കൊച്ചി: ലോക്സഭാ തെരഞ്ഞെടുപ്പില്‍ എല്‍ഡിഎഫിന്‍റെ കനത്ത തോല്‍വിക്ക് കാരണം ശബരിമല വിഷയം ആണെന്ന് മുതിർന്ന സിപിഎം നേതാവ് എംഎം ലോറൻസ്. പരാജയ കാരണം ശബരിമലയല്ലെന്ന സിപിഎം സംസ്ഥാന സമിതിയുടെ കണ്ടെത്തലിന് വിരുദ്ധമായാണ് ലോറൻസ് നിലപാട് വ്യക്തമാക്കിയത്. മുഖ്യമന്ത്രിയുടെ ശൈലിയില്‍ മാറ്റം വേണമെന്ന് തോന്നിയിട്ടുണ്ട്. മാധ്യമപ്രവർത്തകരോട് പിണറായി സൗമ്യമായി പെരുമാറണമെന്നും ലോറൻസ് പറയുന്നു.
തൊണ്ണൂറാം ജന്മദിനത്തോടനുബന്ധിച്ച് ഇ.ടി.വി ഭാരതിന് അനുവദിച്ച പ്രത്യേക അഭിമുഖത്തിലാണ് ലോറൻസ് മനസ്സുതുറന്ന് സുദീർഘമായി സംസാരിച്ചത്.
വിഎസ് പുന്നപ്ര- വയലാർ സമരസേനാനിയല്ല. പുന്നപ്ര സമരത്തിൽ നിന്നും പിന്തിരിഞ്ഞോടിയ ഭീരുവാണ് വിഎസ് എന്നും ലോറൻസ് തെളിവ് സഹിതം വിശദീകരിക്കുന്നു. ഏകാധിപതിയെ പോലെയായിരുന്നു വിഎസിന്‍റെ പല ചെയ്തികളും. ഇപ്പോൾ ഭരണപരിഷ്കാര കമ്മിറ്റി ചെയർമാൻ പദവി നല്‍കി അടക്കി നിർത്തിയിരിക്കുകയാണ് എന്നും ലോറൻസ് ഇടിവി ഭാരതിനോട് പറഞ്ഞു.
