എറണാകുളം: സിൽവർ ലൈൻ പ്രൊജക്‌ടിന്‍റെ സർവേ നടപടികൾ തടഞ്ഞ സിംഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കി. സംസ്ഥാന സർക്കാരിന് സര്‍വേ നടപടികളുമായി മുന്നോട്ട് പോകാം. സർക്കാർ സമർപ്പിച്ച അപ്പീൽ ഹർജിയിലാണ് ഡിവിഷൻ ബെഞ്ച് ഉത്തരവിറക്കിയത്. ഡി.പി.ആർ വിശദാംശങ്ങൾ അറിയിക്കണമെന്ന സിംഗിൾ ബെഞ്ച് നിർദേശവും ഹൈക്കോടതി ഒഴിവാക്കിയിട്ടുണ്ട്.
പാരിസ്ഥിതിക ആഘാത പഠനം നടത്തുന്നതിന് സർവെ ആന്‍റ് ബൗണ്ടറി ആക്‌ട് പ്രകാരം സർവെ നടത്താമെന്ന് അപ്പീൽ പരിഗണിച്ച വേളയിൽ തന്നെ ഡിവിഷൻ ബെഞ്ച് വ്യക്തമാക്കിയിരുന്നു. ഹർജിക്കാരുടെ ഭൂമിയിൽ സർവെ തടഞ്ഞ സിംഗിൾ ബഞ്ച് ഉത്തരവിനെതിരായ അപ്പീൽ ചീഫ് ജസ്റ്റീസ് അധ്യക്ഷനായ ബെഞ്ചാണ് പരിഗണിച്ചത്.
സർവേ നടപടികൾ തടഞ്ഞ ഉത്തരവ് റദ്ദാക്കണമെന്ന് സർക്കാർ
സിൽവർ ലൈൻ സർവേ നടപടിക്കെതിരെ കോടതിയെ സമീപിച്ചവരുടെ ഭൂമിയിലെ സർവേ നടപടികൾ തടഞ്ഞ ഉത്തരവ് റദ്ദാക്കണമെന്നായിരുന്നു സർക്കാരിന്‍റെ ആവശ്യം. സർക്കാരിന്‍റെ വാദങ്ങൾ കണക്കിലെടുക്കാതെയാണ് സിംഗിൾ ബഞ്ച് ഉത്തരവിറക്കിയതെന്നും പരാതിക്കാരുടെ ഹർജിയിലെ പരിഗണന വിഷയങ്ങൾക്കപ്പുറം കടന്നാണ് സിംഗിൾ ബെഞ്ചിന്‍റെ ഇടക്കാല ഉത്തരവെന്നും അപ്പീലിൽ സർക്കാർ വ്യക്തമാക്കിയിരുന്നു.
ഇതുവഴി സർവേ നിർത്തി വയ്ക്കാനുള്ള ഇടക്കാല ഉത്തരവ് സംസ്ഥാന വ്യാപകമായി സമാനമായ വ്യവഹാരങ്ങൾക്ക് വഴിതെളിക്കും. സാമൂഹികാഘാത സർവേ നിർത്തി വയ്ക്കുന്നത് പദ്ധതി വൈകാൻ കാരണമാകും. ഇത് പദ്ധതി ചെലവ് ഉയരാൻ ഇടയാക്കുമെന്നും സർക്കാർ വാദിച്ചിരുന്നു.
'സിംഗിൾ ബെഞ്ച് പരാമർശങ്ങൾ ഹർജിയുടെ പരിഗണന പരിധി മറികടക്കുന്നത്'
സിൽവർ ലൈനിനെതിരായ ഹർജി സമർപ്പിച്ചവർ പദ്ധതിയുടെ ഡിപിആറിനെക്കുറിച്ച് ആക്ഷേപമുന്നയിച്ചിട്ടില്ല. ഡിപിആർ സംബന്ധിച്ച സിംഗിൾ ബെഞ്ച് പരാമർശങ്ങൾ ഹർജിയുടെ പരിഗണന പരിധി മറികടക്കുന്നതാണ്. ഈ സാഹചര്യത്തിൽ ഡിപിആർ നടപടികൾ വിശദീകരിക്കണമെന്ന ഉത്തരവ് പാലിക്കാൻ നിർബന്ധിക്കരുതെന്നും അപ്പീലിൽ സർക്കാർ ആവശ്യപ്പെട്ടിരുന്നു. ഈ ആവശ്യവും ഹൈക്കോടതി അംഗീകരിച്ചത് സിൽവർ ലൈൻ പദ്ധതിയുമായി മുന്നോട്ട് പോകുന്ന സർക്കാരിന് ആശ്വാസം നൽകുന്നതാണ്.
READ MORE: കെ-റെയിൽ; അനുമതി തരില്ലെന്ന് പറഞ്ഞിട്ടില്ല, പ്രതിപക്ഷം വാർത്ത സൃഷ്ടിക്കരുതെന്ന് കെ. എൻ ബാലഗോപാൽ
