കോട്ടയം: തൃക്കൊടിത്താനത്ത് യൂത്ത് കോൺഗ്രസ് പ്രവർത്തകരെ വീട്ടിൽ കയറി മർദിച്ച സംഭവത്തിൽ ഒളിവില്‍ പോയ പ്രാദേശിക സിപിഎം നേതാക്കൾ അറസ്റ്റിൽ. സി.പി.എം വാര്‍ഡ് മെമ്പറായ ബൈജു വിജയന്‍, പാര്‍ട്ടി ബ്രാഞ്ച് സെക്രട്ടറി സുനില്‍ എന്നിവരാണ് അറസ്റ്റിലായത്. കഴിഞ്ഞ വ്യാഴാഴ്‌ച(11.08.2022) യൂത്ത് കോൺഗ്രസ് ജില്ല സെക്രട്ടറി മനുകുമാര്‍, ബ്ലോക്ക് സെക്രട്ടറി ആന്‍റോ ആന്‍റണി എന്നിവര്‍ക്കാണ് മര്‍ദനമേറ്റത്.
സിപിഎം ശക്തികേന്ദ്രമായ മണികണ്‌ഠ വയലിൽ യൂത്ത് കോൺഗ്രസ് യൂണിറ്റ് ആരംഭിച്ചതാണ് ആക്രമണത്തിന് കാരണമായത്. ബൈജുവിന്‍റെ നേതൃത്വത്തിലെത്തിയ സംഘം കമ്പി വടിക്കൊണ്ട് അടിച്ച് ഇരുവരെയും പരിക്കേല്‍പ്പിക്കുകയായിരുന്നു. പരിക്കേറ്റ ഇരുവരെയും കോട്ടയം മെഡിക്കൽ കോളജില്‍ പ്രവേശിപ്പിച്ചു.
കൊലപാതക ശ്രമം നടത്തിയിട്ടും പ്രതികള്‍ക്കെതിരെ ഭവനഭേദനത്തിന് മാത്രമാണ് കേസെടുത്തതെന്ന് കോണ്‍ഗ്രസ് ആരോപിക്കുന്നു. ഇതിന് മുമ്പും തന്നെ കൊല്ലാന്‍ സിപിഎം പ്രാദേശിക നേതാക്കള്‍ ശ്രമിച്ചിരുന്നെന്ന് മനുകുമാര്‍ പറഞ്ഞു. കേസിൽ നേരത്തെ അറസ്റ്റിലായ രണ്ടാം പ്രതി മജു നിലവിൽ റിമാൻഡിലാണ്.
