കോട്ടയം: കോട്ടയം; പാലാ ഉപതെരഞ്ഞെടുപ്പില്‍ കളം പിടിക്കാൻ യുഡിഎഫ് നേതൃത്വം. തെരഞ്ഞെടുപ്പ് പ്രചാരണം ആദ്യഘട്ടത്തിലേക്ക് കടക്കുമ്പോൾ ഇടഞ്ഞു നില്‍ക്കുന്ന പിജെ ജോസഫിനെ അനുനയിപ്പിക്കാൻ യുഡിഎഫ് നേതൃത്വം ശ്രമം തുടങ്ങി. കേരള കോൺഗ്രസിലെ അധികാരത്തർക്കങ്ങളുടെ തുടർച്ചയായി പി.ജെ ജോസഫിന് ഉണ്ടായ അപമാനങ്ങളുടെയും തരംതാഴ്‌ത്തലുകളുടെയും പൂർണ്ണ ഉത്തരവാദിത്വം യു.ഡി.എഫ് നേതൃത്വം ഏറ്റെടുത്തു. യു.ഡി.എഫ് കൺവീനർ ബെന്നി ബഹനാന്റെ നേതൃത്വത്തിൽ കോട്ടയത്ത് ചേർന്ന യോഗത്തിൽ ജോസഫ് വിഭാഗം നേതാക്കളായ ജോയി എബ്രഹാം, മോൻസ് ജോസഫ് എം.എൽ.എ എന്നിവർ പങ്കെടുത്തു.
പി.ജെ ജോസഫിനെതിരായ നടപടി അംഗീകരിക്കാൻ കഴിയാത്തതാണന്ന് അംഗീകരിച്ച ബെന്നി ബഹനാൻ ഇത്തരത്തിലെന്തെങ്കിലും അനിഷ്ട സംഭവങ്ങൾ ഉണ്ടായാൽ പൂർണ ഉത്തരവാദിത്വം യു.ഡി.എഫ് ഏറ്റെടുക്കുമെന്ന് വ്യക്തമാക്കി.
യു.ഡി.എഫ് നേതാക്കൾ ഉറപ്പ് നല്‍കിയ സാഹചര്യത്തില്‍ പ്രചാരണ പരിപാടികളിൽ നിന്ന് വിട്ടുനിൽക്കുമെന്ന നിലപാട് ഇനി ഉണ്ടാവില്ലന്ന് മോൻസ് ജോസഫ് എം.എൽ.എ പറഞ്ഞു.
കോട്ടയത്ത് നടന്ന യുഡിഎഫ് സമ്മേളനത്തില്‍ പിജെ ജോസഫ് പ്രസംഗിക്കുന്നതിനിടെ ഒരു കൂട്ടം ആളുകള്‍ കൂവിയതോടയാണ്, പരസ്യ പ്രതിഷേധവുമായി ജോസഫ് വിഭാഗം രംഗത്തെത്തിയത്. കൂവിയത് ജോസ് കെ മാണിയുടെ ഗ്രൂപ്പിലുള്ളവരാണെന്നും, വിഷയത്തില്‍ യുഡിഎഫ് ഇടപെടണമെന്നും അല്ലാത്ത പക്ഷം പാലാ ഉപതിരഞ്ഞെടുപ്പില്‍ മുന്നണിക്കൊപ്പം പ്രചാരണത്തിനിറങ്ങില്ലെന്നും കഴിഞ്ഞ ദിവസം ജോസഫ് വിഭാഗം നേതാവ് സജി മഞ്ഞക്കടമ്പില്‍ പറഞ്ഞിരുന്നു.
