കോട്ടയം: മെഡിക്കൽ കോളജിൽ നിന്നും നവജാത ശിശുവിനെ തട്ടിയെടുത്ത സംഭവത്തിൽ മണിക്കൂറുകൾക്കുള്ളിൽ കുട്ടിയെ കണ്ടെത്തിയ പൊലീസിന് അഭിനന്ദന പ്രവാഹം. ജില്ലാ പൊലീസ് മേധാവി കേസ് അന്വേഷണ സംഘത്തെ അനുമോദിച്ചു. ഡിവൈഎസ്‌പിമാരായ സുരേഷ് കുമാർ, ജെ സന്തോഷ് കുമാർ എസ്‌എച്ച്ഒ കെ ഷിജി, എസ്‌ ഐ റെനീഷ് എന്നിവരുടെ പെട്ടെന്നുള്ള ഇടപെടൽകൊണ്ടാണ് കുട്ടിയെ കണ്ടെത്താനായത്.
കുട്ടിയെ തിരികെ ഏൽപ്പിക്കാനെത്തിയ റെനീഷ് അവിടെ കൂടിയ ആളുകളുടെ പ്രശംസ പിടിച്ചു പറ്റി. കൈയടിയോടെയാണ് ആളുകൾ കുട്ടിയുമായി എത്തിയ റെനീഷിനെ വരവേറ്റത്. കുട്ടിയെ കാണാതായ വിവരം അറിഞ്ഞയുടനെ തന്നെ ആശുപത്രി വാർഡിലെത്തി കുട്ടിയെ കൊണ്ടുപോയ ആളുടെ ഏകദേശ രൂപം മനസിലാക്കി പൊലീസ് അന്വേഷണം ആരംഭിക്കുകയായിരുന്നു.
ടാക്സി ഡ്രൈവർമാർ, ബസ് സ്റ്റാൻഡിലെ ബസ് ജീവനക്കാർ തുടങ്ങിയവർക്ക് വിവരം കൈമാറി. അന്വേഷണം പുരോഗമിക്കുന്നതിന് ഇടയിലാണ് കോളജിനു മുൻവശത്തെ ഹോട്ടലിൽ നിന്ന് സംശയം തോന്നിയ യുവതിയെ കുറിച്ച് ഹോട്ടൽ ജീവനക്കാർ പൊലീസിനെ അറിയിച്ചത്. തുടർന്ന് യുവതിയെ കസ്റ്റഡിയിലെടുക്കുകയായിരുന്നു. കുഞ്ഞിനെ അമ്മയ്ക്ക് കൈമാറിയപ്പോൾ ഉണ്ടായ സന്തോഷം ഒരിക്കലും മറക്കാൻ പറ്റില്ലെന്ന് ഗാന്ധിനഗർ എസ്‌ ഐ റെനീഷ് പറഞ്ഞു.
READ MORE: കുട്ടിയെ തട്ടിയെടുത്തത് സുഹൃത്തുമായുള്ള ബന്ധം നിലനിര്‍ത്താന്‍, പ്രതി നീതു മാത്രം; പൊലീസ്
