ഫിഫ ലോകകപ്പിന്‍റെ നാലാമത്തെ ഔദ്യോഗിക ഗാനം പുറത്തിറങ്ങി. 'ലൈറ്റ് ദി സ്കൈ' എന്ന് പേരിട്ടിരിക്കുന്ന ഗാനത്തിൽ മൊറോക്കൻ-കനേഡിയൻ സെൻസേഷൻ നോറ ഫത്തേഹിയാണ് ചുവടുകൾ വയ്ക്കുന്നത്. എമിറാത്തി ഗായിക ബൽക്കീസ്, ഇറാഖി സൂപ്പർ സ്റ്റാർ റഹ്മ റിയാദ്, അവാർഡ് ജേതാവും മൊറോക്കൻ ഗായികയും ഗാനരചയിതാവുമായ മനൽ ബെഞ്ച്‌ലിഖ എന്നിവരും നോറ ഫത്തേഹിയെ കൂടാതെ സിംഗിളിലുണ്ട്.
നാല് മിനിട്ടിലധികം ദൈർഘ്യമുള്ള സംഗീത വീഡിയോയിൽ നോറ ഫത്തേഹി ഗാനം ആലപിക്കുകയും നൃത്തം ചെയ്യുകയും ചെയ്‌തിട്ടുണ്ട്. സംഗീതം പോലെ ഫുട്ബോളും ആവേശകരമായ സാർവത്രിക ഭാഷയാണെന്ന് നോറ ഫത്തേഹി ഒരു വെബ്‌ലോയ്‌ഡിനോട് പറഞ്ഞു. സഞ്ചരിച്ച എല്ലായിടത്തും ഇത് താൻ അനുഭവിച്ചിട്ടുണ്ടെന്നും നോറ പറഞ്ഞു. ഹയ്യ ഹയ്യ (ബെറ്റർ ടുഗെദർ), ആർഹ്ബോ, ദ വേൾഡ് ഈസ് യുവേഴ്‌സ്‌ ടു ടേക്ക് എന്നിവയാണ് ഫിഫ വേൾഡ് കപ്പിലെ മറ്റ് മൂന്ന് ഔദ്യോഗിക ഗാനങ്ങൾ.
ഗ്രാമി അവാർഡ് ജേതാവ് മൊറോക്കൻ-സ്വീഡിഷ് നിർമാതാവും ഗായകനുമായ റെഡ് വൺ ആണ് ലൈറ്റ് ദി സ്കൈ അണിയിച്ചൊരുക്കിയത്. ഷാകിറയുടെ വിഖ്യാതമായ വക്ക വക്ക, ലാ ലാ ലാ ഗാനങ്ങൾക്ക് പിന്നിൽ പ്രവർത്തിച്ച കമ്പനിയാണ് റെഡ് വൺ. സാഡെക് വാഫിന്‍റെ നൃത്തവും സംഗീത വീഡിയോയുടെ സവിശേഷതയാണ്.
അൽ തുമാമ സ്റ്റേഡിയത്തിന്‍റെ രാത്രി കാഴ്‌ചയും അതിശയിപ്പിക്കുന്ന നൃത്തങ്ങളുമാണ് സംഗീതത്തിന്‍റെ അകമ്പടിയോടെയുള്ള ഫുട്ബോൾ അന്തരീക്ഷവും വീഡിയോയിൽ പ്രത്യക്ഷപ്പെടുന്നു. ഫിഫയുടെ ഔദ്യോഗിക യൂട്യൂബ് ചാനലിൽ പ്രീമിയർ ചെയ്‌ത സംഗീത വീഡിയോ ലോകമെമ്പാടുമുള്ള എല്ലാ സംഗീത സ്ട്രീമിങ് പ്ലാറ്റ്‌ഫോമുകളിലും ലഭ്യമാണ്.
