഉറപ്പുണ്ടെന്നും അദ്ദേഹം അവകാശപ്പെട്ടിരുന്നു.
'അകേലി'യുടെ ഷൂട്ടിങ് അനുഭവം പങ്കുവച്ച് നേരത്തെ നുഷ്രത്തും രംഗത്തെത്തിയിരുന്നു. 'അകേലി ഒരു വലിയ അനുഭവമായിരുന്നു. ഇതുവരെ ഞാൻ ചെയ്‌തിട്ടുള്ള വേഷങ്ങളിൽ നിന്നെല്ലാം വളരെ അകലെ നിൽക്കുന്ന ഒന്നാണിത്. ഇത്തരമൊരു കഥാപാത്രത്തെ അവതരിപ്പിക്കുന്നത് പലപ്പോഴും എന്നെ വൈകാരികമായി തളർത്തി. പ്രേക്ഷകർക്ക് എന്‍റെ കഥാപാത്രത്തിന്‍റെ യാത്രയ്‌ക്കൊപ്പം ചേരാൻ കഴിയുമെന്നും അവളെ ഇഷ്‌ടമാകുമെന്നും ഞാൻ പ്രതീക്ഷിക്കുന്നു'- എന്നായിരുന്നു നുഷ്രത്തിന്‍റെ വാക്കുകൾ.
ഓഗസ്റ്റ് 18നാണ് ഈ ചിത്രത്തിന്‍റെ റിലീസ്. നിശാന്ത് ദാഹിയ, സാഹി ഹലേവി, അമീർ ബൗട്രോസ് എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അതേസമയം ബെല്ലംകൊണ്ട ശ്രീനിവാസിനൊപ്പം 'ചത്രപതി'യിലാണ് നുഷ്രത് ബറൂച്ച അവസാനമായി അഭിനയിച്ചത്. അതിനുമുമ്പ് അക്ഷയ് കുമാറും ഇമ്രാൻ ഹാഷ്‌മിയും ഒന്നിച്ച 'സെൽഫി' എന്ന ചിത്രത്തിലും താരം നായികയായി എത്തി. കൂടാതെ ശ്രദ്ധ കപൂറും രൺബീർ കപൂറും അണിനിരന്ന 'തു ജൂതി മേം മക്കർ' എന്ന ചിത്രത്തില്‍ അതിഥി വേഷത്തിലും താരം അഭിനയിച്ചു. സോഹ അലി ഖാനൊപ്പം 'ഛോരി 2' എന്ന ചിത്രത്തിലാണ് നുഷ്രത് അടുത്തതായി അഭിനയിക്കുന്നത്.
