പാലക്കാട് : പ്രധാനമന്ത്രി നരേന്ദ്രമോദി ആദിവാസി വിഭാഗത്തിൽ നിന്ന് രാഷ്ട്രപതിയെ കണ്ടെത്തുമ്പോൾ പിണറായി വിജയൻ ആ സമൂഹത്തിനും അരികുവത്കരിക്കപ്പെട്ടവർക്കും വേണ്ടി എന്താണ് ചെയ്യുന്നതെന്ന് കേന്ദ്ര വിദേശകാര്യ സഹമന്ത്രി വി മുരളീധരൻ. സ്വന്തം കുഞ്ഞിന്‍റെ മൃതദേഹവുമായി കിലോമീറ്ററുകൾ നടക്കേണ്ടി വന്ന അട്ടപ്പാടിയിലെ പിതാവിനെ പിണറായി വിജയൻ കണ്ടില്ലേയെന്ന് വി മുരളീധരൻ ചോദിച്ചു. ഊരിലേക്ക് റോഡില്ലാത്തതിനാലാണ് ഈ ദുരവസ്ഥ ഉണ്ടായതെന്നും കേന്ദ്രസഹമന്ത്രി ആരോപിച്ചു.
ഉത്തരേന്ത്യയിലേക്ക് നോക്കിനിൽക്കുന്ന മുഖ്യമന്ത്രി സ്വന്തം സംസ്ഥാനത്തെ ഊരുകളിലേക്ക് നോക്കട്ടെയെന്നും ബിജെപിയുടെ സംസ്ഥാന പഠന ശിബിരം ഉദ്ഘാടനം ചെയ്യവേ കേന്ദ്രമന്ത്രി പറഞ്ഞു. എസ് ജയ്‌ശങ്കറിന്‍റെ സന്ദർശനത്തെ വിമർശിച്ച മുഖ്യമന്ത്രിയേയും പൊതുമരാമത്ത് മന്ത്രിയേയും പ്രസംഗത്തിൽ വി മുരളീധരന്‍ കടന്നാക്രമിച്ചു. കേന്ദ്ര സർക്കാരിന്‍റെ പദ്ധതികൾ ഗുണഭോക്താക്കളിൽ എത്തുന്നുണ്ടോ എന്നറിയാൻ കേന്ദ്രമന്ത്രിമാരുടെ സന്ദർശനം ഇനിയും ഉണ്ടാകും.
'അല്‍പത്തരം പറയുന്നു' : അഴിമതിയും കെടുകാര്യസ്ഥതയും ഇല്ലെന്ന് ഉറപ്പാക്കാനാണ് കേന്ദ്രമന്ത്രിമാരുടെ ഇടപെടലുകൾ. കേരളത്തിലെ ജനങ്ങളെ വികസനാധിഷ്‌ഠിത-അഴിമതിമുക്ത ഭരണത്തിന്‍റെ ഗുണഫലങ്ങള്‍ അനുഭവിക്കുന്നതില്‍ നിന്ന് തടസപ്പെടുത്തുകയാണ് വിവാദങ്ങളുണ്ടാക്കുന്നവരുടെ ലക്ഷ്യമെന്നും വി മുരളീധരൻ ആരോപിച്ചു. നിരവധി സംസ്ഥാന സർക്കാരുകള്‍ വിവിധ ദേശീയപാതകളുടെ വികസനത്തിന് സ്ഥലമേറ്റെടുക്കലിനായി കേന്ദ്രത്തെ പിന്തുണയ്ക്കുന്നുണ്ട്.
അവരാരും, കേന്ദ്രമന്ത്രിമാരൊന്നും ദേശീയപാതയുടെ അടുത്തുകൂടിപ്പോലും പോവരുതെന്ന് അല്‍പത്തരം പറയാറില്ല. ദേശീയപാതകള്‍ കേന്ദ്ര സര്‍ക്കാര്‍ പദ്ധതിയാണെന്ന് അറിയാത്ത കൊച്ചുകുട്ടി പോലും രാജ്യത്ത് ഉണ്ടാവില്ലെന്നും വി മുരളീധരന്‍ കൂട്ടിച്ചേർത്തു. പെട്രോള്‍, ഡീസല്‍ നികുതി കുറച്ച് സംസ്ഥാനങ്ങള്‍ സഹകരിക്കണമെന്ന് പ്രധാനമന്ത്രി അഭ്യര്‍ഥിച്ചപ്പോള്‍ പറ്റില്ലെന്ന് ആദ്യം പറഞ്ഞത് കേരള സര്‍ക്കാരായിരുന്നു.
മോദിയെ വിമർശിക്കുന്നവർ പൊട്ടക്കിണറ്റിലെ തവളകള്‍ : എല്ലാം കേന്ദ്രത്തിന്‍റെ ചിലവിൽ നടക്കണമെന്ന് ആഗ്രഹിക്കുകയും ഇരുപത്തിനാല് മണിക്കൂറും വിമർശിക്കുകയും ചെയ്യുന്നതാണ് പിണറായി സർക്കാരിന്‍റെ ശീലം. പ്രധാനമന്ത്രി നരേന്ദ്ര മോദിയെ വിമർശിക്കുന്നവർ പൊട്ടക്കിണറ്റിലെ തവളകളാണെന്ന് എ.എൻ ഷംസീറിൻ്റെ നിയമസഭ പ്രസംഗം പരാമര്‍ശിച്ചുകൊണ്ടായിരുന്നു പരിഹാസം. മോദി സർക്കാർ എട്ടുവർഷം പൂർത്തിയാക്കുന്നത് ജനക്ഷേമ പദ്ധതികളിലൂടെ ജനകീയ സർക്കാരായി വളർന്നാണ്.
രാജകുടുംബത്തിന്‍റെ ഉത്തരവനുസരിച്ച് മാത്രം പ്രവര്‍ത്തിക്കുന്ന കോണ്‍ഗ്രസ് രീതി അല്ല നിലവിൽ രാജ്യത്തെന്നും വി മുരളീധരന്‍ പറഞ്ഞു. വെള്ളിയാഴ്‌ച നടന്ന ഉദ്‌ഘാടന ചടങ്ങില്‍ ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ അധ്യക്ഷത വഹിച്ചു. ഒ രാജഗോപാൽ, കുമ്മനം രാജശേഖരൻ, പി.കെ കൃഷ്‌ണദാസ്, എം.ടി രമേശ്, എ.എൻ രാധാകൃഷ്‌ണന്‍ തുടങ്ങി മുന്നൂറോളം നേതാക്കൾ പങ്കെടുക്കുന്ന മൂന്ന് ദിവസത്തെ പഠന ശിബിരം ഞായറാഴ്‌ച വൈകിട്ട് സമാപിക്കും.
