ആൾക്കൂട്ട മർദനത്തെതുടർന്ന് ആത്‌മഹത്യ; പെൺകുട്ടിയുടെ പിതാവ് അറസ്റ്റിൽ

ആൾക്കൂട്ട മർദനത്തെ തുടർന്ന് യുവാവ് വിഷം കഴിച്ചു മരിച്ച സംഭവത്തിൽ പെൺകുട്ടിയുടെ പിതാവടക്കം രണ്ടു പേരെ അറസ്റ്റ് ചെയ്‌തു.

മലപ്പുറം: കോട്ടക്കലിൽ ആൾക്കൂട്ട മർദനത്തെ തുടർന്ന് യുവാവ് വിഷം കഴിച്ചു മരിച്ച സംഭവത്തിൽ പിതാവടക്കം രണ്ടു പേർ കോട്ടക്കലിൽ പിടിയിലായി. പെൺകുട്ടിയുടെ പിതാവിനെയും കാരാട്ടാങ്ങാടി സ്വദേശി സുനീഷിനെയുമാണ് എസ്.ഐ റിയാസ് ചാക്കീരി അറസ്റ്റ് ചെയ്‌തത്. പ്രതികളെ കോടതിയിൽ ഹാജരാക്കി റിമാന്‍റ് ചെയ്‌തു. ഇതോടെ കേസിൽ പിടിയിലായവരുടെ എണ്ണം ആറായി.

പെൺകുട്ടിയുമായുള്ള പ്രണയബന്ധത്തെ തുടർന്ന് ഷാഹിറിനെ ഒരു കൂട്ടം ആളുകൾ തടഞ്ഞുവെക്കുകയും മർദിക്കുകയുമായിരുന്നുവെന്നാണ് കേസ്. കൊലപാതകശ്രമത്തിനും പ്രേരണ കുറ്റത്തിനുമാണ് പ്രതികൾക്കെതിരെ കേസെടുത്തിരിക്കുന്നത്. കോട്ടക്കലിൽ ആൾക്കൂട്ട ആക്രമണത്തിനിരയായ ഷാഹിർ നവംബർ 12നാണ് ആത്മഹത്യ ചെയ്‌തത്.