Actor Meena pledge to donate organs: അവയവദാന പ്രതിജ്ഞയുമായി നടി മീന. ജീവന് രക്ഷിക്കുന്നതിനേക്കാള്‍ വലിയ നന്മ ഇല്ലെന്നും അതിന് ഏറ്റവും നല്ല മാര്‍ഗമാണ് അവയവ ദാനമെന്നും നടി. ജീവന് വേണ്ടി പോരാടുന്ന പലര്‍ക്കും രണ്ടാമതൊരു അവസരമാണിതെന്നും മീന പറഞ്ഞു. അവയവദാന ദിനത്തില്‍ ട്വീറ്റ്‌ ചെയ്യുകയായിരുന്നു താരം.
'ജീവന് രക്ഷിക്കുന്നതിനേക്കാള്‍ വലിയ നന്മയില്ല. ജീവന് രക്ഷിക്കാനുള്ള ഏറ്റവും നല്ല മാര്‍ഗമാണ് അവയവദാനം. ഇത് ഒരു അനുഗ്രഹമാണ്. വിട്ടുമാറാത്ത രോഗവുമായി പൊരുതുന്ന പലര്‍ക്കും രണ്ടാമത്തെ അവസരമാണ് അവയവദാനം. ആ അവസ്ഥയിലൂടെ വ്യക്തിപരമായി ഞാന്‍ കടന്നു പോയിട്ടുണ്ട്.
എന്‍റെ ജീവിതം മാറ്റിമറിച്ചേക്കാവുന്ന കൂടുതല്‍ ദാതാക്കളാല്‍ എന്‍റെ സാഗര്‍ അനുഗ്രഹിക്കപ്പെട്ടിരുന്നെങ്കില്‍ എന്ന് ഞാന്‍ പ്രത്യാശിച്ചു. ഒരു ദാതാവിന് എട്ട് ജീവന് രക്ഷിക്കാനാവും. അവയവദാനത്തിന്‍റെ പ്രാധാന്യം എല്ലാവരും മനസിലാക്കുമെന്ന് പ്രതീക്ഷിക്കുന്നു. ഇത് ദാതാക്കളും സ്വീകര്‍ത്താക്കളും ഡോക്‌ടര്‍മാരും തമ്മില്‍ മാത്രമല്ല. ഇത് കുടുംബങ്ങളെയും സുഹൃത്തുക്കളെയും സഹപ്രവര്‍ത്തകരെയും പരിചയക്കാരെയും വളരെയധികം ബാധിക്കുന്നു. ഇന്ന് ഞാന്‍ എന്‍റെ അവയവങ്ങള്‍ ദാനം ചെയ്യുന്നുവെന്ന് പ്രതിജ്ഞ ചെയ്യുന്നു. നിങ്ങളുടെ പേര് നിലനിര്‍ത്താനുള്ള ഒരു വഴിയാണിത്', മീന കുറിച്ചു.
- " class="align-text-top noRightClick twitterSection" data="
">
മീനയുടെ ഈ കുറിപ്പിന് താഴെ നിരവധി പേര് താരത്തെ പ്രശംസിച്ച് രംഗത്തെത്തി. മീനയുടേത് മഹത്തായ തീരുമാനമാണെന്നും മറ്റുള്ളവര്‍ക്ക് മാതൃകയാണെന്നുമുള്ള കമന്‍റുകളുമാണ് താരത്തിന്‍റെ പോസ്‌റ്റിന് താഴെ നിറയുന്നത്. പലരും അവയവ ദാനം ചെയ്യുമെന്നും കമന്‍റ്‌ ചെയ്‌തിട്ടുണ്ട്.
അടുത്തിടെയാണ് മീനയുടെ ഭര്‍ത്താവ് വിദ്യാസാഗര്‍ അന്തരിച്ചത്. 95 ദിവസത്തോളം സ്വകാര്യ ആശുപത്രിയില്‍ അബോധാവസ്ഥയില്‍ കഴിഞ്ഞതിന് ശേഷമായിരുന്നു വിദ്യാസാഗര്‍ മരണത്തിന് കീഴടങ്ങിയത്. എക്‌മൊ ചികിത്സയിലായിരുന്നു.
ഹൃദയവും ശ്വാസകോശവും തകരാറിലായിരുന്നതിനാല്‍ ഇവ രണ്ടും മാറ്റിവയ്‌ക്കാനുള്ള കാത്തിരിപ്പിലായിരുന്നു. അനുയോജ്യരായ ദാതാവിനെ കണ്ടെത്താന്‍ ശ്രമം നടത്തിയെങ്കിലും അതിന് സാധിച്ചില്ല. ഒന്നിലധികം അവയവങ്ങള്‍ തകരാറിലായിരുന്ന വിദ്യാസാഗര്‍ ശസ്‌ത്രക്രിയക്ക് കാത്തുനില്‍ക്കവേയായിരുന്നു മരണം.
