തിരുവനന്തപുരം: തലശ്ശേരിയിൽ സിപിഎം പ്രവർത്തകൻ ഹരിദാസിൻ്റെ കൊലപാതകം ബിജെപി നേതൃത്വത്തിൻ്റെ അറിവോടെയെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്‌ണന്‍. ആർഎസ്‌എസിൻ്റെ പ്രത്യേക പരിശീലനം നേടിയവരാണ് കൊല നടത്തിയത്. ഒരു കാൽ വെട്ടിമാറ്റി മൃഗീയമായ രീതിയിലാണ് കൊല നടത്തിയത്.
2 മാസങ്ങൾക്കു മുമ്പ് സംസ്ഥാനമാകെ 3,000 പേർക്ക് ആർഎസ്എസ് പരിശീലനം നൽകിയിരുന്നു. ഇവരുടെ ബാച്ചിൽപ്പെട്ടവരാണ് കൊല നടത്തിയതെന്നും കോടിയേരി ആരോപിച്ചു. പാർട്ടിയുടെ പതാകദിനത്തോടനുബന്ധിച്ച് നടത്തിയതാണ് കൊലപാതകമെന്നതിൽ സംശയമില്ല. എന്നാൽ ഇതു കൊണ്ടൊന്നും തങ്ങളെ വിറപ്പിക്കാമെന്ന് കരുതേണ്ട. ഇതെല്ലാം അതിജീവിച്ചവരാണ് സിപിഎം എന്നും കോടിയേരി വ്യക്തമാക്കി.
കൊലപാതകം നടത്തി സംസ്ഥാനത്ത് അരാജകത്വം സൃഷ്‌ടിക്കാനാണ് ആർഎസ്എസ് ശ്രമം. കൊല നടത്തുന്നത് അവർ തന്നെ. പിന്നീട്‌ പഴി പൊലീസിൻ്റെ തലയിൽ കെട്ടി വയ്ക്കുകയാണ്. കേരളം കലാപഭൂമിയാക്കുകയാണ് ഇവരുടെ ശ്രമമെന്നും കോടിയേരി ആരോപിച്ചു.
